ކްރިސްޓަލް ޕެލަސް ބަލިކޮށް، ޗެލްސީ ޖެހިޖެހިގެން ތިންވަނަ އެފްއޭ ކަޕް ފައިނަލަށް

ލަންޑަން (އޭޕްރީލް 17) - އިނގިރޭސި އެފްއޭ ކަޕް ސެމީ ފައިނަލުގައި ކްރިސްޓަލް ޕެލަސްއާ ވާދަކޮށް 2-0 އިން މެޗު ކާމިޔާބު ކޮށްގެން, ޗެލްސީ ޖެހިޖެހިގެން ތިންވަނަ ފަހަރަށް މުބާރާތުގެ ފައިނަލަށް ދަތުރު ކޮށްފި އެވެ.

ނިމިދިޔަ ދެ ސީޒަނުގެ އެފްއޭ ކަޕް ފައިނަލުގައި ޗެލްސީ ވާދަކުރި ނަމަވެސް މުބާރާތް ކާމިޔާބެއް ނުކުރެވެ އެވެ. މިދިޔަ އަހަރު ކޯޗު ތޯމަސް ޓުޗެލްއާ އެކު ޗެލްސީ ކުޅުނު ފުރަތަމަ ފައިނަލުގައި ލެސްޓާ ސިޓީ އަތުން ބަލިވި އިރު އޭގެ ކުރީ ފަހަރު ބަލިވީ އާސެނަލް އަތުންނެވެ.

ކްރިސްޓަލް ޕެލަސް ނުކުތީ ފަސް އަހަރަށް ފަހު މުބާރާތުގެ ފައިނަލުން ޖާގަ ހޯދާށެވެ. ނަމަވެސް އެ ޓީމުގެ މެދުތެރޭގައި އެންމެ މުހިއްމު ދައުރެއް އަދާކުރާ ކޮނޯ ގަލަގާ އަށް މި މެޗު ނުކުޅެވޭތީ އެޓީމަށް އުނދަގޫތަކެއް ކުރިމަތިވި އެވެ. ގަލަގާ އަކީ މި ސީޒަނުގައި ޗެލްސީން ލޯނު އުސޫލުން ޕެލަސް އަށް ދޫކޮށްފައިވާ ކުޅުންތެރިއެކެވެ.

މިރޭގެ މެޗުގެ ފުރަތަމަ ހާފުގައި ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެން ދިޔަ ނަމަވެސް ފަހު ހާފުގައި ބޮޑަށް ކުރިޔަށް ޖެހިގެން ކުޅުނީ ޗެލްސީ އެވެ. އެކަމަކު ޗެލްސީން ލީޑު ނެގުމުގެ ކުރިން ޕެލަސްގެ އެބެރޭޗީ އެޒޭ ނެގި ކޯނަރަކުން ޑިފެންޑަރު ޗީކޫ ކުޔާޓޭ އަށް ވަނީ ލަނޑު ޖަހަން ފުރުސަތު ލިބިފަ އެވެ. ނަމަވެސް އޭނާ ހުސްކޮށް އަރައި ބޮލުން ފޮނުވާލި ބޯޅަ ދިޔައީ ގޯލު ކަނާ ދިމާލުން ބޭރަށެވެ.

ޗެލްސީން ލީޑު ނެގީ 65 ވަނަ މިނިޓުގައި ރުބެން ލޮފްޓަސް ޗީކެވެ. އޭނާ އަކީ ފުރަތަމަ ހާފުގައި މިޑްފީލްޑަރު މަޓެއޯ ކޮވަސިޗަށް އަނިޔާވެގެން އެރުވި ކުޅުންތެރިއެކެވެ. ލޮފްޓަސް ޗީކް ވަނީ ކައި ހަވާޓްޒް ދިން ބޯޅައެއް އެއްފަހަރުން ޖަހައި ގޯލު މަތީ ކަނަށް ފޮނުވާލައިފަަ އެވެ.

ޗެލްސީގެ ދެވަނަ ލަނޑު 76 ވަނަ މިނިޓުގައި ޖެހީ މެސަން މައުންޓެވެ. އޭނާ މި ލަނޑު ޖެހީ ޓިމޯ ވާނާ އޭރިއާ ތެރެއިން ކްރިސްޓަލް ޕެލަސްގެ ދެ ކުޅުންތެރިން ދޭތެރެއިން ދިން ޕާސް ހޯދައި ތިރިތިރިން ގޯލުގެ ދުރު ކަނަށް ބޯޅަ ފޮނުވާލައިގެންނެވެ.

މެޗުގެ ފަހުކޮޅު ކުޅެން އެރުވި ފޯވާޑް ރޮމެލޫ ލުކާކޫ ވެސް ވަނީ ނުރައްކާތެރި ހަމަލާއެއް ފޮނުވާލައިފަ އެވެ. ފުރިހަމަ ވަގުތު ހަމަވެގެން ދެއްކި އިތުރު ވަގުތުގައި ވާނާ ތަނަވަސްކޮށްދިން ފުރުސަތެއްގައި އޭނާ ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ. ކުޅުމުގެ ތެރެއަށް އައި ބޯޅަ ހަކީމް ޒިޔެޝް ފޮނުވާލުމުން ބްލޮކްވިއިރު، ފަހުން އެންޓޯނިއޯ ރުޑިގާ ފޮނުވާލި ހަމަލާއެއް ވެސް ޕެލަސްގެ ޑިފެންޑަރުން ބްލޮކް ކުރި އެވެ.

އަންނަ މެއި މަހުގެ 14 ވަނަ ދުވަހުގެ ރޭ އެފްއޭ ކަޕް ފައިނަލުގައި ޗެލްސީ ކުޅޭނީ ލިވަޕޫލާ ދެކޮޅަށެވެ. ލިވަޕޫލް ވަނީ ސެމީ ފައިނަލުގެ ފުރަތަމަ މެޗުގައި މެންޗެސްޓާ ސިޓީ 3-2 އިން ރޭ ބަލި ކޮށްފަ އެވެ.

މިހާތަނަށް އަށް ފަހަރު މުބާރާތް ކާމިޔާބުކޮށްފައިވާ ޗެލްސީ އެންމެ ފަހުން އެފްއޭ ކަޕް ޗެމްޕިއަންކަން ހޯދީ 2018 ވަނަ އަހަރު އެވެ. އޭގެ ކުރިން 2012 ވަނަ އަހަރު މުބާރާތް ކާމިޔާބުކުރީ ލިވަޕޫލް ބަލިކޮށްފަ އެވެ.

މި ސީޒަނުގެ ޔޫއެފާ ސުޕަ ކަޕާއި ފީފާ ކްލަބް ވޯލްޑް ކަޕް ކާމިޔާބުކޮށްފައިވާ ޗެލްސީ ވަނީ އިނގިރޭސި ލީގު ކަޕް ފައިނަލުގައި ވެސް ކުޅެފަ އެވެ. ނަމަވެސް ޕެނަލްޓީ ޖަހައިގެން ލީގު ކަޕް ކާމިޔާބު ކުރީ ލިވަޕޫލެވެ. ޗެލްސީ ވަނީ މިދިޔަ ހަފްތާގައި ޗެމްޕިއަންސް ލީގުގައި ރެއާލް މެޑްރިޑް ބަލިކުރި ނަމަވެސް އެގްރިގޭޓުން ކުރި ނުލިބުމުން ސެމީ ފައިނަލަށް ނުގޮސް ކަޓައިފަ އެވެ. ޕްރިމިއާ ލީގުގައި ޗެލްސީ އޮތީ ތިންވަނައިގަ އެވެ.