ޕެންޝަން އޮފީހުގެ ހުރިހާ ހިދުމަތެއް މިހާރު އޮންލައިންކޮށް ލިބޭނެ

އޮފީހުގެ ހުރިހާ ހިދުމަތެއް ޑިޖިޓަލްކުރި ސަރުކާރުގެ ފުރަތަމަ އިދާރާއަކަށް ޕެންޝަން އޮފީސް ވެއްޖެ އެވެ.

ޕެންޝަން އޮފީހުގެ ހުރިހާ ހިދުމަތެއް ޑިޖިޓަލްކޮށް އެކަން ތައާރަފްކުރުމަށް "ކޮށާރު" ގެ ނަމުގައި މިއަދު ވަނީ ޕޯޓަލްއެއް ތައާރަފްކޮށްފަ އެވެ.

ޕެންޝަން އޮފީހުން ބުނީ މި ޕޯޓަލް މެދުވެރިކޮށް، އެ އޮފީހުންދޭ ހުރިހާ ހިދުމަތްތައް އަވަސްވެ، އިތުރަށް ފުރިހަމަވާނެ ކަމަށެވެ.

މި ޕޯޓަލް ލޯންޗުކޮށްދެއްވީ އިކޮނޮމިކް މިނިސްޓަރު ފައްޔާޒް އިސްމާއިލެވެ. އޭނާ ވިދާޅުވީ، ރައްޔިތުން އަބަދުވެސް ބޭނުންވަނީ އެންމެ ޒަމާނީ ހިދުމަތްތައް ވީ އެންމެ އަވަހަކަށް ހޯދުން ކަމަށްވާ އިރު އެ ހިސާބަށް ދިއުމަށް އިދާރާތަކުން މަސައްކަތް ކުރަން ޖެހޭނެ ކަމަށެވެ. އޭނާ ވިދާޅުވީ، ހިދުމަތް ދިނުން އަވަސް ކުރުމުގައި ގޮންޖެހުންތައް ހުރި ނަމަވެސް މިއީ ނުކުރެވޭނެ ކަމެއް ނޫން ކަމަށެވެ.

"އުންމީދުކުރަނީ ޕެންޝަން އޮފީހުގެ މިސާލު ނަންގަވައިގެން ދައުލަތުގެ އެހެން މުއައްސަސާތަކާއި ކުންފުނިތަކުން ރައްޔިތުން އެދޭ އަވަސްމިނުގައި ހިދުމަތް ދެވޭނެ ގޮތްތައް ފަހިކުރުން،" އޭނާ ވިދާޅުވި އެވެ.

ފައްޔާޒު ވިދާޅުވީ، ރައްޔިތުންނަށް ހިދުމަތްތައް ދިނުން އަވަސް ކުރުމުގެ އިތުރަށް ޕެންޝަން ފައިސާ ވެސް މިހާރަށް ވުރެ ރަނގަޅަށް އިންވެސްޓް ކުރުން ވަރަށް މުހިއްމު ކަމަށެވެ. އޭނާ ވިދާޅުވީ، ހަމައެކަނި ސަރުކާރުގެ ބޮންޑަށް އިންވެސްޓް ކުރުމުގެ ބަދަލުގައި ރާއްޖޭގެ އިގްތިސާދީ ތަރައްގީއަށް ބޭނުންވާ ފައިސާ ލިބޭނެ އިތުރު ގޮތްތައް ބަލައި އެކަންކަމަށް ވެސް އިންވެސްޓް ކުރުން ވަރަށް މުހިއްމު ކަމަށެވެ.

ޕެންޝަން އޮފީހުން ތައާރަފް ކުރި މި ސިސްޓަމްގެ އެހީގައި އޮފީހުގެ ހުރިހާ ހިދުމަތްތައް އޮންލައިންކޮށް، ދުނިޔޭގެ ކޮންމެ ތަނަކުން، 24 ގަޑިއިރު މެދުނުކެނޑި ހިދުމަތް ހޯދޭނެ އެވެ. ސިސްޓަމް ހަދާފައިވަނީ ބޭނުންކުރަން ފަސޭހަކޮށް، ކޮންމެ ވަގުތަކުވެސް ހިދުމަތް ހޯދޭނެ ގޮތަކަށެވެ.

ޕެންޝަން އޮފީހުގެ ހިދުމަތްތައް މޯބައިލް ޑިވައިސްތަކުން ވެސް މިހާރު ހޯދޭނެ އެވެ. ވަޒީފާއަދާކުރާ މީހެއް ނަމަ މޯލްޑިވްސް ރިޓަޔަމަންޓް ޕެންޝަން ސްކީމުގައި ރަޖިސްޓްރީވުމާ ހަމައިން، އެ މީހަކަށް ބޭނުންވާ ހިދުމަތްތައް ކަމަށްވާ ޕެންޝަން އެކައުންޓުގެ ތަފްސީލު ބެލުމާއި، ޕޯޓްފޯލިއޯ ބަދަލުކުރުމާއި، އެ މީހަކަށް ސްކީމުން ލިބޭ ބެނެފިޓްސްތަކުގެ ތަފްސީލު ބެލުމާއި، ޕެންޝަން ޕްލޭން ކުރުމަށް ކަލްކިއުލޭޓާ ފަަދަ ޓޫލްތައް ބޭނުންކުރެވޭނެ އެވެ.