މޫދު ކުޅިވަރާ އެކު އަންހެނުންގެ ދުވަސް ފާހަގަކުރަން ހުޅުމާލޭގައި މިއަދު ހާއްސަ އިވެންޓެއް

އަންހެނުންގެ ދުވަސް ފާހަގަކުރުމުގެ ގޮތުން މޫދު ކުޅިވަރާއި އިތުރު ހަރަކާތްތަކާ އެކު ހުޅުމާލޭގައި މިއަދު ހާއްސަ އިވެންޓެއް ބާއްވަން ނިންމައިފި އެވެ.

ޔޫއެން މޯލްޑިވްސް އިން އިންތިޒާމުކޮށްގެން ބާއްވާ އެ އިވެންޓްގައި އެޗްޑީސީގެ އިތުރުން ވެސް ވަރަށް ގިނަ އާންމު ޖަމިއްޔާތަކުން ބައިވެރިވެ އެވެ. އެ އިވެންޓްގެ ހަރަކާތްތައް ކުރިއަށް ދާނީ މިއަދު މެންދުރު 1:00 އިން ފެށިގެން އިރުއޮއްސި 6:00 އަށް ހުޅުމާލެ ބީޗުގަ އެވެ.

އިވެންޓްގައި އޮންނާނެ ހަރަކާތްތައް

- ޑައިވިންނާއި ސްނޯކްލިކް އާއި ސާފިންނާއި އަދި ވިންޑް ސާފިން

- ސިއްހީ ކަންކަމަށް ހޭލުންތެރިކުރުމަށް ހެލްތު އަދި ފިޓްނެސް ސެޝަނެއް

- ފުޓްބޯޅަ ސެޝަނެއް

- އާޓާއި ޕެއިންޓް ހަރަކާތެއް

- އަންހެނުންގެ ހައްގުތަކާ ގުޅޭ ގޮތުން ހޭލުންތެރިކުރުމުގެ ސެޝަނެއް

- ތިމާވެއްޓާ ގުޅޭ ހޭލުންތެރިކުރުމުގެ ސެޝަނެއް

- ލައިވް މިއުޒިކް

އެ އިވެންޓްގެ ހާއްސަ މެހުމާނެއްގެ ގޮތުގައި އެންވަޔަރަމަންޓް މިނިސްޓަރު އައިޝަތު ޝައުނާ ވެސް ބައިވެރިވެވަޑައިގަންނަވާނެ އެވެ. އަދި އެ އިވެންޓްގައި ތިމާވެއްޓާއި ޓެކްނޮލޮޖީގެ ދާއިރާގައި އަންހެނުން ކުރިއެރުވުމަށް މިނިސްޓްރީން ފަށާފައިވާ "އެރައިޒް" ޕްރޮޖެކްޓްގެ ޑެމޮންސްޓްރޭޝަނެއް ދެއްކުން ވެސް އޮންނާނެ އެވެ.

ޔޫއެން މޯލްޑިވްސްގެ އެ އިވެންޓްގައި ބައިވެރިވާ އެހެން ފަރާތްތަކަކީ އަލޯހާ ބީޗް ކްލަބް، މޫދުބުޅާ ޑައިވް، ސޯލްޓެޑް ވެންޗާސް ސްވިމާސް، ހީޓް ހެލްތު އެންޑް ފިޓްނެސް، ވިމެންސް ފުޓްބޯލް ކްލަބް، އުތެމާ، އާޓީ ފިންގާސް، ޔޫއެންއެފްޕީއޭ، ޔޫއެންޖީޓީޖީ، ހޯޕް ފޯ ވިމެން، ޕާލޭ، ޒީރޯ ވޭސްޓް މޯލްޑިވްސް އަދި ސޭވް ދަ ބީޗެވެ.