އެސްޓީއޯ އިން ވިއްކާ ޑީސަލުން 30 ލާރި އަގުހެޔޮކޮށްފި

އެސްޓީއޯ އިން ވިއްކާ ޑީސަލުން 30 ލާރި މިއަދުން ފެށިގެން ހެޔޮކޮށްފި އެވެ.

މި ބަދަލާ އެކު، ޑީސަލް ލީޓަރެއް މިއަދުން ފެށިގެން ވިއްކާނީ 10.89ރ. އަށް ކަމަށް އެސްޓީއޯ އިން ބުންޏެވެ.

އެ ކުންފުނިން ވަނީ މިދިޔަ އަހަރުގެ ތެރޭގައި ތިން ފަހަރެއްގެ މަތިން ޑީސަލްގެ އަގު ހެޔޮކޮށްފަ އެވެ. އަދި މިއީ މި އަހަރުގެ ތެރޭގައި ޑީސަލްގެ އަގު ހެޔޮކުރި ފުރަތަމަ ފަހަރެވެ.

އެސްޓީއޯ އިން ބުނީ، ސައޫދީ އަރަބިއްޔާގައި ތެޔޮ އުފައްދާ މަރުކަޒަށް މިދިޔަ އަހަރު ދިން ހަމަލާ އާއި މެދުއިރުމަތީގެ ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލުނު ނަމަވެސް ރާއްޖޭގެ ބާޒާރުގައި ތެލުގެ އަގަށް ބަދަލެއް ނުގެނެސް އެ ކުންފުނިން އެއްވަރެއްގައި ހިފެހެއްޓި ކަމަށެވެ.

އެސްޓީއޯގެ ސީއީއޯ އަދި މެނޭޖިން ޑިރެކްޓަރު ހުސައިން އަމްރުއާ ހަވާލާދީ، އެ ކުންފުނިން ނެރުނު ޅަބަރެއްގައި ބުނިގޮތުގައި، ތެލުގެ ބާވަތްތައް ހެޔޮ އަގެއްގައި، މެދުކެނޑުމެއް ނެތި ރާއްޖޭގެ ބާޒާރުން ފޯރުކޮށްދިނުމަކީ ކުންފުނީގެ މައިގަނޑު އަމާޒެވެ.

އެސްޓީއޯ އިން ވިއްކާ ޕެޓްރޯލްގެ އަގަށް މި ފަހަރު ބަދަލެއް ނުގެނެ އެވެ. ޕެޓްރޯލް ލީޓަރެއް މިހާރު ވިއްކަނީ 10.13ރ. އަށެވެ.

އެސްޓީއޯ އިން ވިއްކާ ޕެޓްރޯލްގެ އަގު އެންމެ ފަހުން ހެޔޮކުރީ މިދިޔަ އަހަރުގެ ޖުލައި 15ގަ އެވެ.