ވިލާ ކޮލެޖުގެ ގްރެޖުއޭޝަން ހަފުލާ ފަށައިފި

ވިލާ ކޮލެޖުގެ ދަސްވެނިވުމުގެ ހަފުލާ މިއަދު ހަވީރު ފަށައިފި އެވެ.

އެ ކޮލެޖުގެ މައި ކެމްޕަހުގައި ބާއްވާ ހަފުލާގައި ޑިގްރީ އަދި މާސްޓާސްގެ އެކި ޕްރޮގްރާމްތައް ނިންމި 1،459 ދަރިވަރުންނަށް ސެޓްފިކެޓު ދޭނެ އެވެ. އެއީ، މިދިޔަ އަހަރާއި މި އަހަރު މަތީ ތައުލީމް ހާސިލްކުރި ދަރިވަރުންނެވެ.

ކޮވިޑު-19 ގެ ސަބަބުން މިދިޔަ އަހަރު ދަސްވެނިވުމުގެ ހަފުލާ ނުބޭއްވުނެވެ. ޖުމްލަ ހަތަރު ދަންފަޅިއަށް ގެންދާ ހަފުލާގެ އެންމެ ފަހު ސެޝަން އޮންނާނީ މެންދުރު 2:30 ގަ އެވެ.

އެ ރަސްމިއްޔާތުގައި ވާހަކަދައްކަވަމުން ވިލާ ކޮލެޖުގެ ރެކްޓާ ޑރ. އަހުމަދު އަންވަރު ވިދާޅުވީ ކޮވިޑުގެ ބަލިމަޑުކަމުގެ ތެރޭގައި ވެސް އެކި ގޮތްގޮތުން މަތީ ތައުލީމް ހާސިލްކޮށް، ދަރިވަރުން މަތީ ނަތީޖާ ހޯދާފައިވާ ކަމަށެވެ.

އެ ކަންކަމުން، ދަރިވަރުން ކިޔެވުމުގައި ކުރިއަރައިގެން ގޮސްފައިވާކަން ޝައްކުނުކުރާ ކަމަށާއި ދަތި ހާލަތުގައި ވެސް އަމާޒަށް ވާސިލްވުމަށް އިތުރު ކުޅަދާނަކަން ލިބިފައިވާނެ ކަމަށް އޭނާ ވިދާޅުވި އެވެ.

ވިލާ ކޮލެޖުގައި ކިޔަވައިދިނުމުގައި ގައުމީ އަދި ބައިނަލްއަގުވާމީ މިންގަނޑުތަކަށް ފެއްތުމަށް އިސްކަމެއްދީފައިވާނެ ކަމަށް ވެސް ޑރ. އަންވަރު ފާހަގަކުރެއްވި އެވެ. ނަމަވެސް އެ ކޮލެޖުގެ އަމާޒަކީ އެއަށްވުރެ އުހުގައި ފައިތިލަ ސާބިތުކުރުން ކަމަށް ރެކްޓާ ވިދާޅުވި އެވެ.

"ކޮވިޑުގެ ދުވަސްވަރު އާ ގޮތްތަކަށް ކިޔަވަން ދަސްކޮށް، އާ ކަންކަމަށް ލޯ ހުޅުވިފައިވާ ކަމަށް އުއްމީދުކުރަން،" ކޮލެޖުގެ ޗެއާމަން، ގާސިމް އިބްރާހިމް ވެސް ބައިވެރިވެވަޑައިގެންނެވި ހަފުލާގައި ޑރ. އަންވަރު ވިދާޅުވި އެވެ.

އޭނާ ވަނީ، ކޮލެޖުން ދަސްވި އެއްޗެހި އަމަލީ މައިދާނުގައި ބޭނުންކޮށް ގައުމަށް ހިދުމަތްކުރުންމަތީ ދެމި ތިބުމަށް އިލްތިމާސްކުރައްވައިފަ އެވެ.