ހަތިޔާރާ އެކު އެމްއެންޑީއެފުން ހާއްސަ ތަމްރީނުތަކެއް ބާއްވަނީ

ހުޅުމާލޭގަ އާއި ކ. ގިރިފުށީގައި އެމްއެންޑީއެފް އިން ހާއްސަ އަސްކަރީ ތަމްރީންތަކެއް އަންނަ ހަފްތާގައި ބާއްވަން ތައްޔާރުވެއްޖެ އެވެ.

ޑިފެންސް މިނިސްޓްރީން މިއަދު ކުރި އިއުލާންތަކެއްގައި ބުނީ ގިރިފުށީގައި ތަމްރީނުތައް ބާއްވާނީ އަންނަ އާދިއްތަ ދުވަހުން ފެށިގެން ބުދަ ދުވަހާ ހަމައަށް ކަމަށެވެ. އަދި ހުޅުމާލޭގެ ދެވަނަ ފިޔަވަހީގައި ހަރަކާތްތައް ކުރިއަށް ގެންދާނީ އާދިއްތަ ދުވަހުން ފެށިގެން އަންގާރަ ދުވަހުގެ ނިޔަލަށް ކަމަށެވެ.

ހުޅުމާލޭގައި ތަމްރީނުތައް ކުރިއަށް ގެންދާނެ ވަކި ވަގުތެއް މިނިސްޓްރީން އާންމެއް ނުކުރެ އެވެ. ނަމަވެސް ގިރިފުށީގައި ބާއްވާ ތަމްރީނުތައް، އާދިއްތަ ދުވަހު ކުރިއަށް ގެންދާނީ އިރުއޮއްސި 6:00 އިން ފެށިގެން ރޭގަނޑު 11:00 އާ ހަމައަށެވެ. އެހެން ދުވަސްތަކުގައި އެ ރަށުގައި ކުރިއަށް ގެންދާ ތަމްރީނުތައް ރޭގަނޑު 9:00 ގައި ނިންމާލާނެ ކަމަށް މިނިސްޓްރީން ބުންޏެވެ.

މިނިސްޓްރީން ބުނީ މި ތަމްރީންތަކުގައި ހަތިޔާރާއި ގޮވާ ތަކެތި ބޭނުންކުރާނެ ކަމަށެވެ. ގިރިފުށީގައި ކުރިއަށް ގެންދާ ތަމްރީނުތަކުގައި ކަނޑާއި ވައިގެ ތެރޭގައި ގޮވާތަކެތި ބޭނުންކުރާނެ ކަމަށް ބުންޏެވެ.