އިސްދޫ އެކްސިޑެންޓްގައި މަރުވި ޒުވާނާގެ ކަނދުރާ އޮތީ ބިނދިފައި

ލ. އިސްދޫ ބޮޑު މަގުގައި ރޭ ހިނގި އެކްސިޑެންޓުގައި މަަރުވި ޒުވާނާގެ ކަނދުރާ އޮތީ ބިނދިފައި ކަމަށް ރަށު ސިއްހީ މަރުކަޒާ ހަވާލާދީ ކައުންސިލުން މިއަދު ބުނެފި އެވެ.

އިސްދޫ ފަތިސްހަނދުވަރު، މުހައްމަދު ޔޫސުފް، 27، އެކަނި ދަނިކޮށް ރޭ 11 ޖަހާކަންހާ އިރު އެކްސިޑެންޓް ހިނގީ ސައިކަލް ކައްސާލައިގެން ކަމަށް ބެލެވެ އެވެ. ކުރީގޭ ވާރޭ ވެހިފައި އޮތުމުން މަގުގައި ކިސަޑު ހެދިފައި އޮތް ކަމަށް ރަށު މީހުން ބުނެ އެވެ.

މަންޒަރު ދުށް ބައެއް މީހުން ބުނާ ގޮތުގައި، އިސްދޫ އަވަށުން ކަލައިދޫ އަވަށަށް ޔޫސުފް ދުއްވާފައި ދިޔައީ އާދައިގެ ސްޕީޑެއްގަ އެވެ. އެކްސިޑެންޓް ވެގެން މީހުން ދިޔައިރު އޭނާ އޮތީ ސައިކަލާ 20 ފޫޓު ދުރުގަ އެވެ.

އިސްދޫ ކައުންސިލްގެ މެމްބަރަކު ވިދާޅުވީ އެކްސިޑެންޓު ހިނގުމާ އެކު ޔޫސުފް ސިއްހީ މަރުކަޒަށް ގެންދިޔައިރު ވެސް އޮތީ މަރުވެފައި ކަމަށެވެ. އޭނާގެ ކަނދުރާ ބިނދުމުގެ އިތުރުން ސީރިއަސް އެހެން އަނިޔާތަކެއް ވެސް ލިބިފައިވާ ކަަމަށް، ޑޮކްޓަރުންނާ ހަވާލާދެއްވައި، ކައުންސިލް މެމްބަރު ވިދާޅުވި އެވެ.

"ތަންކޮޅެއް ކިސަޑު ދިމާލެއްގައި އެކްސިޑެންޓު ހިނގީ. އެ ސަރަހައްދުގައި ކޮންމެވެސް ވަރަކަށް ކިސަޑު ހެދިފައި ހުރި ކަމަށް ވަނީ،" އޭނާ ވިދާޅުވި އެވެ.