ޓްރަމްޕުގެ ޣައްޒާ ޕްލޭނަށް ހޯމަ ދުވަހު ސަލާމަތީ މަޖިލީހުން ވޯޓަށް އަހަނީ

ފަލަސްތީނުގެ ޣައްޒާގައި ހަމަލާތައް ހުއްޓާލަން އެމެރިކާގެ ރައީސް ހުށަހެޅުއްވި ޕްލޭނުގައިވާ ކަންކަން އދ. އިން ރަސްމީކޮށް ބަލައިގަނެ ތަންފީޒުކުރަން ފެށުމާ ބެހޭ ގޮތުން ސަލާމަތީ މަޖިލީހުގައި ހޯމަ ދުވަހު ވޯޓު ނަގަން ތާވަލްކޮށްފި އެވެ.

އިޒްރޭލާއި ހަމާސްއާ ދެމެދު ބަދަލުކުރަމުން ދިޔަ ހަމަލާތައް ދެ އަހަރަށް ފަހު ހުއްޓުމަކަށް ގެނައި ޕްލޭނަށް ސަލާމަތީ މަޖިލީހުގެ ތާއީދު ހޯދުމަށް އެ ކައުންސލްގެ 15 މެމްބަރުންނާ އެކު އެމެރިކާއިން މިދިޔަ ހަފްތާގައި ވަނީ މަޝްވަރާ ފަށައިފަ އެވެ.

މި ޕްލޭނާ ބެހޭ ގޮތުން ސަލާމަތީ މަޖިލީހަށް ހުށަހަޅަން ތައްޔާރުކޮށްފައިވާ ގަރާރުގެ ދެލިކޮޕީއެއް އޭއެފްޕީއަށް ލިބިފައި ވާއިރު އޭގައި ބުނެފައިވަނީ ޣައްޒާގެ ސުލްހަ ބެލެހެއްޓުމަށް "ބޯޑް އޮފް ޕީސް" ގެ ނަމުގައި އިންތިގާލީ 'މުއައްސަސާއެއް' އުފައްދާށެވެ. މިއީ 2027 ވަނަ އަހަރުގެ ނިޔަލަން މެންޑޭޓް ދީފައިވާ އަދި ރައީސް ޓްރަމްޕު އިސްވެ ހުންނަވާ ބޯޑެކެވެ.

އެ ބޮޑީގެ ދަށުން، ބައިނަލްއަގުވާމީ ފައުޖަކަށް ޣައްޒާގައި ފުރުސަތު ދީ، ސުލްހަ ބެލެހެއްޓުމުގެ މަސައްކަތް ކުރާނެ އެވެ.

އޮކްޓޫބަރު 7، 2023 ގައި އިޒްރޭލަށް ހަމާސްއިން ދިން ހަމަލާއާ އެކު އިޒްރޭލުން ޣައްޒާއަށް ދޭން ފެށި ހަމަލާތައް ހުއްޓާލަން ވީ އެއްބަސްވުމަށް އަމަލުކުރަން ފެށީ މިދިޔަ އޮކްޓޫބަރު މަހުގެ 10 ވަނަ ދުވަހު އެވެ. އެ އެއްބަސްވުމުގައި، ޣައްޒާގައި ބައިނަލްއަގުވާމީ ފައުޖެއް ބޭއްވުން ހިމެނޭއިރު މި ފައުޖަށް ސިފައިން ނަގާނީ މައިގަނޑު ގޮތެއްގައި، އަރަބި އަދި އިސްލާމީ ގައުމުތަކުންނެވެ. މިއީ އިޒްރޭލު ސިފައިން ޣައްޒާއިން ފައިބައިގެން ދިއުމުން ސަލާމަތީ ކަންކަމާ ހަވާލުވާނެ ފައުޖެވެ.