އަރީފްގެ ނަސޭހަތް: "ހައްގަކާ ނުލައި މީހުން ހައްޔަރު ނުކުރޭ"

ހައްގަކާއި ނުލައި މީހުން ހައްޔަރުކޮށް، ބޭއިންސާފުން އަދަބު ނުދިނުމަށް ކުރީގެ ޕޮލިސް ޕޮލިސް ކޮމިޝަނަރު އަހްމަދު އަރީފް ފުލުހުންނަށް މިއަދު ނަސޭހަތް ދެއްވައިފި އެވެ.

ސަރުކާރު ވައްޓާލަން އުޅުމުގެ ތުހުމަތުގައި ހައްޔަރުކޮށް، ޓެރަރިޒަމްގެ ދައުވާ އުފުލައި ޝަރީއަތް ނިމެންދެން މާފުށީ ޖަލުގައި ބަންދުކޮށްފައިވާ އަރީފް ފުލުހުންނަށް ނަސޭހަތް ދެއްވީ، ފުލުހުންގެ 85 ވަނަ އަހަރީ ދުވަހުގެ މުނާސަބަތުގައި އާއްމު ކުރެއްވި ބަޔާނެއްގަ އެވެ.

އެ ބަޔާނުގައި އަރީފް ވިދާޅުވީ އިސްލާމް ދީނުގައި، ކުށްވެރިންނަށް އަދަބު ދިނުމުގެ މަގްސަދު މަފްހޫމަކަށް ވެފައި ވަނީ ކުށްތަކުން އެ ބަޔަކު ދުރުކުރުމަށާއި މުޖުތަމައު އެކުށެއްގެ ވަބާ އިން މިންޖު ކުރަން ކަމަށެވެ. އެހެންކަމުން، ހައްގަކާ ނުލައި މީހުން ހައްޔަރުކޮށް، ބޭ އިންސާފުން އަދަބު ދީގެން ނުވާނެ ކަމަށް އަރީފް ވިދާޅުވި އެވެ.

އަރީފް ވިދާޅުވި ގޮތުގައި ގާނޫނުން ލިބިފައިވާ ބާރާއި އިހްތިޔާރުތަކުގެ ތެރޭގައި ފުލުހުން އަބަދުވެސް ތިބެން ޖެހޭނީ ރައްޔިތުންނަށް ރައްކާތެރިކަން ހޯދައިދީ ގާނޫނުއަސާސީ ނެގެހެއްޓުމަށެވެ. ގާނޫނުއަސާސީގައި ދައުލަތުގެ ވަކިވަކި ބާރުތަކަށް ހިމާޔަތާއި ރައްކާތެރިކަން ފޯރުކޮށްދޭން ޖެހޭނެ ކަމަށް އަރީފް ވިދާޅުވި އެވެ.

ސިޔާސީ އިދިކޮޅު ލީޑަރުން ވެސް ހިމެނޭ ގޮތަށް ބަންދުގައި ތިބި ނުވަ ގައިދީއަކު ދޫކޮށްލަން ސުޕްރީމް ކޯޓުން މިދިޔަ މަހުގެ އެއް ވަނަ ދުވަހު ކުރި އަމުރާ މެދު ސަރުކާރުން ގޮތެއް ނުނިންމަނީސް، އެ އަމުރު ފުލުހުންގެ މުއައްސަސާ އިން ތަންފީޒު ކުރަން މަސައްކަތް ކުރެއްވި ކަމުގެ ތުހުމަތު އަރީފަށް ކުރެ އެވެ. އެ މައްސަލައިގައި އޭނާއާ ދެކޮޅަށް ޓެރަރިޒަމްގެ ދައުވާ ކުރަން ކްރިމިނަލް ކޯޓަށް ވަނީ ފޮނުވައިފަ އެވެ.

އަރީފް ވިދާޅުވީ ރާއްޖޭގައި އަމާންކަމާއި ސުލްހަ މަސަލަސްކަން ގާއިމުވެފައި އޮތީ މުއުއައްސަސާތަކުގައި އެއިރެއްގައި މަސައްކަތް ކުރެއްވި ބޭފުޅުންގެ އިހުލާސްތެރި މަސައްކަތްތަކުން ކަމަށެވެ. އަދި އެ ވާޖިބު އަދާކުރުމުގައި އަމާނާތްތެރިކަން އިސްކުރުމަށް ފުލުހުންނަށް އޭނާ އެދިވަޑައިގެންނެވި އެވެ.

މަގާމާއި އިހުތިޔާރަކީ ރައްޔިތުންގެ ފަރާތުން ހަވާލުވެވޭ އަމާނާތެއް ކަން އަބަދުވެސް ދަންނަން ޖެހޭ ކަމަށް އަރީފް ވިދާޅުވި އެވެ. އެ އަމާނާތް ހަވާލުކުރެވޭ ކޮންމެ މީހަކީ އެ އަމާނާތާ މެދު ޒިންމާވާން ޖެހޭނެ މީހެއްކަން ދަންނަން ޖެހޭނެ ކަމަށް ވެސް އަރީފް ވިދާޅުވި އެވެ.

