އިންޑިއާގެ ރޭލް އެކްސިޑެންޓެއްގައި 10 މީހުން މަރުވެއްޖެ

ނިއު ދިއްލީ (އޮގަސްޓް 19) - އިންޑިއާގެ އުއްތަރަ ޕްރަދޭޝް ސްޓޭޓުގައި މިއަދު ހަވީރު ހިނގި ރޭލް އެކްސިޑެންޓެއްގައި 10 މީހުން މަރުވެ 20 އަށް ވުރެ ގިނަ މީހުން ޒަޚަމްވެއްޖެ އެވެ.

އެކްސިޑެންޓްވި ރޭލް ދަތުރު ކުރަމުން ދިޔައީ ޕޫރީ އިން އުއްތަރަކަންދުގެ ހަރިދްވާރަށެވެ. އެކްސިޑެންޓްވި ރޭލް ދަގަނޑުން ނެއްޓުމުގެ ސަބަބުން ހިނގި މި އެކްސިޑެންޓް ތަހުގީގު ކުރުމަށް އިންޑިއާގެ ރޭލްވޭ މިނިސްޓަރު ސުރޭޝް ޕްރަބޫ މިހާރު ވަނީ އަންގަވައިފަ އެވެ. އަދި މިއީ އެއްވެސް ބައެއްގެ ފަރުވާ ކުޑަވުމުގެ ސަބަބުން ހިނގި އެކްސިޑެންޓެއް ނަމަ އެ ފަރާތްތަކަށް ހަރުކަށި ފިޔަވަޅު އަޅާނެ ކަމަށް ވެސް އޭނާ ވިދާޅުވި އެވެ.

ރޭލް އެކްސިޑެންޓާ ގުޅިގެން މީހުން ސަލާމަތް ކުރުމުގެ އޮޕަރޭޝަން މިހާރު ވަނީ ފަށައިފަ އެވެ. އަދި ނޭޝަނަލް ޑިޒާސްޓާ ރެސްޕޮންސް ޓީމެއް ނިއު ދިއްލީން މިހާރު ވަނީ އުއްތަރަ ޕްރަދޭޝް އަށް ފޮނުވައިފަ އެވެ.

ދުނިޔޭގެ އެންމެ ބޮޑު ރޭލްވޭ ނެޓްވޯކް އޮންނަ އިންޑިއާގައި ރޭލް އެކްސިޑެންޓްތައް ހިނގުމަކީ އާއްމު ކަމެކެވެ. ރޭލް ނެޓްވޯކް ތަރައްގީ ކުރުމަށް ސަރުކާރުގެ މާލީ އެހީތެރިކަން ކުޑަ ނަމަވެސް ބޮޑު ވަޒީރު ނަރެންދުރަ މޯދީގެ ސަރުކާރުން ވަނީ ރޭލްވޭ ތަރައްގީ ކުރަން ފަސް އަހަރު ތެރޭ 137 ބިލިއަން ޑޮލަރު އިންވެސްޓް ކުރާނެ ކަމަށް ބުނެފަ އެވެ.

އިންޑިއާގެ ރޭވްލޭ ނިޒާމު ދުވާލަކު 23 މިލިއަން މީހުން ބޭނުން ކުރެ އެވެ.