ހުޅު ބަދަލުކުރުމުގެ ތިން އޮޕަރޭޝަނެއް ކުޅުދުއްފުށީ ހޮސްޕިޓަލުގައި ކޮށްފި

ހދ. ކުޅުދުއްފުށީ ރީޖަނަލް ހޮސްޕިޓަލުގައި، ކަކުލު ހުޅު ބަދަލުކުރުމުގެ ތިން އޮޕަރޭޝަނެއް ކާމިޔާބުކަމާއެކު ކޮށްފި އެވެ.

މި ހަފުތާ ތެރޭގައި، 60 އަހަރުން މަތީގެ ތިން ފިރިހެނެއްގެ އޮޕަރޭޝަން ކުރީ އައިޖީއެމްއެޗާއި ކުޅުދުއްފުށީ ހޮސްޕިޓަލް ގުޅިގެންނެވެ. އެކަމުގައި އިސްކޮށް އުޅުއްވީ ސަރުކާރުގެ މައި ހޮސްޕިޓަލް، އައިޖީއެމްއެޗުގެ ކަށީގެ ހާއްސަ ޑޮކްޓަރު އަދި ކަށީގެ ޑިޕާޓްމަންޓުގެ ހެޑް، ޑރ. އަލީ މުޒުނީ އެވެ.

ސ. މީދޫ އަދި ގދ. ތިނަދޫ ރީޖަނަލް ހޮސްޕިޓަލުގައި ވެސް މީގެ ކުރިން ވަނީ މީގެ އޮޕަރޭޝަންތަކެއް ކޮށްފަ އެވެ.

މުޒުނީ ވިދާޅުވީ އެ އޮޕަރޭޝަން ކުރި ތިން މީހުންގެ ހާލު ވެސް ރަނގަޅު ކަމަށެވެ. އެއްވެސް ކަމެއް ގޯސްނުވާ ނަމަ އެ މީހުންނަށް މަހެއްހާ ދުވަހުގެ ތެރޭގައި އާންމުކޮށް ހިނގާ އުޅެވޭނެ ކަމަށް މުޒުނީ ވިދާޅުވި އެވެ.

ކުޅުދުއްފުށީ ހޮސްޕިޓަލުގެ އޮޕަރޭޝަން ތިއޭޓަރަކީ ވަރަށް ފަހުން ހުޅުވި ތަނެކެވެ. އެތަނުގައި މީގެ ކުރިން ވެސް އޮޕަރޭޝަންތައް ކޮށްފައި ހުރުމުން މާ ބޮޑު ދައްޗެއް ކުރިމަތި ނުވާ ކަން ފާހަގަކުރެއްވި އެވެ.

"އަޅުގަނޑުމެން އޮޕަރޭޝަނަަށް ބޭނުންވާ ހުރިހާ އެއްޗެއް ހިފައިގެން ދަނީ. މިކަންތައް ފަސޭހައިން ކުރެވެނީ އެ ހޮސްޕިޓަލާއި އައިޖީއެމްއެޗާއި އަޅުގަނޑުމެންނާ ވެސް ކަނެކްޝަން އޮންނަ ވަރަކުން،" މުޒުނީ ވިދާޅުވި އެވެ.

ހުޅު ބަދަލުކުރުމުގެ އޮޕަރޭޝަން ކުރަނީ، ހުޅުގެ މަޑުކަށި ގޭނެމުން ގޮސް ބޭހަކުން ވެސް އަދި އެނޫން ގޮތަކުން ވެސް ހައްލުނުވާ ހިސާބަށް ދިއުމުންނެވެ. އެ އޮޕަރޭޝަން ކުރުމުން ވޭން ކެނޑިގެންދާނެ އެވެ.