ޔޫކްރޭނަށް ހަމަލާ ދީފި ނަމަ ނުބައި ނަތީޖާއަކާ ކުރިމަތިލާން ޖެހިދާނެ

ރަޝިޔާ ސިފައިން ޔޫކްރޭނަށް ހަމަލައެއް ދީފި ނަމަ، އެކަމުގެ ސަބަބުން ނުބައި ނަތީޖާއަކާ ރަޝިޔާ ކުރިމަތިލާން ޖެހިދާނެ ކަމަށް، އެމެރިކާ އާއި އިނގިރޭސި ވިލާތުން އިންޒާރުކޮށްފި އެވެ.

މިދިޔަ ހުކުރު ދުވަހު އިނގިރޭސި ވިލާތުގެ ލިވަޕޫލްގައި ފެށި، ޖީ7ގެ ހާރިޖީ ވަޒީރުންނާއި ތަރައްގީއާ ބެހޭ ވަޒީރުންގެ މަހާސިންތާގެ ހަވާސާގައި އިއްޔެ ބައްދަލުކުރެއްވުމަށް ފަހު، އެމެރިކާ އާއި އިނގިރޭސި ހާރިޖީ ވަޒީރުން ވިދާޅުވީ ޔޫކްރޭންގެ މައްސަލައިގައި ކަންބޮޑުވާ ކަމަށެވެ. އެމެރިކާގެ ހާރިޖީ ވަޒީރު އެންޓޮނީ ބްލިންކެން އާއި އިނގިރޭސި ހާރިޖީ ވަޒީރު ލީޒް ޓްރުސް ވިދާޅުވީ، ޔޫކްރޭނާއި ރަޝިޔާ ގުޅޭ ސަރަހައްދީ ރޮނގު ކަރިއަށް ރަޝިޔާ ސިފައިން ޖަމާކުރުމަކީ، ނުރައްކާތެރި ކަމެއް ކަމަށެވެ.

"ރަޝިޔާ އިން ޔޫކްރޭނަށް އެއްވެސް ހަމަލާއެއް ދީފި ނަމަ، އެކަން ވެގެންދާނީ ސްޓްރެޓީޖިކް ގޮތުން ހަދާ ވަރަށް ބޮޑު ގޯހަކަށް. އޭގެ ސަބަބުން ވަރަށް ސީރިއަސް ނަތީޖާތަކަކާ ރަޝިޔާ ކުރިމަތިލާން ޖެހިދާނެ،" ދެވަޒީރުންގެ ބައްދަލުވުމަށް ފަހު، އިނގިރޭސި ހާރިޖިއްޔާ އިން ނެރުނު ބަޔާނެއްގައިވެ އެވެ.

މީގެ އިތުރުން، ރަޝިޔާ އިން ޔޫކްރޭނަށް ހަމަލާއެއް ދިނުން ހުއްޓުވުމަށްޓަކައި، އެމެރިކާ އާއި އިނގިރޭސި ވިލާތަށް މިހާރަށް ވުރެ ބޮޑަށް ގުޅި އެއްބާރުލައިގެން މަސައްކަތްކުރުމަކީ ވަރަށް ބޭނުންތެރި ކަމެއްކަން، އެމެރިކާގެ ހާރިޖީ ވަޒީރު އެންޓޮނީ ބްލިންކެންގެ މަންދޫބު ކަށަވަރުކޮށްދެއްވި އެވެ.

ލިވަޕޫލްގައި މިއަދުގެ ނިޔަލަށް ކުރިއަށް ދާ ޖީ7ގެ މަހާސިންތާގައި ހާރިޖީ ވަޒީރުންގެ މެދުގައި އެންމެ ބޮޑަށް މަޝްވަރާކުރަމުން އަންނަނީ، ރަޝިޔާ އާއި ޔޫކްރޭނާ ދެމެދު އުފެދިފައިވާ މައްސަލައާ ބެހޭ ގޮތުންނެވެ. އިނގިރޭސި ވިލާތުން މި މަޝްވަރާތައް ސިފަކޮށްފައިވަނީ، އާލަމީ އުދުވާނާ ދެކޮޅަށް އެއްބައިވަންތަކަށް ހާމަކުރުމުގެ ބައްދަލުވުމެއްގެ ގޮތުގަ އެވެ.

ޖީ7ގެ ހާރިޖީ ވަޒީރުން ދެކެވަޑައިގަންނަވާ ގޮތުގައި ރަޝިޔާގެ ގިނަ އަދަދެއްގެ ސިފައިންނާއި ބަރު ހަތިޔާރުތައް ޔޫކްރޭންގެ ސަރަހައްދީ ރޮނގު ކައިރިއަށް ޖަމާކުރުމަކީ، އޭގެ ޒާތުގައި މުޅި ސަރަހައްދުގެ ސަލާމަތާއި ރައްކާތެރިކަމަށް އެޅޭ ވަރަށް ބޮޑު ހުރަހެކެވެ. އަދި މި މައްސަލައިގައި ރަޝިޔާ އާއި ވިލާތުގެ ގައުމުތަކާ ދެމެދު އުފެދިފައިވާ ނުތަނަވަސްކަން ފިލުވައިލުމަށް މަސައްކަތްކުރުމަކީ ކޮންމެހެން ބޭނުންތެރި ކަމެއް ކަމަށް ވެސް ހާރިޖީ ވަޒީރުން ދެކެވަޑައިގަންނަވަ އެވެ.

ރަޝިޔާ-ޔޫކްރޭން މައްސަލައިގެ އިތުރުން، ކޮވިޑް-19 އާއި، ތިމާވެށީގެ މައްސަލަތަކާއި އަފްގާނިސްތާނުގެ މައްސަލަ އާއި އުތުރު ކޮރެއާގެ ނިއުކްލިއާ ހަތިޔާރުގެ މައްސަލަ އާއި އީރާންގެ ނިއުކްލިއާ މަޝްރޫއުގެ މައްސަލައާ ބެހޭ ގޮތުން ވެސް، ޖީ7ގެ ހާރިޖީ ވަޒީރުން މަޝްވަރާ ކުރައްވާނެ އެވެ.