އިންތިޚާބަށް ވާދަކުރަން ހަމްޒާ ފޯމު ހުށަހަޅައިފި

ކުރިއަށް އޮތް ރައްޔިތުންގެ މަޖިލިހުގެ އިންތިޚާބުގައި ގަލޮޅު އުތުރު ދާއިރާ އަށް އަމިއްލަ ގޮތުން ވާދަކުރަން ގާނޫނީ ވަކީލް ހަމްޒާ ޚަލީލް އިލެކްޝަންސް ކޮމިޝަން (އީސީ) އަށް މިއަދު ފޯމު ހުށަހަޅައިފި އެވެ.

އިޖުތިމާއީ އަދި ސިޔާސީ ދާއިރާގައި ވެސް މަސައްކަތްތައް ކޮށްފައިވާ ހަމްޒާ "މިހާރު" އަށް ބުނީ، ރައްޔިތުންގެ ބަސް އިއްވައި ހެޔޮ ބަދަލު ގެނެސްދޭނެ މީހުން މަޖިލިހަށް ބޭނުންވާ ކަމަށެވެ. ނަމަވެސް އެކަން މިހާރުގެ މެމްބަރުންގެ ކިބައިން ނުފެންނަ ކަމަށް ބުންޏެވެ.

އޭނާ ބުނީ، ރައްޔިތުންނަށް ވުރެ މަޖިލިސް މެމްބަރުން މަތިވެގެން ނުވާނެ ކަމަށެވެ. ސިޔާސީ ޕާޓީތަކުން ވެސް މަސައްކަތް ކުރަނީ ރައްޔިތުންގެ ފައިދާއަށް ވުރެ ބޮޑަށް ވިޔަފާރިވެރިންގެ މަސްލަހަތުގައި ކަމަށް ޒުވާން ވަކީލް ބުންޏެވެ.

"މިއީ މަޖިލިސް އިސްލާހު ކުރަން ނުކުންނަންވީ ވަގުތު. އަޅުގަނޑަކީ އަބަދުވެސް ކަންކަން ބަދަލުކުރުމުގެ ވިސްނުން ހުންނަ މީހެއް. އެހެންވެ އަމިއްލަ ގޮތުން މަޖިލިހަށް ކުރިމަތި މިލަނީ،" ގަލޮޅު އުތުރަށް ނިސްބަތްވާ ހަމްޒާ ބުންޏެވެ.

ޖަމިއްޔާތަކާ ގުޅިގެން ހަމްޒާ ވަނީ 18 އަހަރުން މަތީގެ މީހުންނަށް ވޯޓުލެވޭ ގޮތަށް ގާނޫނުއަސާސީ އިސްލާހުކުރުމަށް އަޑުފުލައި ރައްޔިތުންގެ މަޖިލިހަށް ޕެޓިޝަނެއް ވެސް ހުށަހަޅައިފަ އެވެ. އަދި މެމްބަރުންގެ އިމްތިޔާޒުގެ ބިލާ ދެކޮޅަށް ވެސް 2010 ވަނަ އަހަރު މަސައްކަތް ކޮށްފައި ވެ އެވެ.

މީގެ ކުރިން ވޯޓުލެވެނީ އުމުރުން 21 އަހަރުން މަތީގެ މީހުންނަށެވެ.

ޖެންޑާ މިނިސްޓްރީ އާއި ކޮމަންވެލްތުގެ ޔޫތު އެމްބެސެޑަރުކަން ކޮށްފައިވާ ހަމްޒާ ބުނީ، އޭޕްރީލް ހަ ވަނަ ދުވަހު ބާއްވާ ރައްޔިތުންގެ މަޖިލިހުގެ އިންތިޚާބުގައި އޭނާ އަށް ކާމިޔާބު ލިބިއްޖެ ނަމަ މަޖިލިހަށް އިސްލާހީ ބަދަލުތަކެއް ގެންނަން މަސައްކަތް ކުރާނެ ކަމަށެވެ. އެގޮތުން، މެމްބަރުންގެ މާލީ ބަޔާން އާއްމުކުރަން ޖެހޭގޮތަށް ގާނޫނު ބަދަލުކުރަން ހުށަހެޅުމާއި އެ މެމްބަރަކު ޖަވާބުދާރީ ކުރުވުމުގައި ދާއިރާގެ ރައްޔިތުންނަށް ބާރު ދިނުން ހިމެނެ އެވެ.

ހަމްޒާ ވަނީ އޭނާގެ މާލީ ބަޔާން ހާމަކޮށްފަ އެވެ.

ހަމްޒާ ބުނިގޮތުގައި، ރައްޔިތުންގެ މަޖިލިހަށް އިންތިޚާބު ވުމަށް ފަހު، އޭނާ އިއްވާނީ ދާއިރާގެ ރައްޔިތުންގެ އަޑެވެ. އަދި ގޮތްތައް ނިންމުމުގައި ރައްޔިތުންގެ އަޑު އަހާނެ ކަމަށް ހަމްޒާ ބުންޏެވެ.

ގަލޮޅު އުތުރު ދާއިރާއަށް އެމްޑީޕީގެ ޓިކެޓުގައި ވާދަކުރައްވަނީ މިހާރު ވެސް އެ ދާއިރާގެ މެމްބަރު އީވާ އަބްދުﷲ އެވެ.