ދައުވާލިބޭ އެކަކު އަނަސް މަރާލި ރޭ އޮތީ ފިލްމު ބަލަން، ދެވަނަ މީހާ ރަށުގައި: ހެކިން

މާލޭގައި ތޫނު އެއްޗެހިން ހަމަލާދީ މުހައްމަދު އަނަސް މަރާލި ރޭ، ދައުވާލިބޭ އެކަކު އޮތީ ގޭގައި ފިލްމު ބަލަން ކަމަށާއި ދައުވާ ލިބޭ އެހެން މީހަކު ހުރީ ލ. ގަމުގައި ކަމަށް ދިފާއީ ހެކިން ކްރިމިނަލް ކޯޓުގައި މިއަދު ހެކިބަސްދީފި އެވެ.

ޖުލައި، 2017 ގައި ލިޓަސް ސާވިސް ސެންޓަރުގެ ތެރެއަށް ގްރޫޕަކުން ވަދެ، ތޫނު އެއްޗެހިން ހަމަލާދީ އަނަސް މަރާލި މައްސާގައި ދައުލަތުން ހަތް މީހަކަށް ދައުވާކުރެ އެވެ. އެއީ ލ. ގަން ތުނޑީ، ނަންނާރިގޭ ޖުނައިހް އަބްދުﷲ އާއި ދަފްތަރު ނަމްބަރު 1746، ސިމާހް މޫސާގެ އިތުރުން ސ. ފޭދޫ ވެސްޓަންވިލާ ހަސަން މަހްފޫޒާއި ޅ. ކުރެންދޫ އަސުރުމާގޭ އަހުމަދު ޒަޔާންގެ އިތުރުން މ. ދިމިޝްގު، އުސްމާން ޝަރީފާއި މ. ލޮނުމިދިލިގޭ އަފްރާހް އަބްދުއްރައްޒާގު އަދި ތ. ކިނބިދޫ ގުލްފާމުގޭ މުހައްމަދު ޝާޒްގެ މައްޗަށެވެ.

މިއަދު ކުރިއަށް ގެންދިޔައީ އޭގެ ތެރެއިން ޖުނައިހާއި ސިމާހްގެ ޝަރީއަތެވެ. ސިމާހުގެ ފަރާތުން ހުށަހެޅި ދިފާއީ ހެއްކަކު ބުނި ގޮތުގައި އަނަސް މަރާލި ރޭ 7:30 އިން ފެށިގެން މެންދަމާ ހަމައަށް އެ މީހުން ތިބީ ސިމާހު އުޅޭ ގޭގައި ސިމާހާ އެކު ފިލްމު ބަލާށެވެ.

އެ ރޭ ދެތިން ފިލްމު ބެލި ކަމަށާއި އެކަމަކު އެއީ ކޮން ފިލްމުތަކެއް ކަން ހަނދާން ނެތް ކަމަށް އޭނާ ބުންޏެވެ. އަދި އެވަގުތުގެ ތެރޭގައި ސިމާހު ގެއިން ބޭރަށް ނުދާ ކަމަށް ވެސް އެ ހެކިވެރިޔާ ބުންޏެވެ.

ޖުނައިހްގެ ދިފާއީ ހެކިންގެ ތެރެއިން ހާޒިރުކުރި ދެ މީހުން ބުނި ގޮތުގައި އެ ހާދިސާ ހިނގިއިރު ޖުނައިހް ހުރީ ލ. ގަމުގަ އެވެ. އަދި އެރޭ އެ ރަށުގައި ފުޓްބޯޅަ މެޗެއް ކުޅެ ނިންމާފައި ރެސްޓޯރެންޓަކަށް ކާން ދިޔަ ކަމަށް އެ ދެ ހެކިން ބުންޏެވެ. އެދުވަސްވަރު އޭނާ އުޅުނީ ގަމުގައި ކަމަށާއި އަދި އޭނާ މާލެ ދިޔައީ އެ ހާދިސާ ހިނގިތާ 10 ވަރަކަށް ދުވަސް ފަހުން ދޯންޏެއްގައި ކަމަށާއި އޭނާ މާލެ ދިޔައީ ވަޒީފާ ހޯދަން ކަމަށް ވެސް އެ މީހުން ބުންޏެވެ.

ޖުނައިހްގެ ފަރާތުން އިތުރު ދެ ހެކިން ހުށަހަޅާފައި އޮތަސް، މިހާރު އެ މީހުންގެ ހެކިބަސް ނަގަން ބޭނުންނުވާ ކަމަށް އޭނާގެ ވަކީލުން މިއަދު ބުންޏެވެ.

ޖުނައިހްގެ ލޮލުގެ ފަރުވާއަކަށްޓަކައި އޭނާ ވަގުތީ ގޮތުން ބަންދުން ދޫކޮޮށްފައިވާތީ އެ މުއްދަތު އިތުރުކޮށްދޭން އޭނާގެ ފަރާތުން މިއަދު އެދުނެވެ. އެއީ ލޮލުގެ އިންފެކްޝަނެއް ހެދިފައިވާތީ އާއި ލޮލުގެ ފަރުވާއަށްޓަކައި އިންޑިއާއަށް އަނެއްކާ ވެސް ދާން ޖެހިފައިވާތީ ކަމަށް އޭނާގެ ވަކީލުން ބުންޏެވެ.

ދައުލަތުން އެކަމަށް ދެކޮޅު ހެދި އެވެ. ދައުލަތުން ބުނީ ފަރުވާއަށްޓަކައި ކުރިން ވެސް ފުރުސަތު ދީފައިވާ ކަމަށާއި އަދި ބަންދުގައި ހުއްޓަސް، އިތުރު ފަރުވާއަށް ރާއްޖެއިން ބޭރަށް ދާންޖެހޭ ނަމަ، ކަރެކްޝަން މެދުވެރިކޮށް ދެވޭނެ ކަމަށެވެ.

ނަމަވެސް އެ މައްސަލަ ބައްލަވާ ގާޒީ އަލީ ނަދީމް ވިދާޅުވީ ޖުނައިހް ވަގުތީ ގޮތުން ދޫކޮށްލީ އޭނާގެ ލޮލުގެ ފަރުވާއަށް އިހުމާލުވަމުން ދިއުމުން ކަމަށެވެ. އެހެންވެ، އޭނާ ބަންދުން ދޫކޮށްފައިވާ މުއްދަތު އަނެއްކާވެސް 30 ދުވަހަށް އިތުރުކުރަން ނިންމެވީ ކަމަށް ގާޒީ ވިދާޅުވި އެވެ.