ކުޑަކުއްޖެއް ގައިގައި އަލިފާން ޖައްސައި އަނިޔާ ކުރި މައްސަލައެއް

އއ. އަތޮޅުގެ ރަށެއްގައި ކުޑަކުއްޖެއްގެ ގައިގައި އެ ކުއްޖާގެ ބައްޕަ އަލިފާން ޖައްސައި، އަނިޔާ ކުރި ކަމަށް ބުނާ މައްސަލައެއް ފުލުހުން ތަހުގީގު ކުރަން ފަށައިފި އެވެ.

ފުލުހުން ބުނީ އިތުބާރު ކުރެވޭ މަގާމެއްގައި ހުރި މީހަކު 12 އަހަރުގެ ފިރިހެން ކުއްޖަކަށް އަނިޔާކުރި ކަމުގެ މައްސަލައެއް މިދިޔަ އަންގާރަ ދުވަހު ހުށަހަޅާފައިވާ ކަމަށެވެ.

އެ ކުއްޖާގެ ހާލު ރަނގަޅު ކަމަށާއި އެ ކުއްޖާ މިހާރު ރައްކާތެރި މާހައުލަކަށް ބަދަލުކޮށްފައިވާ ކަމަށް ފުލުހުން ބުންޏެވެ.

އެނގިފައިވާ ގޮތުގައި އެ ކުއްޖާގެ ބައްޕަ ވަނީ ގައިގައި އަލިފާން ޖައްސައި އަނިޔާކޮށްފަ އެވެ. އެ މައްސަލަ ފުލުހުންނަށް ރިޕޯޓްކުރީ އެ ކުއްޖާގެ މަންމަ ކަމަށް ވެސް ބައެއް ފަރާތްތަކުން ބުނެ އެވެ.

އެ މައްސަލަ އާ ގުޅިގެން އަދި އެ ކުއްޖާގެ ބައްޕަ ހައްޔަރެއް ނުކުރެ އެވެ.

ޖެންޑާ މިނިސްޓްރީންް ވެސް އަންނަނީ ފުލުހުންނާއެކު އެ މައްސަލަ ތަހުގީގު ކުރަމުންނެވެ.