ގާނޫނީ ހުސްކަމެއްގައި އޮތް އޭސީސީއަށް މެމްބަރުން ހޯދަނީ

ފަސް މެމްބަރުން ވެސް އިސްތިއުފާ ދެއްވައި ގާނޫނީ ހުސްކަމެއްގައި މިހާރު އޮތް އެންޓި ކޮރަޕްޝަން ކޮމިޝަން (އޭސީސީ) އަށް މެމްބަރުން ހޯދަން އިއުލާންކޮށްފި އެވެ.

ކޮރަޕްޝަންގެ މައްސަލަތައް ބަލައި ހުއްޓުވުމުގެ ގާނޫނީ ޒިންމާ އެޅިފައި އޮތް މިނިވަން މުއައްސަސާއަށް ކުރިމަތިލާން ހުޅުވާލީ ރައީސް އޮފީހުން ބުނިގޮތުގައި ފަސް މެމްބަރުން ވެސް އިސްތިއުފާ ހުށަހަޅުއްވާފައިވާތީ އެވެ. މި ކޮމިޝަނުގެ މެމްބަރަކަށް ވާން ޝައުގުވެރިވާ ފަރާތްތަކަށް ޖެނުއަރީ، 17 އާ ހަމައަށް ކުރިމަތިލެވޭނެ އެވެ.

އޭސީސީން އިސްތިއުފާ ދެއްވީ ކޮމިޝަންގެ ރައީސް މަރިޔަމް ޝިއުނާ އާއި ނައިބު ރައީސް ފާތުމަތު އަނޫލާގެ އިތުރުން އައިޝަތު އަބްދުﷲ އެވެ. އެއްފަހަރާ އިސްތިއުފާ ދެއްވި މި ތިން މެމްބަރުންނަށް ވުރެން ކުރިން މެމްބަރު އިބްރާހިމް ޝަކީލް އާއި އަލީ އަޝްރަފް އިސްތިއުފާ ދެއްވީ މެމްބަރުން ވަކިކުރުމުގެ މަރުހަލާ ފަށަން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ނިންމާފައި ވަނިކޮށެވެ.

އޭސީސީއަށް ކުރިމަތިލާ މީހުންގެ ނަންތައް މަޖިލީހަށް ފޮނުވުމުން އެންމެ ގާބިލް މީހުން ހޮވަނީ ރައްޔިތުންގެ މިނިވަން މުއައްސަސާތަކާ ބެހޭ ކޮމިޓީންނެވެ. މި ވެރިކަމުގައި އޭސީސީއަށް އައްޔަންކުރެއްވި މެމްބަރުން އިސްތިއުފާ ދެއްވައި ކޮމިޝަން ގާނޫނީ ހުސް ކަމަކަށް ދިޔައީ މައްސަލަތައް ބެލުމުގައި ލަސްކަމަށް ބުނެ ވަކިކުރަން ކޮމިޓީން ނިންމުމުންނެވެ.

މަޖިލީހުގެ ތަޅުމަށް ފޮނުވައި އެ ނިންމުން ފާސްކުރުމުގެ ކުރިން މެމްބަރުން ވަނީ އިސްތިއުފާ ދެއްވައިފަ އެވެ. އޭސީސީގެ މެމްބަރުން އެއްފަހަރާ ވަކިކުރަން ނިންމި ނިންމުމާ ގުޅޭ ގޮތުން ވަނީ ފާޑުކިއުން އަމާޒުވެފަ އެވެ.

ކުރީގެ ސަރުކާރުގައި ނޫފޫޒުގެ ދަށުވެފައިވާ ކަަމަށް ތުހުމަތުކުރި މުއައްސަސާއަށް ފަހުން އައްޔަންކުރި މެމްބަރުންނާ އެކު ކޮމިޝަން ނުފޫޒެއްގެ ދަށުނުވެ މަސައްކަތް ކުރަމުން އަންނަނިކޮށް ތުހުމަތުތަކެއް ކުރުމުގެ އެއް ސަބަބަކީ މިނިވަންކަމާ އެކު މަސައްކަތް ކުރާ ތަން ބަލައިނުގަނެވޭ ބަޔަކު ތިބުން ކަމަށް އިސްތިއުފާ ދެއްވި މެމްބަރުން ވެސް ވަނީ ވިދާޅުވެފަ އެވެ.

އެ މެމްބަރުން ވިދާޅުވެފައިވާ ގޮތުގައި އިތުބާރު ނެތް ކަމުގެ ވޯޓެއް ނަގައި މަގާމުން ދުކުރަން ޖެހޭ އެއްވެސް ސަބަބެއް ނެތެވެ. ތުހުމަތުތަކުގައި ފެންނަން އޮތީ ކޮމިޝަން މިނިވަންކަމާ އެކު މަސައްކަތް ކުރަން ހިފެހެއްޓި ސްޓޭންޑާ އެކު ނުފޫޒު ނުފޯރުވުމަކީ މައްސަލައަކަށް ވުން ކަަމަށް ވިދާޅުވެފައިވެ އެވެ.

އެކަމަކު މިނިވަން މުއައްސަސާތަކާ ބެހޭ ކޮމިޓީން ބުނެފައިވާ ގޮތުގައި ކޮމިޝަނަށް އެކަށީގެންވާ ސްޕީޑުގައި މައްސަލަތަކެއް ނުބެލެ އެވެ. އެކަން ރަނގަޅު ކުރަން އަންގައި ވަގުތު ވެސް ދިން ކަމަށާއި ފަހުން ހެދި އޮޑިޓް އޮފީހުގެ ރިޕޯޓުން ވެސް ފެންނަން އޮތީ މައްސަލަތައް ނުބެލޭ ކަން ކަމަށް ކޮމިޓީގެ މެމްބަރުން ވިދާޅުވެ އެވެ.

އެ މެމްބަރުން ވިދާޅުވެފައި ވަނީ ހަވާލުވި އިރު ވެސް ފުނިޖެހިފައި ހުރި މައްސަލަތައް އަވަސްކުރަން ބަދަލުތަކެއް ގެނެސްފައިވާނެ ކަަަމަށެވެ. ކޮވިޑުގެ ގެއްލުނު އަހަރާ އެކު އެ ކޮމިޝަނަށް ލިބުނު ކުރު މުއްދަތެއްގެ ތެރޭގައި މައްސަލަތައް ބެލި ކަމަށާއި އެކަމަކު އެންމެ އެދެވޭ ބާރު މިނުގައި މައްސަލަތައް ނުނިމުނީ އިންވެސްޓިގޭޓަރުން ނެތުމުން ކަން ފާހަގަކޮށްފައިވެ އެވެ.