"އުރީދޫ އަތޮޅު ދުވުން" ފުރިހަމަ ކުރަން އެއް ދުވަސް

މި މަހުގެ އެއްވަނަ ދުވަހު ފެށި "އުރީދޫ އަތޮޅު ދުވުން" ނިމެން އެއް ދުވަހަށް ވެފައި ވާތީ، ދުވުން ފުރިހަމަ ކުރުމަަށް އެ ކުންފުނިން މިއަދު ހަނދާން ކޮށްދީފި އެވެ.

އަހަރީ ދުވަހާ ގުޅިގެން އުރީދޫން ފެށި މި ދުވުން މާދަމާ ފުރިހަމަ ކުރަން ޖެހޭއިރު، މިހާރު ވެސް ދުވުމުގެ ގިނަ ބައިވެރިން ދުވުން ފުރިހަމަ ކޮށްފައިވާ ކަމަށް އެ ކުންފުނިން ބުންޏެވެ.

ދުވުން ފުރިހަމަ ކޮށް، ދުވުމުގެ ފޮޓޯ އާއި މެޑަލް ސޯޝަލް މީޑިއާގައި ހިއްސާ ކުރާ މީހުންގެ ތެރެއިން ފަސް މީހަކަށް އެ ކުންފުނިން ވަނީ އިނާމު ވެސް ހުށަޅައިފަ އެވެ.

ދުވުމުގެ ފޮޓޯ ހިއްސާ ކުރާ ދުވުންތެރިންގެ ތެރެއިން ދެ ނަސީބުވެރިއަކަށް މަމަކުން ރޭގަނޑުގެ ކެއުމެއް ނުވަތަ ލަވޭރިއާ އިން ޕިއްޒާ ލިބޭނެ އެވެ. އަދި މެޑަލް ހިއްސާ ކުރާ ދުވުންތެރިންގެ ތެރެއިން ތިން ނަސީބުވެރިއަކަށް ރޭޖް-ހީޓް ޖިމްގެ އެއް މަހުގެ ހިލޭ މެމްބާޝިޕް ނުވަތަ ޕިއްޒާ ކިޗަން އިން ޕިއްޒާ ނުވަތަ ލެ ޕާފިއުމްގެ ގިފްޓް ޕެކެއް ލިބޭނެ އެވެ.

މި ފޮޓޯތައް ސޯޝަލް މީޑިއާގައި ހިއްސާ ކުރާއިރު އުރީދޫ ޓެގުކޮށް، OoredooAtholhuDhuvun# ބޭނުން ކުރުމަށް އެ ކުންފުނިން އެދެ އެވެ. ފޮޓޯ ހިއްސާ ކުރުމުގެ ސުންގަޑި އަކީ އަންނަ ހޯމަ ދުވަހުގެ ރޭ 11:59 އެވެ.