މުޣުނީ ހަމަޖެއްސީ އެންވަޔަރްމެންޓް މިނިސްޓްރީގެ ސްޓޭޓް މިނިސްޓަރަކަށް

ސްޓެލްކޯގެ މެނޭޖިން ޑިރެކްޓަރު ކަމުގެ މަގާމުން ވަކިކުރި ހަސަން މުޣުނީ، އެންވަޔަރްމެންޓް މިނިސްޓްރީގެ ސްޓޭޓް މިނިސްޓަރަކަށް މިއަދު އައްޔަންކޮށްފި އެވެ.

އޭނާ ސްޓެލްކޯގެ މަސައްކަތްތަކުން އިއްޔެ ދުރަށް ވަޑައިގަތުމަށް ފަހު، އެ ކުންފުންޏަށް ބަދަލުތަކެއް ގެންނެވުމަށް ރައީސް އިބްރާހިމް މުހައްމަދު ސޯލިހް ދެއްވި ފުރުސަތަށް ޝުކުރު އަދާކުރެއްވި އެވެ.

އޭނާގެ ބަދަލުގައި ސްޓެލްކޯ ހިންގަން ހަވާލުކުރެއްވީ އިލެކްޝަންސް ކޮމިޝަނުގެ ކުރީގެ ރައީސް އަހްމަދު ޝަރީފުއާ އެވެ.

މުޣުނީ މި ބަދަލުކުރެއްވީ ކުރިން ހުންނެވި މަގާމަށް ވުރެ ދަށް މަގާމަކަށެވެ. ބޮޑެތި ކުންފުނިތަކުގެ މެނޭޖިން ޑިރެކްޓަރެއްގެ މުސާރަ ލައްކައަކާ ގާތްކުރެ އެވެ.

އެކަމަކު ސްޓޭޓް މިނިސްޓަރެއްގެ މުސާރަ އަކީ މަހަކު 32،000ރ. އެވެ. އަދި ސްޓޭޓް މިނިސްޓަރަކަށް މަހަކު 15،000ރ. ގެ އެލަވަންސެއް ލިބިވަޑައިގަންނަވާނެ އެވެ.

މުޣުނީއާއެކު، އެންވަޔަރްމެންޓް މިނިސްޓްރީގައި މިހާރު ހަ ސްޓޭޓް މިނިސްޓަރުން ތިއްބަވާނެ އެވެ.

ސްޓެލްކޯގެ އިތުރުން ވެސް ސަރުކާރުގެ ބައެއް ކުންފުނިތަކުގެ ހިންގުމަށް ބޮޑެތި ބަދަލުތަކެއް ގެނައުމަށް ޕީސީބީ އަށް ސަރުކާރުން ވަނީ ހުށަހަޅައިފަ އެވެ. އޭގެ ތެރޭގައި ވެމްކޯގެ ހިންގުން ވެސް އެހެން ބޭފުޅަކާ ހަވާލުކުރައްވާ ގޮތަށް ވަނީ ހަމަޖައްސައިފަ އެވެ.