އިގްތިސާދު ކުރިއަރުވަން ޓެކްނޮލޮޖީ މުހިންމު: ވޯލްޑް ބޭންކް

އިގްތިސާދު ކުރި އަރުވަން ރާއްޖޭގައި ޑިޖިޓަލް ޓެކްނޮލޮޖީ ކުރިއަރުވަން ޖެހޭ ކަމަށް ވޯލްޑް ބޭންކުން ބުނެފި އެވެ.

ވޯލްޑް ބޭންކުން ނެރުނު މޯލްޑިވްސް ޑިވެލޮޕްމެންޓް އަޕްޑޭޓް ރިޕޯޓުގައި ބުނެފައިވަނީ ރާއްޖޭގެ އިގްތިސާދު މިހާރު އޮތީ ރަނގަޅު ހާލަތަކަށް އަނބުރާ އައުމުގެ މަގުމަތީގައި ކަމަށެވެ. ކާމިޔާބު މާކެޓިން ކެމްޕެއިންތަކާއި ފަސޭހަކަމާ އެކު ޓޫރިސްޓުން ރާއްޖެ އެތެރެވެވޭ ގޮތަށް އިންތިޒާމްތައް ރާވާފައި އޮތުމުގެ ސަބަބުން، މި އަހަރުގެ ފުރަތަމަ ކުއާޓަރުގައި ރާއްޖެ އަށް ގާތްގަނޑަކަށް 300،000 ޓޫރިސްޓުން ޒިޔާރަތްކޮށްފައިވެ އެވެ. މި އަހަރު އެއް މިލިއަން ޓޫރިސްޓުން ރާއްޖެ ޒިޔާރަތްކުރާނެ ކަމަށް ލަފާކުރާ އިރު ރާއްޖޭގެ އިގްތިސާދު 17.1 ޕަސެންޓުގައި ކުރިއަރާނެ ކަމަށް ވޯލްޑް ބޭންކުން އަންދާޒާކުރެ އެވެ.

ޑިޖިޓަލް ޓެކްނޮލޮޖީތައް ބޭނުންކުރުމުގައި މިހާރު ހުރި މައްސަލަތައް ހައްލުކުރުމަށްޓަކައި ސިޔާސަތު ބައްޓަންކުރުމުގަ އާއި ގާނޫނީ ގޮތުން ހުރި ގޮންޖެހުންތަކަށް ހައްލެއް ހޯދަންޖެހެ އެވެ. ހަމަ އެއާއެކު، ޑިޖިޓަލް ދުނިޔެއަކަށް ބަދަލުވަމުންދާ މި ދަނޑިވަޅުގައި ހުރިހާ ދިވެހިންނަށް ވެސް ޓެކްނޮލޮޖީގެ އާ ވަސީލަތްތަކުގެ ބޭނުން އެންމެ ރަނގަޅު ގޮތުގައި ހިފޭނެ ގޮތް ފަހިކޮށްދިނުމަށްޓަކައި ދިވެހިންގެ ގާބިލްކަމާއި ހުނަރު އިތުރުކުރަން ވެސް ޖެހޭ ކަމަށް ވޯލްޑް ބޭންކުން ބުނެފައިވެ އެވެ.

ވޯލްޑް ބޭންކުން ރާއްޖެ އާއި ލަންކާ އަދި ނޭޕާލް އަށް ކަނޑައަޅާފައި ހުންނަވާ ކަންޓްރީ ޑިރެކްޓަރު ފާރިސް ހަދާދު ޒާވޮސް ވިދާޅުވީ ރައްކާތެރި ގޮތެއްގައި ޓޫރިޒަމް ހުޅުވުމާލުމަކީ ކުރެވިދާނެ ކަމެއް ކަމަށް ސަރުކާރުން ދައްކާފައިވާ ކަމަށެވެ.

"ރާއްޖޭގެ މާލީ ހާލަތު ހަމައަކަށް އެޅުވުމަށް ކުރެވޭ މަސައްކަތްތަކާ އެކު، އެންމެ މަތީ ފަންތީގެ ޓޫރިޒަމް މަންޒިލެއްގެ ގޮތުގައި ރާއްޖެ އިން ދަމަހައްޓަމުން އަންނަ މަގާމާއި ޓޫރިޒަމް ދާއިރާގައި ކުރަމުން އަންނަ އިންވެސްޓްމަންޓްތަކުގެ ސަބަބުން، މެދު ރާސްތާގައި ރާއްޖޭގެ އިގްތިސާދީ ކުރިއެރުން ރަނގަޅުވާނެ ކަމަށް ލަފާކުރެވޭ،" އޭނާ ވިދާޅުވި އެވެ.

ކޮވިޑް-19އާ އެކު ކުރިމަތިވި އުނދަގޫ ހާލަތުން އަރައިގަތުމުގެ މަސައްކަތް ކުރަމުން އަންނައިރު، މާލީ އަދި ދަރަނީގެ ގޮންޖެހުންތައް ހައްލުކުރުމުގެ މުހިންމުކަން ބޮޑު ކަމަށް ވޯލްޑް ބޭންކުން ބުނެފައިވެ އެވެ. މިދިޔަ އަހަރު ރާއްޖޭގެ ފިސްކަލް ޑެފިސިޓް ގާތްގަނޑަކަށް 900 މިލިއަން ޑޮލަރު ނުވަތަ އެ އަހަރުގެ ލަފާކުރެވޭ ޖީޑީޕީގެ ނިސްބަތުން 20 ޕަސެންޓަށް އަރާފައިވެ އެވެ. ޖުމްލަ އަދި ގެރެންޓީ ދީގެން ނަގާފައިވާ ދަރަނި 5.6 ބިލިއަން ޑޮލަރު ނުވަތަ ޖީޑީޕީގެ ނިސްބަތުން 140 ޕަސެންޓަށް އަރާފައިވެ އެވެ.

މޯލްޑިވްސް ޑިވެލޮޕްމަންޓް އަޕްޑޭޓް އަކީ ރާއްޖޭގެ އިގްތިސާދީ ހާލަތާއި ކުރިއަށް ލަފާކުރެވޭ ގޮތުގެ އިތުރުން، ތަރައްގީ އަށް ހުރި ގޮންޖެހުންތައް ހިމަނައިގެން ވޯލްޑް ބޭންކުން އެކުލަވާލައި އާއްމުކުރާ ރިޕޯޓެކެވެ.