ތިން ކުޅި އާއި އައްޑޫގެ ކުޑަކަނޑު ހިމާޔަތްކޮށްފި

ތިމާވެށި ރައްކާތެރިކޮށް ދެެމެހެއްޓުމާ ބެހޭ ގާނޫނުގެ ދަށުން، އައްޑޫގެ ހަތަރު ސަރަހައްދެއް ހިމާޔަތްކޮށްފި އެވެ.

އެންވަޔަރަމެންޓް މިނިސްޓްރީން މިއަދު އާއްމު ކުރި އިއުލާނެއްގައި ބުނީ އައްޑޫގެ ކުޑަ ކަނޑު ސަރަހައްދާއި މާކިޅި އާއި ފެހެލެ ކިޅި ސަރަހައްދާއި މާފިށި ކިޅި ސަރަަހައްދާއި މަތިކިޅި ސަރަހައްދު، މިއަދުން ފެށިގެން ހިމާޔަތްކޮށްފައިވާ ކަމަށެވެ.

ހިމާޔަތްކުރި ތަންތަނުގައި ހިމެނޭ ކުޑަކަނޑު ސަރަހައްދަކީ ގަލާއި މުރަކަ ގިނަ، އަދި އެކި މަހުގެ ބާވަތްތަކާއި ދިރުންތައް ގިނަ، ގުދުރަތީގޮތުން މުއްސަނދިތަނެކެވެ. ނެތިދިޔުމުގެ ބިރު ހީވެފައިވާ ވެލަ އާއި ވައިފިޔަ މަޑި އަދި ކޯމަސް މި ސަރަހައްދުގައި ގިނަ އެވެ. ކުޑަކަނޑު ސަރަހައްދު ހިމާޔަތް ކުރުމުގެ އެއް ބޭނުމަކީ ވެސް މި ދިރުންތަކަށް ރައްކާތެރިކަން ހޯދައިދިނުމެވެ.

މާކިޅި އާއި ފެހެލި ކިޅި އަކީ ހިތަދޫ އިރުދެކުނު ފަރާތުގައި އޮންނަ ޗަސްބިމުގައި ހެދިފައިވާ ދެ ކުޅި އެވެ. ރަށަށް ވެހޭ ފެން، މި ސަރަހައްދަށް ފަސޭހަ ކަމާއެކު ހިނދިގެން ދިޔުމުގެ ސަބަބުން މިއީ ރަށުގައި ފެންބޮޑުވުމުގެ ފުރުސަތު ކުޑަކޮށްދޭ ދެ ތަނެވެ. އަދި މި ތަން، ދަނޑުވެރިކަމަށް ވެސް ބައެއް މީހުން ބޭނުން ކުރެ އެވެ. ނީލޯފަރު ނުވަތަ ލޮޓަސް ގިނައިން ފެންނަ މި ކުޅިތަކަކީ މޫސުމީ ދޫންޏާއި ހިމާޔަތްކޮށްފައިވާ ދޫނިތަކުގެ ގެ އެވެ.

ހުޅުދޫ ދެކުނު ފަރާތުކޮޅުގައި އޮންނަ ޗަސްބިންކުޅި، މާފިށި ކިޅި އަކީ ވެސް ވިއްސާރައިގައި ރަށަށް ރައްކާތެރިކަން ގެނެސްދޭ ތަނެކެވެ. ކުރެއްްޖާއި ހިރުނދައި ދިއްގާ އަދި ބޯކަށިކޭލާއި މިދިލި ގަސް މިތަނުގައި ގިނައިން ހުންނައިރު، ގިނަ އަދަދެއްގެ ދޫނި ވެސް މި ކުޅިން ފެނެ އެވެ.

ހިމާޔަތްކޮށްފައިވާ ކުޑަކަނޑުން މުރަކަ އާއި ގާ ނެގުމާއި މަސް ހިފުމަކީ މަނާ ކަމެކެވެ. އަދި ކުޅިތަކުން، ދޫނި ހިފުމާއި އެ ދިރުންތަކަށް ގެއްލުން ދިނުމާއި ކުނި އެޅުމަކީ މަނާ ކަމެކެވެ.

މި ތަންތަން ބެލެހެއްޓުމުގައި ދެން އަމަލު ކުރާނީ، އިއުލާނުގައިވާ ގޮތުން، ގުދުރަތީ ނުވަތަ ތަބީއީގޮތުގައި ރައްކާތެރިކޮށް ދަމަހައްޓާ ތަންތަނާ ބެހޭ ގަވައިދުގައިވާ ގޮތަށެވެ.