އުރީދޫގެ ޗީފް ކޮމާޝަލް އޮފިސަރަކަށް ނިޔާޒް

އުރީދޫގެ އެކްޓިން ޗީފް ކޮމާޝަލް އޮފިސަރަކަށް މިހާތަނަށް ހުންނެވި، ހުސައިން ނިޔާޒް އެ ކުންފުނީގެ ޗީފް ކޮމާޝަލް އޮފިސަރަކަށް ބަދަލުކޮށްފި އެވެ.

މީގެ 16 އަހަރު ކުރިން އުރީދޫގައި މަސައްކަތް ކުރައްވަން ފެއްޓެވި ނިޔާޒަކީ އެ ކުންފުނީގެ އެންމެ މުހިންމު އެއް މުވައްޒަފެވެ. އާރްއެންއީ ޓެކްނީޝަނެއްގެ ވަޒީފާ އިން މަސައްކަތް ފެއްޓެވި ނިޔާޒް ވަނީ އުރީދޫގެ މެނޭޖާ ނެޓްވޯކް ޕްލޭނިން އެންޑް އޮޕްޓިމައިޒޭޝަންގެ މަގާމާއި ހެޑް އޮފް ނެޓްވޯކްސް އާއި ހެޑް އޮފް ސޭލްސް އެންޑް ޑިސްޓްރިބިއުޝަންގެ މަގާމު ފުރުއްވައިފަ އެވެ.

އުރީދުއާ ގުޅުމުގެ ކުރިން ނިޔާޒް ވަނީ އެމްއެންޑީއެފްގެ ކޮމިއުނިކޭޝަންސް، އިލެކްޓްރޯނިކްސް އެންޑް އައިޓީ ޑިޕާޓްމަންޓްގައި 12 އަހަރު މަސައްކަތް ކުރައްވައިފަ އެވެ.

އޭނާ ވަނީ ޓެލެކޮމް މެނޭޖްމަންޓުން އެގްޒެކެޓިވް މާސްޓާސް ހާސިލު ކުރައްވައި، ފޯޓް ގޯޑަން ޔުނައިޓެޑް ސްޓޭޓްސް އާމީ އިން އިލެކްޓްރޯނިކްސް އެންޑް ކޮމިއުނިކޭޝަންސްގެ ދާއިރާ އިން ތަމްރީނު ހޯއްދަައިފަ އެވެ.

އުރީދޫން ބުނީ ދިވެހި މުވައްޒަފުން ބިނާކޮށް، ކުންފުނީގެ އެންމެ އިސް މަގާމުތަކަށް ދިވެހިންނަށް ލިބޭ ފުރުސަތުތައް ފަހިކޮށްދިނުމަށް ހާއްސަ އަހައްމިއްޔަތު ކަމެއް ދޭ ކަމަށެވެ.

އުރީދޫގެ މެނޭޖިން ޑިރެކްޓަރު އަދި ޗީފް ފައިނޭންޝަލް އޮފިސަރު ނަޖީބް ޚާން ވިދާޅުވިގޮތުގައި، އެ ކުންފުނީގައި ނިޔާޒް ގިނަ ދުވަސްތަކެއް ހޭދަކުރެއްވި އިރު މަސައްކަތްތައް ފާހަގަކުރެވޭ ކަމަށެވެ.

"ޓެކްނިކަލް އަދި ކޮމާޝަލް ދާއިރާގައި ނިޔާޒަށް ލިބިފައިވާ ގިނަގުނަ ތަޖުރިބާތަކާއެކު، ކުންފުންޏަށް އިތުރު ކުރިއެރުން ހޯދައިދީ، ޑިޖިޓަލް ޓެކްނޮލޮޖީގެ އެހީގައި ދިވެހިރާއްޖޭގެ ރައްޔިތުންގެ ދިރިއުޅުން އިތުރަށް ފާގަތި ކޮށްދިނުމަށް މުހިންމު މަސައްކަތްތަކެއް ކޮށްދޭނެކަން ޔަގީން،" އޭނާ ވިދާޅުވި އެވެ.