އީދު ބަންދުގައި ބޭންކުތައް ހުޅުވާނީ މި މަހުގެ 29 ގައި އެކަނި

ކުރިއަށް އޮތް ބޮޑު އީދު ބަންދުގެ ތެރޭގައި ނުވަތަ މި މަހުގެ ފަހު ހަފުތާގައި މަރުކަޒީ ބޭންކް، އެމްއެމްއޭ އާއި ބޭންކުތަކުން ހިދުމަތް ދޭނީ މި މަހުގެ 29 ގައި އެކަނިި ކަމަށް އެމްއެމްއޭ އިން މިއަދު ކަނޑައަޅައިފި އެވެ.

މި އަހަރުގެ އަޟްހާ އީދާއި މިނިވަން ދުވަސް ދިމާވަނީ އެއް ހަފުތާއަކަށް ކަމަށް ވުމުން، އެ ހަފުތާގެ ތިން ދުވަސް ބަންދުވާނެ ކަމަށް ކަލަންޑަރުގައި ބުނެ އެވެ.

ކަލަންޑަރުގައިވާ ގޮތުން ފަހު ހަފުތާގައި ބަންދުވާނީ މިނިވަން ދުވަސް ކަމަށްވާ މި މަހުގެ 26 އާއި އެ ދުވަހުގެ މުނާސަބަތުގައި ބަންދުކުރާ 27 ވަނަ ދުވަހުގެ އިތުރުން ހައްޖު ދުވަސް ކަމަށްވާ މި މަހުގެ 30 އެވެ. މި މަހުގެ 28، 29 ބަންދު ނޫން ކަމަށް ކަލަންޑަރުގައި އޮތަސް ޖުލައި 26 އާއި ހައްޖާއި އީދު ބަންދު ދުވަސްތައް އެއް ހަފުތާއަކަށް ވުމުން އެ ދެ ދުވަސް ވެސް ރައީސް އިބްރާހިމް މުހައްމަދު ސޯލިހު ވަނީ ބަންދު ކުރައްވައިފަ އެވެ. ކަލަންޑުގައިވާ ގޮތުން ނަމަ އީދު ދުވަހުގެ މުނާސަބަތުގައި އަންނަ އޮގަސްޓް މަހުގެ 1،2،3 ވެސް ބަންދުވާނެ އެވެ.

އެމްއެމްއޭ އިން ނެރުނު އިއުލާނެއްގައި ބުނީ އެ އޮތޯރިޓީން މި މަހުގެ 29 ގައި ބޭންކިންގެ ހިދުމަތް ދޭނީ ހެނދުނު 8:30 ން މެންދުރު 2:00 އަށް ކަމަށެވެ. މި ވަގުތުތަކުގައި ސިޓީއާއި އެހެނިހެން ތަކެތި ބަލައިގަންނާނެ ކަމަށް ވެސް އެމްއެމްއޭ އިން ބުންޏެވެ.