ސަލްމާން މިސްކިތް ހުޅުވަން ސަައުދީގެ ވަލީއަހުދު ރާއްޖެ ވަޑައިގަންނަވަނީ

ސައުދީ އަރަބިއާގެ ސަރުކާރުގެ އެހީގައި މާލޭގައި އިމާރާތް ކޮށްފައިވާ ކިންގް ސަލްމާން މިސްކިތް ރަސްމީކޮށް ހުޅުވުމަށްޓަކައި ސައުދީގެ ވަލީއަހުދު މުހައްމަދު ބިން ސަލްމާން ރާއްޖެ ވަޑައިގަންނަވާނެ ކަމަށް ދިވެހި ސަރުކާރުން އިއުލާނު ކޮށްފި އެވެ.

ސަލްމާން މިސްކިތުގެ މަސައްކަތް ނިމިފައި ވިޔަސް، އެ މިސްކިތް މިހާތަނަށް ހުޅުވައިފައެއް ނުވެ އެވެ. މިސްކިތް ހުޅުވުމުގެ މަޝްވަރާތަކަށް ސައުދީ ސަރުކާރުގެ ވަފުދެއް ރާއްޖެ އަންނަން ކުރިން ހަމަޖެހުނަސް، އެކަން ވަނީ ފަސްކޮށްފަ އެވެ.

ރާއްޖެ އިން ސައުދީ އަށް ކަނޑައަޅާފައިވާ ސަފީރު މުހައްމަދު ޚަލީލް ސައުދީގެ ނޫހަކަށް ދެއްވި އިންޓަވިއުއެއްގައި ވަނީ ސަލްމާން މިސްކިތަކީ ރާއްޖޭގެ އެންމެ ބޮޑު މިސްކިތަށް ވުމުގެ އިތުރުން އެއީ ސައުދީ އާއި ރާއްޖެއާ ދެމެދު އޮންނަ ގުޅުން ރަމްޒުކޮށްދޭނެ ބިނާއަކަށް ވާނެ ކަމަށެވެ. އަދި އެ މިސްކިތް ހުޅުވުމުގެ ރަސްމިއްޔާތަށްޓަކައި ސައުދީގެ ވަލީއަހުދު ރާއްޖެ ވަޑައިގަންނަވާނެ ކަމަށް ޚަލީލްއާ ހަވާލާދީ އެ ނޫހުގައިވެ އެވެ.

ސައުދީގެ ރަސްގެފާނު ސަލްމާން ބިން އަބްދުލްއަޒީޒްގެ ދަރިކަލުން މުހައްމަދު ބިން ސަލްމާނަކީ އެ ގައުމުގެ ޑިފެންސް މިނިސްޓަރު އަދި އެންމެ ބާރުގަދަ މުއައްސަސާތައް ހިންގަވާ ބޭފުޅާ އެވެ. ވަލީ އަހުދުގެ މަގާމަށް އޭނާ އައްޔަން ކުރެއްވި ފަހުން މިހާތަނަށް ރާއްޖެއަށް ރަސްމީ ދަތުރުފުޅެއް ނުކުރައްވަ އެވެ.

ސަރުކާރުން ކުރިން ބުނެފައިވާ ގޮތުގައި ސަލްމާން މިސްކިތް ހުޅުވުން ލަސްވަނީ ސައުދީގެ ސަރުކާރުގެ އިސް ބޭފުޅުންނަށް ރާއްޖެ ވަޑައިނުގެންނެވޭތީ އެވެ.