އިތުރު މައްސަލަތަކެއްގެ ތަހުގީގަށް ޔާމީން ހާޒިރުކުރަނީ

25 ފެބުރުއަރީ 2020

އިތުރު މައްސަލަތަކެއްގެ ތަހުގީގަށް ކުރީގެ ރައީސް އަބްދުﷲ ޔާމީން ހާޒިރުވާން ފުލުހުން އިއްޔެ އަންގާފައިވާ ކަމަށް އެމަނިކުފާނުގެ ވަކީލުންގެ ޓީމުގައި ހިމެނިވަޑައިގަންނަވާ ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު މިއަދު ވިދާޅުވެއްޖެ އެވެ.

މުއިއްޒު އިބްރާހިމް

މަނީ ލޯންޑްރިންގެ ކުށުގައި ޔާމީން ފަސް އަހަރަށް ޖަލަށްލުމަށާއި ފަސް މިލިއަން ޑޮލަރުން ޖޫރިމަނާ ކުރަން ކްރިމިނަލް ކޯޓުން ވަނީ ހުކުމްކޮށްފަ އެވެ. އެ ހުކުމް އިސްތިއުނާފް ކުރަން އެމަނިކުފާނުގެ ފަރާތްޕުޅުން ހުށަހެޅުއްވުމުން އެ މައްސަލައިގެ އަޑުއެހުންތައް ހައި ކޯޓުން މިހާރު ވަނީ ފަށައިފަ އެވެ.

ޖަމީލް ކުރެއްވި ޓްވީޓެއްގައި ވިދާޅުވީ، ޔާމީނަށް ކުރި ދައުވާ އަކީ ގާނޫނީ ބުރަދަނެއް ނެތް ސިޔާސީ ދައުވާއެއް ކަން އިސްތިއުނާފްގެ މައްސަލައިގެ ތެރެއިން ހާމަވާން ފެށުމުން އިތުރު މައްސަލަތަކެއްގެ ތަހުގީގަށް ޔާމީން ހާޒިރުވާން ފުލުހުން އިއްޔެ އަންގާފައިވާ ކަމަށެވެ. އަދި މި ސަރުކާރަށް އަހަރެއް ވީއިރު ވެސް އެއްވެސް ކަމެއް ނުވެ، ފެއިލްވުމުން ޔާމީން ދެކެ ހިތްހަމަނުޖެހެން ޖެހޭ ސަބަބެއް ނެތް ކަމަށް ޖަމީލްގެ ޓްވީޓްގައިވެ އެވެ.

އެކަމަކު، ޔާމީން ފުލުހަށް ހާޒިރު ކުރަނީ ކޮން މައްސަލައަކާ ގުޅިގެން ކަމެއް އަދި ހާޒިރު ކުރަނީ ކޮން ވަގުތަކު ކަމެއް ޖަމީލް ހާމައެއް ނުކުރައްވަ އެވެ.

Raees Yameen ge isthiunaafu ge therein Dhauvaa akee Qaanoonee buradhaneh nei siyaasee Dhauvaa eykan qaaim vumun,ithuru kanthah thakakah thahqeeqah haaziruvumah fuluhun iyye angaifi.@ibusolih ahareh veeiru kameh nuve fail vumun,RY dheke koafaa vaane kameh nei.Thikan nimeyne IA. pic.twitter.com/WwTPpZKVVd
— Mohamed Jameel Ahmed (@MJameelAhmed) February 25, 2020

ޖަމީލްގެ ޓްވީޓް

ޔާމީންގެ އިސްތިއުނާފް މައްސަލަ ނިމެންދެން އެމަނިކުފާނު ކަފާލާތުގެ ދަށުން މިނިވަން ކޮށްދޭން ހައި ކޯޓުގައި އެދުނަސް، އެ ކޯޓުން ވަނީ އެފަދަ އަމުރެއް ނެރެދެވެން ނެތް ކަމަށް ނިންމައިފަ އެވެ. އަދި އެ ނިންމުން މުރާޖާ ކުރަން ޔާމީންގެ ފަރާތްޕުޅުން ހައި ކޯޓުގައި އެދުމުން އެ ނިންމުން މުރާޖާ ކުރަންޖެހޭ ސަބަބެއް ނެތް ކަމަށް ވެސް އެ ކޯޓުން އިއްޔެ ވަނީ ނިންމައިފަ އެވެ.

Comments