ޑިއުޓީ އޮޅިގެން އިސްލާމީ މަރުކަޒުގައި ފަތިސް ނަމާދު ބަންގިއެއް ނުގޮވާ

އިސްލާމީ މަރުކަޒުގެ އިމާމް ޗުއްޓީ ނެންގެވުމުން ޑިއުޓީ ޓޭބަލް އޮޅިގެން ރޭ ފަތިސް ނަމާދު ބަންގި ގޮވާނެ މީހަކު ނެތި އާންމުންގެ މީހަކު އިމާމްވެ ނަމާދުކޮށްފި އެވެ.

މިއީ އިސްލާމިކް މިނިސްޓްރީ ވެސް ހިމެނޭ އިސްލާމީ މަރުކަޒުގައި ފަހުގެ ތާރީހެއްގައި މިފަދަ ކަމެއް ހިނގި ފުރަތަމަ ފަހަރެވެ.

ރޭ ފަތިސް ނަމާދަށް މިސްކިތަށް ދިޔަ މީހަކު "މިހާރު" އަށް ބުނީ 4:58 ގައި ބަންގި ގޮވާ ވަގުތު ޖެހުނު އިރު ވެސް އިމާމަކު ނާންނަ ކަމަށާއި އޭގެ ފަހުން ވެސް އިމާމަކު ނައުމުން އިމާމްވެ ނަމާދު ކުރަން ފެށީ އާންމުންގެ ތެރެއިން މީހަކު ކަމަށެވެ.

"އެހެން މިސްކިތްތަކުން ބަންގި ގޮވަން ފެށިއިރު ވެސް އެންމެ ބޮޑު އިސްލާމީ މަރުކަޒުން ބަންގިއެއް ނުގޮވާ. އެންމެ ފަހުން އާންމުންގެ މީހަކު މައިކު ވެސް ނާޅާ ނަމާދު ކުރީ. ދެ ސަފު ފުރާ މީހުން ތިބި. މުދިމެއް ނެތް،" އޭނާ ބުންޏެވެ.

އެނގިފައިވާ ގޮތުގައި ފަތިސް ނަމާދަށް ބަންގި ގޮވާނެ އިމާމަކު މިސްކިތައް ނައިީ އެއް އިމާމެއް ޗުއްޓީ ނެންގެވުމުން ޑިއުޓީ އަށް އެރި އޮޅުމެއްގެ ސަބަބުންނެވެ.

މިކަމާ ގުޅޭ ގޮތުން އިސްލާމިކް މިނިސްޓްރީގެ ބަހެއް އަދި ނުލިބެ އެވެ.