ބީއެމްއެލް އިން އެދުނު ފަދަ ވަގުތީ އަމުރެއް ނެރެދެވެން ނެތް ކަމަށް ނިންމައިފި

ކޮރަޕްޝަންގެ މައްސަލަތައް ބަލާ ރިޔާސީ ކޮމިޝަނާ ދެކޮޅަށް ބޭންކް އޮފް މޯލްޑިވްސް (ބީއެމްއެލް) އިން ސިވިލް ކޯޓަށް ހުށަހެޅި މައްސަލައިގައި އެ ބޭންކުން އެދުނު ފަދަ ވަގުތީ އަމުރެއް ނެރެދެވެން ނެތް ކަމަށް ސިވިލް ކޯޓުން މިއަދު ނިންމައިފި އެވެ.

ކޮރަޕްޝަން އެންޑް އެސެޓް ރިވަކަރީ ކޮމިޝަނާ ދެކޮޅަށް ބީއެމްއެލް އިން ދައުވާކުރީ އެ ކޮމިޝަނުން އެދޭ ކޯޓު އަމުރެއް އޮވެގެން ނޫނީ މައުލޫމާތު ދޭން ނުޖެހޭނެ ކަމަށް ކަނޑައަޅައި ދިނުމަށް އެދި އެވެ. އަދި އެ މައްސަލަ ނިމެންދެން އެފަދަ އެއްވެސް ފިޔަވަޅެއް ނާޅަން ވަގުތީ އަމުރެއް ނެރެދޭން ވެސް ބީއެމްއެލް އިން އެ މައްސަލައިގައި އެދިފައިވެ އެވެ.

އެކަމަކު، ސިވިލް ކޯޓުން މިއަދު ނިންމީ ބީއެމްއެލް އިން އެދުނު ފަދަ ވަގުތީ އަމުރެއް ނެރެދެވެން ނެތް ކަމަށެވެ.

އެ މައްސަލައިގެ ތެރެއަށް އެންޓި ކޮރަޕްޝަން ކޮމިޝަން (އޭސީސީ) އިން ވެސް ވަނީ ތަދައްޚުލް ވެފަ އެވެ.

މީގެ ކުރިން ބީއެމްއެލް އިން ތަހުގީގީ އިދާރާތަކަށް މައުލޫމާތު ދެމުން އައި ނަމަވެސް ހައި ކޯޓުން ދާދި ފަހުން ކުރި ހުކުމެއް އޮތްގޮތުން ކޯޓު އަމުރެއް ނެތި މަައުލޫމާތު ދިނުމުގައި ދަތިތަކެއް ހުރި ކަމަށް އެ ބޭންކުން ބުނެފައިވެ އެވެ. އެކަމަކު މިކަމުގައި ބީއެމްއެލް އާއި ތަހުގީގީ އިދާރާތަކާ މެދު ވަނީ ޚިޔާލު ތަފާތުވެފަ އެވެ.