އުސޫލުތަކާ އެއްގޮތަށް އަމަލުކުރަން އިމާމުންނަށް އަންގައިފި

ކޮވިޑް-19 އިން ރައްކާތެރިވާން މިސްކިތްތަކުން އަޅަންޖެހޭ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކަނޑައަޅާފައިވާ ފިޔަވަޅުތަކަށް އަމަލުކުރަން ބާރުއަޅަން އިމާމުންނަށް އިސްލާމިކް މިނިސްޓްރީން އަންގައިފި އެވެ.

މިނިސްޓްރީން ބުނީ މި ދުވަސްވަރު މިސްކިތްތަކަށްދާ މީހުން، އެޗްޕީއޭގެ ގައިޑްލައިންއާ އެއްގޮތަށް އަމަލުކުރަން ނަސޭހަތްތެރިވާން އިމާމުންނަށް އަންގާފައިވާ ކަމަށެވެ. އޭގެ ތެރޭގައި މިސްކިތަށް ދާ އިރު މާސްކު އަޅާށާއި އަމިއްލަ މުސައްލައެއް ހިފައިގެން ދިއުން ހިމެނެ އެވެ.

މިސްކިތްތަކުގައި ނަމާދުކުރާ އިރު ގައިދުރުކަން ބަހައްޓަން ޖެހޭނެ ކަމަށް ވެސް އެޗްޕީއޭ އިން ވަނީ އަންގައިފަ އެވެ. އަދި ގެއިން ވުޟޫ ކޮށްގެން މިސްކިތަށް ދާން ވެސް އަންގާފައިވި ނަމަވެސް އެ އުސޫލްތަކާ އެއްގޮޮތަށް ބައެއް މީހުން އަމަލުނުކުރާ ތަން ފެންނަ ކަމަށް މިނިސްޓްރީން ބުނެ އެވެ.

މީގެ އިތުރުން އެޗްޕީއޭއާ ގުޅިގެން އިމާމުންނަށް ވެކްސިންދިނުމުގެ ޕްރޮގްރާމެއް ކުރިއަށް ގެންދަން ނިންމާފައިވާ ކަމަށް ވެސް އިސްލާމިކް މިނިސްޓްރީން ބުނެ އެވެ.

މިހާތަނަށް 16،565 މީހަކަށް ރާއްޖެއިން ކޮވިޑް ޖެހިފައިވާ އިިރު، މި ވަގުތު މި ބައްޔަށް ފަރުވާ ހޯދަމުން އަންނަނީ 2،039 މީހުންނެވެ. އަދި 6،000 އަށް ވުރެ ގިނަ މީހުންނަށް ވެކްސިން ޖަހާފައި ވެ އެވެ.