ގޮނޑި ނުގެއްލޭ ކަމަށް ކަނޑައަޅަން އިތުރު ތިން މެމްބަރަކު ސުޕްރީމް ކޯޓަށް ހުށަހަޅައިފި

ރައްޔިތުންގެ މަޖިލީހުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ ތިން މެމްބަރަކު އެ ބޭފުޅުންގެ ގޮނޑި ނުގެއްލޭ ކަމަށް ކަނޑައަޅަން ސުޕްރީމް ކޯޓަށް ހުށަހަޅައިފި އެވެ.

މަޖިލީހުގެ މެމްބަރުކަމުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ 10 މެމްބަރުންގެ ތެރެއިން މިފަހަރު ސުޕްރީމް ކޯޓަށް މައްސަލަ ހުށަހެޅީ ދަނގެތީ ދާއިރާގެ އިލްހާމް އަހުމަދާއި މައްޗަންގޯޅީ ދެކުނު ދާއިރާގެ އަބްދުﷲ ސިނާން އަދި ތިނަދޫ ދެކުނު ދާއިރާގެ އަބްދުﷲ އަހުމަދެވެ.

އެ ބޭފުޅުންގެ ގޮނޑި ނުގެއްލޭ ކަމަށް ކަނޑައަޅަން އެ ބޭފުޅުންގެ ފަރާތުން ސުޕްރީމް ކޯޓަށް މައްސަލަ ހުށަހެޅީ އިއްޔެގެ ވަގުތެއްގައި ކަމަށް ޖުމްހޫރީ ޕާޓީގެ އޮފިޝަލަކު ވިދާޅުވި އެވެ.

ކުރިން ޕީޕީއެމްގައި ތިއްބެވި އެ ތިން ބޭފުޅުންގެ ގޮނޑި ގެއްލިފައިވާ ކަމަށް ކޮމިޝަނުން ނިންމީ ސުޕްރީމް ކޯޓުގެ ހުކުމުގެ ކުރިން އެ ބޭފުޅުން ޕާޓީން ވަކިވާން ސިޓީ ފޮނުވާފައި ވަނިކޮށެވެ. ޕާޓީން ވަކިވާން ސިޓީ ފޮނުވާފައި ވަނިކޮށް ޕީޕީއެމުން ވަނީ އެ ބޭފުޅުންގެ ސުލޫކީ މައްސަލަތަކެއް ބަލަމުންދާ ކަމަށް ބުނެފަ އެވެ. އަދި ސުޕްރީމް ކޯޓުގެ ހުކުމުގެ ފަހުން އެ ބޭފުޅުން ޕާޓީން ވަކިކުރަން ނިންމި ކަމަށް އިލެކްޝަންސް ކޮމިޝަނަށް އެންގުމުން އެ ކޮމިޝަނުން ވަނީ އެ ބޭފުޅުންގެ ގޮނޑި ގެއްލިފައިވާ ކަމަށް ނިންމައިފަ އެވެ.

މިހާތަނަށް ގޮނޑި ގެއްލުނު ހުރިހާ މެމްބަރުންނަކީ ވެސް ޕީޕީއެމްގައި ތިއްބެވުމަށް ފަހު ސުޕްރީމް ކޯޓުގެ ހުކުމުގެ ކުރިން އެ ޕާޓީން ވަކިވާން ސިޓީ ފޮނުވި މެމްބަރުންނެވެ.

އިންތިޚާބުވި ޕާޓީން ވަކިވުމުން މެމްބަރުކަން ގެއްލޭ ގޮތަށް ސުޕްރީމް ކޯޓުން ކުރި ހުކުމަކީ އެ ހުކުމުގެ ކުރިން ހިނގައި، ނިމިފައިވާ ކަންކަމަށް ހިނގާނެ އުސޫލެއް ނޫން ކަމަށް އެ ކޯޓުން ފަހުން ނެރުނު އަމުރެއްގައިވަނީ ބުނެފަ އެވެ. އެހެންވެ އެއިން އެއްވެސް މެމްބަރެއްގެ ގޮނޑި ނުގެއްލޭނެ ކަމަށް އިދިކޮޅު ކޯލިޝަނުން ވަނީ ބުނެފަ އެވެ.