މިފަހަރު ވެސް މެޓް ގާލާގައި ވިދާލީ ބްލޭކް ލައިވްލީ

ފެޝަން ދުނިޔޭގެ އޮސްކާގެ ގޮތުގައި މަޝްހޫރު މެޓް ގާލާގައި މި އަހަރުގެ "ގިލްޑެޑް އޭޖް" ތީމުގެ ދަށުން މަޝްހޫރު ސެލެބްރިޓީންގެ އެންމެ ބޮޑެތި ހެދުންތައް ދައްކާލައިފި އެވެ.

ވޯގުން ރާވައިގެން ކުރިއަށް ގެންދާ މެޓް ގާލާގެ މިފަހަރުގެ ތީމަކީ އާޓިސްޓުންނަށް އެކި ގޮތްގޮތަށް ފުޅާކޮށްލެވެން އޮތް ތީމެއް ކަމަށް ވޯގުން ކުރިން ބުންޏެވެ.

ވޯގުން ބުނި ގޮތުގައި ގިލްޑެޑް އޭޖަކީ ރީޖެންސީ އެރާގައި އެމެރިކާ އަށް އައި ބަދަލުތައް ސިފަކޮށްދޭ ފެޝަނެވެ. މިއީ 19 ވަނަ ގަރުނު ނިމުމަށް ފަހު އެމެރިކާ އަށް އައި އިންޑަސްޓްރިއަލް ބަދަލުތައް ސިފަކޮށްދޭ ފެޝަން ކަމަށް ވޯގުން ބުނެ އެވެ.

އެ ތީމުގައި އެކި ސެލެބްރިޓީން ފެނުނީ ތަފާތު ގޮތްގޮތަށެވެ. ނަމަވެސް އެ ތީމާ އެކު އެންމެ ގިނަ ބައެއްގެ ސަމާލު ކަމަށް ލިބުނީ އެމެރިކާގެ އެކްޓަރު ބްލޭކް ލައިވްލީ އެވެ.

ބްލޭކްގެ ހެދުން ފުރަތަމަ ފެނުމާ އެކު ވެސް އެތައް ބަޔަކު ހައިރާން ކޮށްލި އެވެ. ބޮޑު ޓައިއެއް ލައިފާވާ އެ ހެދުން ޖާރީކޮށްފައި ވަނީ އެކި ކުލަކުލައިންނެވެ. ނަމަވެސް ރެޑް ކާޕެޓްގެ ވަކި ހިސާބަކަށް ދިޔުމާ އެކު، މުޅި ހެދުން އަނެއްކާ ބަދަލުވަނީ ޓައި ރޫޅާލައި ކުލަތައް ބަދަލުކޮށްލުމުންނެވެ. އެ ހެދުމުން ދެން ފެންނަނީ ތަފާތު ނޫ ކުލައަކުންނެވެ.

އެ ނޫކުލައަކީ އެމެރިކާގެ ނިއުޔޯކުގެ އެންމެ ފާހަގަކޮށްލެވޭ ސްޓެޗޫ އޮފް ލިބާޓީ ހަދާފައިވާ ގަލުގައި ހިމެނޭ ނޫ ކުލަ އެވެ. އެއީ އެ ސްޓެޗޫ ހެދުމަށް ބޭނުންކޮށްފައިވާ ގާތަށް އޮކްސިޑައިޒް ވެގެން އަންނަ ބަދަލަކުން އުފެދޭ ކުލައެކެވެ.

އޭގެ އިތުރުން ވެސް އެކި ކުލަތައް އެ ހެދުމުގައި ހިމެނޭ އިރު ނިއުޔޯކްގެ ތަރައްގީ އަށް އައި ބަދަލުތައް އެ ހެދުމުން ރަމްޒުކޮށްދެ އެވެ.

ބްލޭކްގެ ފިރިމީހާ އަދި މަޝްހޫރު އެކްޓަރު ރާޔަން ރެނޯލްޑްސް ވެސް ހުރީ އެ ހެދުން ފެނުމުން ހައިރާންވެފަ އެވެ.