ޓްރަމްޕް މަސައްކަތް ކުރައްވަނީ ގައުމު ބައިބައި ކުރަން: މަޓިސް

ވޮޝިންޓަން (ޖޫން 4) - އެމެރިކާގެ ކަޅު ނަސްލުގެ މީހެއް ކަމަށްވާ ޖޯޖް ފްލޮއިޑް ފުލުހުން ހައްޔަރު ކުރަން އުޅުމުގެ ތެރޭގައި އޭނާ މަރާލާފައިވާތީ މުޅި އެމެރިކާގައި ފަށާފައިވާ މުޒާހަރާތައް ހުއްޓުވުމުގައި ރައީސް ޑޮނަލްޑް ޓްރަމްޕް އަޅުއްވާ ފިޔަވަޅުތަކަކީ ގައުމު ބައިބައި ކުރުން ކަމަށް ކުރީގެ ޑިފެންސް މިނިސްޓަރު ޖޭމްސް މަޓިސް ވިދާޅުވެއްޖެ އެވެ.

މަޓިސް އިއްޔެ ވިދާޅުވީ ރައީސްއާ ނުލައި އެމެރިކާގެ ރައްޔިތުން އެކަތިގަނޑަކަށް ވާންޖެހޭ ކަމަށެވެ.

"އަޅުގަނޑުގެ މުޅި ހަޔާތަށް ބެލި ނަމަވެސް އެމެރިކާގެ ރައްޔިތުންގެ އެއްބައި ވަންތަކަމަށް މަސައްކަތް ނުކުރާ ހަމައެކަނި ރައީސް އަކީ ޑޮނަލްޑް ޓްރަމްޕް،" ޓްރަމްޕުގެ ޑިފެންސް މިނިސްޓަރަކަށް ހުންނެވުމަށް ފަހު 2018 ވަނަ އަހަރު އިސްތިއުފާ ދެއްވި މަޓިސް ވިދާޅުވި އެވެ. "އޭގެ ބަދަލުގައި ޓްރަމްޕް މަސައްކަތް ކުރައްވަނީ ގައުމު ބައިބައި ކުރުމަށް. ތިން އަހަރެއްހާ ދުވަހު ތެރޭ ގަސްދުގައި އެގޮތަށް ކުރި މަސައްކަތުގެ ނަތީޖާ މިހާރު އެ ދަނީ ފެންނަމުން."

މުޒާހަރާތައް ކޮންޓްރޯލް ކުރުމަށް ހަތިޔާރާ އެކު ސިފައިން ނެރޭނެ ކަމަށް ޓްރަމްޕް ވިދާޅުވުމުން ވެސް ގިނަ ބަޔަކު ވަނީ ފާޑުކިޔަން ފަށައިފަ އެވެ.

އަފްޣާނިސްތާނުގައި ތިބޭ އެމެރިކާ ސިފައިންގެ ކުރީގެ ކޮމާންޑަރު ޖޯން އެލަން ވަނީ ވައިޓް ހައުސްގެ ބޭރުގައި މުޒާހަރާ ކުރަމުން ދިޔަ މީހުން ދުރަށް ޖައްސައި ފައްޅިއަކަށް ޓްރަމްޕް ވަޑައިގެންފައިވާތީ ފާޑު ވިދާޅުވެފަ އެވެ.

މުޒާހަރާ ކޮންޓްރޯލް ކުރުމަށް ސިފައިން ނެރުއްވާނެ ކަމަށް ޓްރަމްޕް ވިދާޅުވުމުން މިހާރުގެ ޑިފެންސް މިނިސްޓަރު މާކް އެސްޕާ ވެސް ވަނީ އެކަމާ ދެކޮޅު ހައްދަވައިފަ އެވެ.