މިޔަރު ހިމާޔަތްކުރާ ޖަމާއަތަކުން މުސްތޮފާއާ ދެކޮޅަށް އަޑުއުފުލަނީ

މިޔަރުމަހާއި މިޔަރު އުރަހަ އެކްސްޕޯޓްކުރެވެން ޖެހޭނެ ކަމަށް ވިދާޅުވެ ފާޅުގައި ވަކާލާތުކުރައްވާތީ ތިމަރަފުށީ ދާއިރާގެ ކުރީގެ މެމްބަރު މުހައްމަދު މުސްތޮފާއާ ދެކޮޅަށް އިނގިރޭސިވިލާތުގެ ޖަމިއްޔާއަކުން އަޑު އުފުލަން ފަަށައިފި އެވެ.

"ޝާކް ގާޑިއަން" ނަމަކަށް ކިޔާ ޖަމާއަތުން މިއަދު ކުރި ޓްވީޓެއްގައި ބުނީ ރާއްޖެއިން ބޭރުކުރަން އުޅުނު 429 ކިލޯގެ މިޔަރު އުރަހަ މިދިޔަ ހަފްތާގައި އަތުލައިގެންފައިވާ ކަަމަށާއި މުސްތޮފާ ގެންދަވަނީ މިޔަރުގެ އުފެއްދުންތައް ވިއްކުމަށް ޓަކައި އިޝްތިހާރު ކުރައްވަމުން ކަމަށެވެ. އެގޮތަށް އިޝްތިހާރުކުރައްވަނީ ފާޅުގައި ކަމަށާއި ގާނޫނީ އެއްވެސް މައްސަލައެއް އެކަމުން ކުރިމަތިވެދާނެކަމުގެ ބިރެއް ވެސް ނެތް ކަަމަށް ޝާކް ގާޑިއަންގެ ޓްވީޓްގައި ބުންޏެވެ.

"އެހެންވީމާ އޭނާގެ އެ އަމަލަށް ޒިންމާދާރުކުރުވަމާ ހިނގާ،" ޝާކް ގާޑިއަންގެ ޓްވީޓްގައި ގޮވާލި އެވެ.

އެއާ އެކު ޓްވީޓުގައި ހިމަނާފައި ވަނީ މިޔަރު އުރަހަ އާއި މަސް އަދި ކަށިމިޔަރު ތެޔޮ ގަންނަ އަގުތަކަކާ އެކު މުސްތޮފާ ކުރައްވާފައިވާ ޓްވީޓެއްގެ ސްކްްރީންޝޮޓަކާއި އޭނާ ޒިންމާދާރުކުރުވުމަށް ޓަކައި ކުރަންވީ ކަންތައްތަކެކެވެ. އެގޮތުން ރައީސް އޮފީސް ހިމެނޭ ގޮތުން ރާއްޖޭގެ އިދާރާތަކަށް އީމެއިލްކުރުމަށާއި ޓްވީޓްކުރުމަށް ގޮވާލައި، އެތަންތަނުގެ އީމެއިލް އެޑްރެސްތަކާއި ޓްވިޓާއެކައުންޓްގެ މައުލޫމާތު ޓްވީޓްގައި ހިމަނާފައި ވެ އެވެ.

ޝާކް ގާޑިއަންގެ ގޮވައިލުންތަކާ ގުޅޭ ގޮތުން މުސްތޮފާ "މިހާރު" އަށް މިއަދު ވިދާޅުވީ އޭނާ ދައްކަވަނީ ރާއްޖޭގެ އެތެރެވަރިން މިޔަރު ހިފުން ހުއްދަކުރަން ޖެހޭ ވާހަކަ ނޫން ކަަމަށާއި އެއީ އޭނާ ވެސް ދެކޮޅު ހައްދަވާ ކަމެއް ކަމަށެވެ. އެހެން ނަމަވެސް މާކަނޑުތަކުން މިޔަރުގެ މަސްވެރިކަން ކުރުމަކީ ދުނިޔޭގެ އެހެން ގިނަ ގައުމުތަކެއްގައި ވެސް ކުރާ ކަމެއް ކަމަށާއި ރާއްޖޭގައި ވެސް ފުރަތަަމަ އޮތީ އެގޮތް ކަމަށް ވެސް އޭނާ ވިދާޅުވި އެވެ.

"ރައީސް މައުމޫނުގެ ވެރިކަމުގައި ފުރަތަމަ މަނާކުރީ މިޔަރު ހިފުން. އޭރު މަނާކުރީ ރާއްޖޭގެ އެތެރެވަރިން މިޔަރު ހިފުން. އެކަމަކު ފަހުން ޑރ. އިބްރާހީމް ދީދީ ފިޝަރީޒް މިނިސްޓަރަކަށް ހުންނެވި އިރު [އެމްޑީޕީގެ ފުރަތަމަ ވެރިކަމުގައި] މިޔަރު ހިފުން މުޅިން މަނާކޮށްލީ،" މުސްތޮފާ ވިދާޅުވި އެވެ.

މިޔަރުގެ ވިޔަފާރިކުރެވެން ޖެހޭނެކަމަށް ސޯޝަލް މީޑިއާގައި ވަކާލާތު ކުރައްވަނީ މުސްތޮފާ ވިދާޅުވި ގޮތުގައި އެ މަސައްކަތް ކުރަން ބޭނުންވާ މަސްވެރިން އެދޭތީ އެވެ. އެގޮތަށް އެދެނީ އެއީ ކުރިން ރަނގަޅު އާމްދަނީއެއް ލިބެމުން އައި ކަމަކަށް ވާތީ ކަމަށް ވެސް ވިދާޅުވި އެވެ.

"އަޅުގަނޑަކީ ކުރިން އެ ބާވަތްތައް އެކްސްޕޯޓްކުރި މީހެއް. އެހެންވީމާ މީހުން އަޅުގަނޑު ގާތު އެ ވާހަކަ ދައްކާ،" މުސްތޮފާ ވިދާޅުވި އެވެ.

އޭވިއޭޝަން ސެކިއުރިޓީ ކޮމާންޑާއި ކަސްޓަމްސް ގުޅިގެން މިދިޔަ ހަފްތާގައި އަތުލައިގަތް މިޔަރު އުރަހަތައް ފޮރުވާފައި ހުރީ ލޮނުމަސްތަކެއްގެ ތެރޭގައި ބަންދުކޮށްފަ އެވެ. އެ މައްސަލައިގެ ތަހުގީގު އަދި ދަނީ ކުރިއަށެވެ. މިޔަރު ހިފުމާއި މިޔަރުގެ އެއްވެސް އުފެއްދުމެއް އެކްސްޕޯޓްކުރުމަކީ ވެސް ރާއްޖޭގައި މަނާކަމެކެވެ.