"ރައްޔިތުންގެ ފަރާތުން ކަންކަމާއި ހަވާލުވެ ހުންނަ ކޮންމެ މީހަކީ އެމީހެއްގެ ވާޖިބު އަދާކުރި ގޮތާއި މެދު ރައްޔިތުންގެ ކުރިމަތީގައި ޒިންމާ ވާންޖެހޭނެ މީހެކެވެ. މިއީ ފުލުހުންގެ ހިދުމަތާއި އަލަށް ގުޅޭ މީހުން ފެށިގެން އެންމެ މަތީ ރޭންކު ތަކުގައި ތިއްބެވެވި ބޭކަލުންނާއި އެ ބޭކަލުންގެ ބަދަލުވެރި ފަރާތްތައްވެސް ހިމެނޭ ގޮތަށެވެ،" އަރީފް ނެރުއްވި ބަޔާނުގައިވެ އެވެ.

އޭނާ ވިދާޅުވި ގޮތުގައި ރާއްޖޭގެ ޑިމޮކްރަސީ ހަރުދަނާވާނީ، ސިޔާސީ ނުފޫޒު ތަކުން ފުލުހުން އެއްފަރާތްވެ މިނިވަންކަމާއި އަމިއްލަ ބާރުގައި ކަންކަން ކަނޑައެޅުމުގެ އިހުތިޔާރާއި ބާރު ފުލުހުންނަށް އޮވެގެންނެވެ.

އެ އިހުތިޔާރާއި ބާރު ގެއްލިފައިވާ ނަމަ މާޒީގެ އިބުރަތްތެރި ފިލާވަޅުތަކުން ފިލާވަޅު ލިބިގެން ކަންކަން އިސްލާހު ކުރުމަށް ތިބޭނީ މިއަދު ފުލުހުންގެ ވަޒީފާގައި ތިބި މީހުން ކަމަށްވެސް އަރީފް ވިދާޅުވި އެވެ. އަދި ފުލުހުންގެ ޔުނީފޯމުގެ ޒިންމާ އުފުލުމުގައި ފަސްޖެހިގެން ނުވާނެ ކަމަށް އޭނާ ވިދާޅުވި އެވެ.

"ނަމަވެސް، އެހެން މީހުންގެ މިނިވަންކަމާއި އެހެން މީހެއްގެ ހައްގެއް ނުބަލާ އެ ބަޔަކު ކުރިޔަށް ދާއިރު ފައިސާގެ ތަނަވަސްކަން ދަނީ ހޯދަމުން. އަތުޖެހުނު ގޮތަކަށް އެ ތަނަވަސްކަން ހޯދާއިރު ދީނަކަށް ގައުމަކަށް އަދި މުޖުތަމައަކަށް ބެލުމެއް ނެތި. މިކަންކަން ހަމަ މަގަަށް އެޅުވުމުގެ ފުރިހަމަ އިހުތިޔާރާއި ބާރުވެރިކަން ލިބިފައިވާ ފަރާތްތަކުން ޒިންމާ ނުނަގާނަމަ ހަޑިވެގެން ކިލަނބުވެގެންދާނީ ތިޔަބޭކަލުންގެ ސާފު ޔުނީފޯމުކަން މިއަދު ހަނދާން ބަހައްޓަން ޖެހޭނެ،" އަރީފް ނެރުއްވި ބަޔާނުގައިވެ އެވެ.

ފުލުހުންގެ އަހަރީ ދުވަހާ ގުޅުވައިގެން އަރީފް ވަނީ ހުރިހާ ފުލުހުންނަށާއި އެމީހުންގެ އާއިލާތަކަށް ތަހްނިޔާ ފޮނުއްވައިފަ އެވެ. އަރީފް ވިދާޅުވީ މި ވަގުތު އޭނާ އާއި އޭނާގެ އާއިލާ އުނދަގޫ އަދި ދަތި ކަންތައްތަކެއްގެ ތެރޭގައި އުޅެން ޖެހުނު ނަމަވެސް ފުލުހުންގެ މުވައްސަސާގެ ކުރިއެރުމަށް އެދޭ ކަމަށެވެ.

ކޮންމެ އިންސާނީ މުޖުތަމައުއެއްގައި ވެސް އަދުލު އިންސާފު ގާއިމު ކުރުމަކީ އެ މުޖުތަމައުއެއްގައި ސުލްހަ މަސަލަސްކަމާއި ހަމަޖެހުން ދެމެހެއްޓުމަށް އެންމެ މުހިންމު ކަންތައްކަން ފާހަގަކޮށް އޭނާ ވަނީ ކޮންމެ ފުލަހަކު ވެސް ހަވާލުވެފައިވާ އަމާނާތަށް ރައްކާތެރިވުމަށް އެދިވަޑައިގެންފަ އެވެ.