ޝަލަބީ، ޝިފާ، ޓޯއީ، ޑެވިން ބައިވެރިވާ ހާއްސަ ޝޯއެއް މިރޭ އައްޑޫގައި

މަޝްހޫރު ދިވެހި ލަވަކިޔުންތެރިން ބައިވެރިވާ ހާއްސަ ސްޓޭޖް ޝޯއެއް މިރޭ އައްޑޫގައި ބާއްވަން ނިންމައިފި އެވެ.

"ދޮންއުނބަރާ ނައިޓް" ގެ ނަމުގައި މިރޭ 8:30 ގައި ބާއްވާ މި ޝޯ އޮންނާނީ އައްޑޫ ބޮމަ ފަންނުގަ އެވެ. އަދި މި ޝޯގައި މަޝްހޫރު ލަވަކިޔުންތެރިން ކަމަށްވާ ޝަލަބީ އާއި އޭނާގެ އަންހެނުން ޝިފާ އިބްރާހީމް ވެސް ބައިވެރިވާނެ އެވެ.

ރެޕް ލަވަކިޔުންތެރިން ކަމަށްވާ މުހައްމަދު ނަބީލް ނިޔާޒް (ޓޯއީ) އަދި ޑެވިން ވެސް މި ޝޯގައި ބައިވެރިވާނެ އެވެ.

މި ޝޯ އަކީ ހުޅުދޫގެ އަމިއްލަ މީހެއް ކަމަށްވާ އާމިނަތު ޝަހުދާ (ބަހޫ) ގިނަ ދުވަސްތަކަށް ފަހު ރަށަށް އައުމުން ހުޅޫދޫ އާއި މީދޫގެ ރައްޔިތުންނަށް އޭނާގެ އާއިލާގެ ފަރާތުން ދޭ ހަދިޔާއެކެވެ.

"ކޮވިޑްގެ ސަބަބުން ގިނަ ދުވަސްތަކެއް ވަންދެން ރައްޔިތުން ގޭގައި ތިބުމުން، ފޫހިފިލުވާލައި ހިތްހަމަޖައްސާލަން އަޅުގަނޑުގެ އާއިލާގެ ފަރާތުން އިންތިޒާމު ކުރާ ޝޯއެއް މިއީ،" ބަހޫ ބުންޏެވެ.