ވަރުގަދަ ކުޅުމަކަށް ފަހު ލީގު ޗެމްޕިއަންކަން ސިފައިން ހޯދައިފި

އުއްމީދީ ކުޅުންތެރިޔާ އާދަމް ނަސީމުގެ މޮޅު ކުޅުމާ އެކު، ވަރުގަދަ މޯލްޑިވިއަން ސްޕޯޓްސް އެންޑް ރިކްރިއޭޝަން ކްލަބުގެ މައްޗަށް 3-1 ސެޓުން ކުރި ހޯދައި އެލައިޑް އިންޝުއަރެންސް ގައުމީ ވޮލީބޯޅަ ލީގުގެ ޗެމްޕިއަންކަން ދިވެހި ސިފައިންގެ ކްލަބް މިރޭ ހޯދައިފި އެވެ.

ލީގުގެ ފަހުން މެޗުގައި މިރޭ ހޯދި މޮޅާ އެކު ސިފައިން ލީގު ކާމިޔާބުކުރީ ނުވަ މެޗުން 27 ޕޮއިންޓް ހޯދައިގެންނެވެ. މޯލްޑިވިއަން ދެ ވަނަ އަށް ދިޔައިރު އެ ޓީމަށް ލިބިފައިވަނީ 25 ޕޮއިންޓެވެ.

ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މި މެޗުގެ ފުރަތަމަ ސެޓު 25-22 އިން ސިފައިން ކާމިޔާބުކޮށްފައިވަނިކޮށް މޯލްޑިވިއަން ވަނީ ދެ ވަނަ ސެޓު 25-21 އިން ކާމިޔާބުކޮށްފަ އެވެ. ތިން ވަނަ ސެޓު 25-20 އިން ކާމިޔާބުކޮށް ސިފައިން ލީޑު ނެގިއިރު އެ ޓީމު މޮޅުވީ ފަހު ސެޓު ފަސޭހަކަމާ އެކު 25-18 އިން ކާމިޔާބުކޮށްގެންނެވެ.

ފުރަތަމަ ސެޓު ފަށައިގެން މޯލްޑިވިއަން އިން ވަނީ ލީޑު ނަގައިފަ އެވެ. އެކަމަކު ސިފައިން ވަނީ ފަހަތުން އަރައި 8-8 އިން އެއްވަރުކޮށް، ލީޑު ނަގައިފަ އެވެ. ސެޓުގެ ފަހުކޮޅަށް ދިޔައިރު ފެނިގެން ދިޔައީ ވާދަވެރި ކުޅުމެކެވެ. އެކަމަކު ސިފައިންގެ ޓީމުގެ އަހުމަދު އަބްދުލްކަރީމް (ލޯންގޭ) އާއި ޕާކިސްތާނުގެ މުރާދު ޖޭހާންގެ ބްލޮކްތަކުން، މޯލްޑިވިއަންގެ އެޓޭކްތައް ހުއްޓުވަމުން ދިޔައިރު ޖުނައިދު އަބްދުﷲ ގެ ބާރު ޝޮޓާ އެކު 25-22 އިން ސިފައިން ސެޓު ކާމިޔާބުކުރި އެވެ.

ދެ ވަނަ ސެޓުގައި ފުރަތަމަ ލީޑު ނެގީ ސިފައިންގެ ޓީމުންނެވެ. އެކަމަކު އެ ޓީމުގެ ކުޅުންތެރިންނަށް ހެދުނު ބައެއް ގޯސްތަކުގެ ފައިދާ ނަގައި މޯލްޑިވިއަން ކުރިއަށް ޖެހިލި އެވެ. ސިފައިންގެ ޓީމުން އަލުން ހިތްވަރުކޮށް 15-15 އިން އެއްވަރުކުރި ނަމަވެސް ލީޑު ނަގަން ލިބުނު ފުރުސަތުގައި ނެގި ސާވް އަމާޒުވީ ނެޓަށެވެ. އޭގެ ފަހުން މޯލްޑިިއަން އިން އަނެއްކާ ވެސް ލީޑު ނަގައި 25-21 އިން ސެޓު ކާމިޔާބުކޮށް އުއްމީދު އާކުރި އެވެ.

ތިން ވަނަ ސެޓު ފެނިގެން ދިޔައީ ވަރަށް އެއްވަރުކޮށެވެ. ދެ ޓީމުން އެއްވަރަކަށް ޕޮއިންޓް ހޯދަމުން ގޮސް 16-13 އިން ސިފައިން ތަފާތު ބޮޑުކޮށް، އެދިޔަ ގޮތަށް ގޮސް 25-20 އިން ސެޓު ކާމިޔާބުކުރި އެވެ.

