އުރީދޫ އަތޮޅު ދުވުމުގައި މިހާރު އާއްމުންނަށް ވެސް ބައިވެރިވެވޭނެ

ރާއްޖޭގައި ބާއްވާ އެންމެ ފުރަތަމަ ވާޗުއަލް ރަން، "އަތޮޅު ދުވުމުގައި" އާއްމުންނަށް ބައިވެރިވެވޭ ކެޓަގަރީއެއް އުރީދޫން ހިމަނައިފި އެވެ.

މި ދުވުމަކީ ރާއްޖޭގެ 20 އަތޮޅެއްގައި އޮންލައިންކޮށް ކުރިއަށްގެންދާ ދުވުމުކެވެ. އެހެންކަމުން ކޮންމެ ހިސާބެއްގައި ތިބެގެން ވެސް މި ދުވުމުގައި ބައިވެރިވެވޭނެ އެވެ.

އުރީދޫން ވަނީ އަތޮޅު ދުވުން ދެ ކެޓަގަރީއަކަށް ބަހާލައިފަ އެވެ. އެގޮތުން 15 ކިލޯ މީޓަރުގެ ދުވުމުގައި ބައިވެރިވާނީ އެ ކުންފުނިން ޕްރީ ރެޖިސްޓާ ކޮށްފައިވާ 20 ދުވުންތެރިންނެވެ. ނަމަވެސް ފަސް ކިލޯމީޓަރުގެ ދުވުމުގައި ކޮންމެ މީހަކަށް ވެސް ބައިވެރިވެވޭނެ ކަމަށް އުރީދޫން ބުންޏެވެ.

މި މަހުގެ 28 ގައި ބާއްވާ މި ދުވުމުގައި ބައިވެރިވުމުގެ ފުރުސަތު ވަރަށް އަވަހަށް ހުޅުވާލާނެ އެވެ. މި ދުވުން ބާއްވާނީ 28 ވަނަ ދުވަހުގެ ރޭ 12 އިން އިން 29 ވަނަ ދުވަހުގެ ރޭ 12އާ ހަމައަށެވެ.

ދުވުމުގައި ބައިވެރިވާން ރަޖިސްޓްރީ ކުރާ ކޮންމެ ބައިވެރިއަކަށް ވެސް ބޭނުންވާ ރަށެއް ސެލެކްޓު ކުރެވޭނެ އެވެ. އަދި ދުވުން ފުރިހަމަ ކުރުމަށްފަހު، ފޯނުން މެޕުގެ ސްކްރީންނޝޮޓް ނެގުމަށްފަހު އުރީދޫން ދޭ ލިންކަކަނަށް އެ ފޮޓޯ ލާން ޖެހޭނެ އެވެ. މި ފޮޓޯ ލުމުން ވާޗުއަލް މެޑައްޔެއް ކޮންމެ ދުވުންތެރިއަކަށް ވެސް ލިިބޭނެ އެވެ.

މިއީ، ދިވެހިންނާ އެކު ކާމިޔާބު 15 އަހަރު ފުރިހަމަކުރުމުގެ އުފަލުގައި ކުރިއަށްގެންދާ ހަރަކާތްތަކުގެ ތެރެއިން ހާއްސަ އިވެންޓެއް ކަމަށް އުރީދޫން ބުންޏެވެ. އެގޮތުން އެ ކުންފުނީގެ ޗީފް ކޮމާޝަލް އޮފިސަރު ހުސެއިން ނިޔާޒް ވިދާޅުވީ، އަތޮޅު ރަންގެ މައިގަނޑު މަގްސަދަކީ ކުޅިވަރު މެދުވެރިކޮށް އެކުވެރިކަމާއި އެއްބައިވަންތަކަމުގެ ރޫހު ދައްކައިދިނުން ކަމަށެވެ.

"މި ދަނޑިވަޅުގެ ގޮތުން އަޅުގަނޑުމެން މި ރަން ވާޗުއަލް ރަންއެއް ގޮތުގައި ރާވާފައި މިވަނީ ގައިދުރުކަމުގެ މުހިންމުކަމަށް ވެސް ވަރަށް ބޮޑު އިސްކަމެއްދީގެން. އަތޮޅު ރަންއަކީ ފާއިތުވީ އަހަރުތަކުގައި އުރީދޫން ރާއްޖޭގެ އެކި ކަންކޮޅުތަކުގައި ތިބި ރައްޔިތުން ޑިޖިޓަލްކޮށް ގުޅުވާލަދިނުމުގައި ކުރެވިފައިވާ މަސައްކަތުގެ ރަމްޒެއް،" އޭނާ ވިދާޅުވި އެވެ.

އަތޮޅު ދުވުން ކުރިއަށްދާ އިރު ސޯޝަލް މީޑިއާ މެދުވެރިކޮށް ދުވުމުގެ ލައިވް ފޮޓޯ އާއި ވީޑިއޯތައް ފެންނާނެ އެވެ. މި ދުވުން ވެގެންދާނީ ރާއްޖޭގެ އެކި ސަރަހައްދުތަކުގެ ހިތްގައިމު ރީތި މަންޒަރުތައް ވެސް ދައްކުވައިދޭނެ ދުވުމަކަށެވެ.

މި ދުވުމުގައި ބައިވެރިވާ ހުރިހާ ދުވުންތެރިން ވެސް އެޗްޕީއޭގެ ލަފަޔާ އެއްގޮތަށް ދުވުމަށް އުރީދޫން އިލްތިމާސް ކުރެ އެވެ.