އިންޑިއާގެ "ރޭލުގެ ބޮޑު ވައްކަން" ފުލުހުން ތަހުގީގު ކުރަން ފަށައިފި

ޗެންނާއީ (އޮގަސްޓް 11) - އިންޑިއާގެ ދެކުނުގެ ޓަމިލް ނާޑޫ ސްޓޭޓުގައި ރޭލަކުން ކުރި އާދަޔާޚިލާފު ބޮޑު ވައްކަން ފުލުހުން ތަހުގީގު ކުރަން ފަށައިފި އެވެ.

ވަގުން ވައްކަން ކޮށްފައި ވަނީ ބޭނުންކޮށްފައި އަދި ހަލާކުވެފައިވާ ފައިސާގެ 200 ފޮށި ހިފައިގެން ދަތުރުކުރި ރޭލަކުންނެވެ. ވައްކަންކޮށްފައި ވަނީ ރޭލުގެ މަތިން ތަންގަނޑެއް ކަނޑާލައިގެންނެވެ. ވަގުން ވަނީ ރޭލުން 57.5 މިލިއަން ރުޕީސް (860،000 ޑޮލަރު) ވަގަށް ގެންގޮސްފަ އެވެ. އެ ރޭލުން 3.4 ބިލިއަން ރުޕީސް (51 މިލިއަން ޑޮލަރު) ގެންދިޔަ އެވެ.

ވައްކަން ކުރި ވަގުން ތިބީ ރޭލުގައި ފިލާކަން ނުވަތަ ރޭލު ދަތުރު ކުރަނިކޮށް ވަގުން ރޭލަށް އެރީ ކަމެއް ފުލުހުންނަށް އަދި ޔަގީނެއް ނޫނެވެ. ރޭލުން ވައްކަން ކުރިކަން އެނގުނީ ސްޓޭޝަނަށް މަޑުކުރި ފަހުންނެވެ.

ފުލުހުން ބުނީ ވައްކަމުގައި ހައެއް ނުވަތަ އަށެއްގެ މީހުން ބައިވެރިވެފައިވާ ކަމަށް ބެލެވޭ ކަމަށެވެ. ވައްކަން ކޮށްފައިވާ ކަމަށް ބެލެވެނީ ހޯމަ ދުވަހުގެ ރޭ ނުވަތަ އަންގާރަ ދުވަހު ހެނދުނު ޗެންނާއީގެ ސާލިމް ޓައުނުން ދަތުރުކޮށްފައި ދިޔަ އިރު އެވެ. ރޭލުގައި ހުރި ފައިސާތައް ބަލަހައްޓަން ސެކިއުރިޓީ ގާޑުން ވެސް ތިއްބެވެ. އެކަމަކު އެ މީހުން ތިބީ ޖެހިގެން ހުރި ކޮންޕާޓްމަންޓުގަ އެވެ.

މިއީ އިންޑިއާގެ މަރުކަޒީ ބޭންކުގެ ފައިސާ އެވެ. މި ފައިސާތައް ޗެންނާއީ އަށް ގެންދިޔައީ ނައްތާލުމަށެވެ. ޗެންނާއީގައި ރޭލު މަޑުކުރުމަށް ފަހު ފައިސާ ފޮށިތައް ބާލަން ބެލިއިރު ފުލުހުންނަށް ވަނީ ބައެއް ފޮށިން ސީލު ކަނޑާލާފައިވާކަން ފާހަގަވެފަ އެވެ. އަދި ފަހުން ވަނީ ރޭލުގެ މަތިން ބާގަނޑެއް ހަދާފައިވާކަން ވެސް އެނގިފަ އެވެ.

"ރޭލުގެ ގާޑުންނާއި ފުލުހުން ހާޒިރުކޮށް އެ މައްސަލަ ބަލަމުން މިދަނީ،" ފުލުހުންގެ ސްޕްރިންޓެންޑެންޓް ޕީ ވިޖަޔަކުމާރު އޭއެފްޕީ އަށް ވިދާޅުވި އެވެ.

ފުލުހުންގެ އިންސްޕެކްޓާ ޖެނެރަލް އެމް.ރާމަސުބްރަމާނީ ވިދާޅުވީ ލަފާކުރެވެނީ ރޭލުގެ މަތިން ތަންގަނޑެއް ކަނޑާލުމަށް ފަހު އެކަކު ގައިގައި އަނެކަކު ހިފައިގެން ފޭބުމަށް ފަހު ފޮށިތަކުން ވައްކަންކޮށްފައިވާ ކަމަށެވެ.

ރޭލު މިހާރު އޮތީ ޗެންނާއީގައި ފުލުހުންގެ ބެލުމުގެ ދަށުގަ އެވެ. ތަޖްރިބާކާރުން ބުނަނީ ވަރަށް ބޮޑަށް ސަލާމަތީ ފިޔަވަޅުތައް އަޅާފައިވާ ރޭލަކުން ވައްކަން ކުރުމުން އިންޑިއާގައި ސަލާމަތީ ކަންކަން ހުންނާނެ ގޮތާމެދު ވަރަށް ބޮޑަށް ސުވާލު އުފެދޭ ކަމަށެވެ.

ރޭލުން ވައްކަން ކުރި ޚަބަރު އިންޑިއާގެ ބައެއް ނޫސްތަކުން ކަވަރުކޮށްފައި ވަނީ "ރޭލުގެ ބޮޑު ވައްކަމުގެ" ގޮތުގަ އެވެ.