ފުރަތަމަ މެޗުގައި އެޑަމް އާއި ކުޑަ ކާއްޓޭ ލަންކާގެ ޕެއާ ބަލިކޮށްފި

ސްރީ ލަންކާގައި މިހާރު ކުރިއަށްދާ ސެންޓްރަލް ޒޯން ބީޗް ވޮލީ މުބާރާތުގައި ރާއްޖޭގެ އާދަމް ނަސީމް އާއި އިސްމާއީލް ސާޖިދު (ކުޑަ ކާއްޓޭ) ލަންކާގެ ޕެއާގެ މައްޗަށް ކާމިޔާބު ހޯދައިފި އެވެ.

މިއަދު ހެނދު ކުޅުނު މެޗުގައި އެޑަމް އާއި ކުޑަ ކާއްޓޭއާ ދެކޮޅަށް ނުކުތީ ލަންކާގެ ނިލަން އާއި މަލިންތަ ޔަޕާގެ ޕެއާ އެވެ. އެޑަމް އާއި ކުޑަ ކާއްޓޭގެ ޕެއާ މެޗު ގެންދިޔައީ ސީދާ ދެ ސެޓުންނެވެ. ސެޓްތައް ގެންދިޔައީ 21-18 އަދި 21-19 އިންނެވެ.

ކުޑަ ކާއްޓޭ އާއި އެޑަމްގެ ޕެއާ މިއަދު ހަވީރު ނުކުންނާނީ ޕާކިސްތާންގެ މުބައްޝިރު އަދި އަބޫ ޒައްރުގެ ޕެއާއާ ދެކޮޅަށެވެ.

މޮރިޝަސްގައި 2019 ގައި ބޭއްވި އިންޑިއަން އޯޝަން އައިލެންޑް ގޭމެސްގެ ބީޗް ވޮލީން ރާއްޖެ އަށް ރިހި މެޑަލް ހޯދައިދިން ބީޗް ވޮލީ ޓީމުގައި އެޑަމްއާ އެކު ހިމެނުނު އަބްދުލް ވާހިދު (މަންކޭ) އާއި މުހައްމަދު އަލީ (ޑެންޒޯ)، އިރާންގެ އަލީ އާއި މަހްދީގެ ޕެއާ އަތުން ވަނީ ބަލިވެފަ އެވެ. އަލީ އާއި މަހްދީގެ ޕެއާ މެޗް ކާމިޔާބު ކުރީ 3-1 ސެޓުންނެވެ. ބީޗް ވޮލީގެ ސީނިއާ ގައުމީ ޗެމްޕިއަންކަން ހޯދި މަންކޭ އާއި ޑެންޒޯ އިރާންގެ ޕެއާ އަތުން މޮޅުވީ ދެވަނަ ސެޓްގަ އެވެ. އެ ސެޓް ކާމިޔާބު ކުރީ 21-16 އިންނެވެ. ފުރަތަމަ ސެޓުން ބަލިވީ 21-9 އިންނެވެ. ތިންވަނަ ސެޓްގައި ބަލިވީ 15-10 އިންނެވެ.

ސެންޓްރަލް ޒޯންގެ ރައީސްކަމާ ރާއްޖޭގެ މުހައްމަދު ލަތީފު ހަވާލުވެ ވަޑައިގެން އޭނާ ވަނީ ގިނަ މުބާރާތްތަކެއް ކާވާގެ ކަލަންޑަރުގައި ހިމަނައިފަ އެވެ. ލަންކާގައި ކުރިއަށްދާ މުބާރާތަކީ ސެންޓްރަލް ޒޯން ބީޗް ވޮލީގެ ފުރަތަމަ މުބާރާތެވެ. އާދިއްތަ ދުވަހުގެ ނިޔަލަށް މުބާރާތް ކުރިއަށްދާނެ އެވެ.