ކުރީގެ ޑައިރެކްޓަރު ފައްތާހު ކެލާ ކައުންސިލްގެ ރައީސްކަމަށް ވާދަކުރަނީ

ކުރީގެ މަޝްހޫރު ފިލްމު ޑައިރެކްޓަރު، އަބްދުލް ފައްތާހު، ހއ. ކެލާ ކައުންސިލްގެ ރައީސްކަމަށް ވާދަކުރަން ނިންމައިފި އެވެ.

ފައްތާހު، އޭނާގެ ފޭސްބުކްގައި ކުރި ޕޯސްޓުތަކުގައި ބުނީ ޕީއެންސީގެ ޓިކެޓުގައި އުފަން ރަށުގެ ކައުންސިލް ރައީސްކަމަށް ކުރިމަތިލަނީ ރައްޔިތުންނަށް ހެޔޮ ވެރިކަމެއް ކޮށްދިނުމުގެ ވިސްނުމުގައި ކަމަށެވެ.

ފިލްމީ ދާއިރާގައި ގިނަ އަހަރުތަކެއް ވަންދެން މަސައްކަތްކޮށް، ކާމިޔާބު ފިލްމުތައް އުފައްދާފައިވާ ފައްތާހުގެ އެންމެ ފަހުގެ ފިލްމު "ހައްދު"އަށް ފަހު، އޭނާ ވަނީ އެ ދާއިރާއިން ރިޓަޔާ ވެފަ އެވެ. އެ އަށް ފަހު، 2018 ހިސާބުގައި ކެލައަށް ދިރިއުޅުން ބަދަލުކޮށް، ކެލާގައި ރެސްޓޯރެންޓު ވިޔަފާރިއެއް ވަނީ ފަށައިފަ އެވެ.

އޭގެ ފަހުން ފިލްމީ ދާއިރާގެ އެއްވެސް މަސައްކަތަކުން އޭނާ ނުފެނެ އެވެ.

ފައްތާހުގެ ކާމިޔާބު ފިލްމުތަކުގެ ތެރޭގައި "14 ވިލޭރޭ"، "ވެހޭވާރޭ ތެރެއިން"، "ދޯބައްޓާ"، "ހިނިތުންވެލާށޭ ކަލާ" އަދި "ތިއޭ މި ހިތުގެ ވިންދަކީ" ފަދަ ދިވެހިންގެ މެދުގައި މަގުބޫލުވި ޑްރާމާތައް ވެސް ޑައިރެކްޓު ކޮށްފައިވެ އެވެ.

މުނިފޫހިފިލުވުމުގެ ދާއިރާއިން ކުރި މަސައްކަތުގެ އަގުވަޒަންކޮށް ސަރުކާރުން ވަނީ 2004 ވަނަ އަހަރު ފައްތާހަށް ގައުމީ އިނާމު އަރުވައިފަ އެވެ.