މެޗު ކާމިޔާބުކުރަން ސިފައިންނަށް ލިބުނު ފުރުސަތުގައި ހަތަރު ވަނަ ސެޓުގައި އެ ޓީމުގެ ފަރާތުން ފެނިގެން ދިޔައީ ވަރަށް އިތުބާރާ އެކު ކުޅުނުތަނެވެ. އެގޮތުން ސެޓު ފަށައިގެން އެ ޓީމުން ހަމަނޭވާއެއްލީ ފަސް ޕޮއިންޓުގެ ލީޑެއް ނެގުމަށް ފަހު އެވެ. ޕޮއިންޓެއްގެ ފުލުގައި ޕޮއިންޓެއް ހޯދަމުން ގޮސް ތަފާތު ބޮޑުކުރި ނަމަވެސް ފަހުކޮޅު މޯލްޑިވިއަން އިން ތަފާތު ކުޑަކުރި އެވެ. އެކަމަކު ސިފައިން ވަނީ 25-18 ޕޮއިންޓުން މި ސެޓު ކާމިޔާބުކޮށް މެޗު ކާމިޔާބުކޮށްފަ އެވެ.

މުބާރާތުގެ ހުރިހާ ގޮތަކުން އެންމެ މޮޅު ކުޅުންތެރިއާގެ މަގާމް ހޯދީ ފައިނަލް މެޗުގެ ވެސް މޮޅު ކުޅުންތެރިޔާ ސިފައިންގެ ޓީމުގެ އާދަމް ނަސީމެވެ. މިރޭގެ މެޗުގައި މޯލްޑިވިއަން ޓީމަށް އެންމެ ގިނަ ހަމަލާ ފޮނުވާލީ ވެސް މުބާރާތުގެ ގިނަ މެޗުތަކެއްގެ މޮޅު ކުޅުންތެރިއާގެ މަގާމް ހޯދި އާދަމެވެ.

ޑްރީމް ޓީމުގައި ހިމެނުނީ އޭނާގެ އިތުރުން ސިފައިންގެ ޓީމުގެ އަހުމަދު އަނިލް ނަސީރާއި އަހުމަދު އަބްދުލްކަރީމް (ލޯންގޭ) އާއި އިޝާން މުހައްމަދު (ބަޓިސް) އާއި މޯލްޑިވިއަންގެ އަލީ އާމިރު (އައްޔަ) އާއި އިސްމާއިލް ސާޖިދު (ކުޑަކާއްޓޭ) އަދި ސްޓެލްކޯގެ ލިބެރޯ ޖަވާމް އަލީ އެވެ. މުބާރާތުގެ އެންމެ މޮޅު ކޯޗުގެ މަގާމް ހޯދީ ސިފައިންގެ ޓީމުގެ އަހުމަދު އަދީލް (ބޭބެ) އެވެ.

މި މުބާރާތުގެ 21 އަހަރުން ދަށުގެ އެންމެ އުއްމީދީ ކުޅުންތެރިއަކަށް ސްޕޯޓްސް ކްލަބް ސިޓީގެ ހަސަން ރަޒާން ހޮވުނުއިރު އެ އުމުރުފުރާގެ އެންމެ މޮޅު ކުޅުންތެރިއަކީ ސްޓެލްކޯގެ ހަސަން ނިލާމެވެ. އެންމެ މޮޅު ބިދޭސީ ކުޅުންތެރިއާގެ އެވޯޑް ލިބުނީ ޕޮލިސް ކްލަބުގެ މުބާޝިރް ރަޒާ އަށެވެ.

ދެން އޮތީ އާދީއްތަ ދުވަހުގެރޭ ފަށާ ގައުމީ ފިރިހެން ވޮލީބޯޅަ މުބާރާތެވެ. ވާދަކުރަނީ މި ދެ ޓީމުގެ އިތުރުން ލީގުގެ ތިން ވަނަ ޕޮލިހާއި ހަތަރު ވަނަ ސްޓެލްކޯ އެވެ. ފުރަތަމަ ސެމީގައި މޯލްޑިވިއަން އާއި ސިފައިން ކުޅެ މޮޅުވާ ޓީމެއް ފައިނަލަށް ހޮވޭއިރު ބަލިވާ ޓީމެއް ޖެހޭނީ ދެ ވަނަ ސެމީގައި ސްޓެލްކޯ އާއި ޕޮލިސް ކުޅެ މޮޅުވާ ޓީމަކާ އެކު ތިން ވަނަ ސެމީ ކުޅޭށެވެ. ފައިނަލުގެ ފަހު ޖާގަ ލިބޭނީ އެ މެޗުން މޮޅުވާ ޓީމަކަށެވެ.