ދުވާ ޓްރެކް އަލުން ހަދަން އަންގައިފި، އިތުރު ހަރަދެއް ބަޖެޓަކުން ނުކުރާނެ

މާލޭގެ ރަސްފަންނު ސަރަހައްދުން ފެށިގެން ސުނާމީ ބިނާ މައިޒާންއާ ހަމައަށް ދުވަން ތައްޔާރުކުރި ޓްރެކް ރަނގަޅު ފެންވަރަކަށް އަލުން ހެދުމަށް، އެ މަސައްކަތް ކުރި ކުންފުންޏަށް ހައުސިން މިނިސްޓްރީން އަންގައިފި އެވެ. އެކަމަކު ޓްރެކް އަލުން ހަދާއިރު، ސަރުކާރުގެ ބަޖެޓުން އިތުރު ހަރަދެއް އެކަމަށް ނުކުރާނެ ކަމަށް އެ މިނިސްޓްރީން މިއަދު ބުންޏެވެ.

ސިންގަޕޫރުގެ ކުންފުންޏަކާ ހަވާލުކޮށްގެން މިދިޔަ އޭޕްރީލް މަހު މަސައްކަތް ފެށި ޓްރެކުގެ މަސައްކަތް ނުނިމެނީސް އެތަން އޮތީ ވަރަށް ބޮޑަށް ހަލާކުވެފަ އެވެ. އެ ޓްރެކުގައި އަޅާފައިވާ ސިންތެޓިކް ރަބަރު ވެސް ވަނީ ނެއްޓިފަ އެވެ.

ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ ޓްރެކް ނިންމާފައި ވަނީ މިނިސްޓްރީން ބޭނުންވި ފެންވަރަކަށް ނޫން ކަމަށެވެ. އެހެންވެ އެ މަސައްކަތް އަލުން ކުރަން އެދިފައިވާ ކަމަށާއި މަސައްކަތް ދެން ނިމޭއިރު ޓްރެކް ހުންނާނީ ރަނގަޅު ފެންވަރަކަށް ކަމަށް ގަބޫލުކުރައްވާ ކަމަށް ވިދާޅުވި އެވެ.

ސިންގަޕޫރުގެ ކުންފުންޏަކާ ހަވާލުކޮށްގެން މިދިޔަ އެޕްރީލް މަހު ޓްރެކް މަސައްކަތް ފެށީ ޖެހިގެން އައި މެއި މަހު ނިންމުމަށެވެ. އެކަމަކު ޓްރެކް ހަނިކަމުން ފަހުން ވަނީ ފުޅާކޮށްފަ އެވެ. ދިގުމިނުގައި 700 މީޓަރު ހުރި އެ ޓްރެކް އަލުން ތަޅާލައި، ފުޅާކުރީ މަސައްކަތް ނިމެން ކައިރިވެފައި އޮއްވަ އެވެ.