މާފަރު އެއްކޮޅު ޓިކެޓެއްގެ އަގު 750ރ. އަށް، މިހާރު ޓިކެޓް ގަނެވޭނެ

ނ. މާފަރު އިންޓަނޭޝަނަލް އެއާޕޯޓުގެ ދަތުރުތައް އަންނަ އާދިއްތަ ދުވަހު ފަށާއިރު، އެއްކޮޅު ޓިކެޓެއްގެ އަގަކީ 750ރ. ކަމަށް ގައުމީ އެއާލައިން މޯލްޑިވިއަން އިން ހަމަޖައްސައިފި އެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި މާފަރުގައި އިންޓަނޭޝަނަލް އެއާޕޯޓެއް ހެދުމަށް ސިންގަޕޫރުގެ ޓަފް ކުންފުންޏާ ހަވާލު ކުރީ ޑިސެމްބަރު 24، 2017 ގަ އެވެ.

މާފަރުގައި އިންޓަނޭޝަނަލް އެއާޕޯޓެއް ހެދުމަށް ބޭނުންވާ ހުރިހާ ހަރަދެއް އަބޫ ދާބީ ފަންޑް ފޯ ޑިވެލޮޕްމެންޓް (އޭޑީއެފްޑީ) އިން ކުރާއިރު، އެއާޕޯޓަށް 60 މިލިއަން ޑޮލަރު ހޭދަކޮށްފައިވެ އެވެ.

މި އެއާޕޯޓަށް ޓެސްޓް ފްލައިޓުތައް ޖެއްސީ މިދިޔަ އަހަރުގެ އޮގަސްޓް މަހު އެވެ. އޭގެ ފަހުން، އެކި ފަހަރު މަތިން އެއާޕޯޓުގެ މަސައްކަތް ކުރުމަށް ކަނޑައެޅި މުއްދަތު އިތުރު ކޮށްފައިވެ އެވެ.

މާފަރު އިންޓަނޭޝަނަލް އެއާޕޯޓު ހުޅުވުމާ އެކު އިންޓަނޭޝަނަލް ދަތުރުތައް ވެސް އެ އެއާޕޯޓަށް ފަށާނެ އެވެ. މިއީ އޭ320 އާއި ބޮއިން 737 މަރުކާގެ ބޯޓު ފަހަރަށް ވެސް ޖެއްސޭ ފެންވަރުގެ އެއާޕޯޓެވެ.