ރަޝިޔާގެ ނަސްރުގެ ދުވަހު ވެސް ޒެޑް އަކުރު

ދެ ވަނަ ބޮޑު ހަނގުރާމައިގައި ނާޒީ ޖަރުމަން ސިފައިންގެ މައްޗަށް، އޭރުގެ ސޯވިއެޓް ޔޫނިއަންގެ ސިފައިން ހޯދި ކާމިޔާބީ ފާހަގަކުރާ ނަސްރުގެ ދުވަހުގެ ރަސްމިއްޔާތުތަކަށް ރަޝިޔާ ތައްޔާރުވެފައިވާ އިރު، މިފަހަރުގެ ނަސްރުގެ ދުވަހުގައި އެންމެ ހާއްސަވެގެންދާނީ، އިނގިރޭސި އަލިފުބާގެ "ޒެޑް" އަކުރެވެ.

ރަޝިޔާގައި ގައުމީ ފެންވަރުގައި ފާހަގަކުރާ ނަސްރުގެ ދުވަހަކީ ކޮންމެ އަހަރެއްގެ މެއި މަހުގެ 9 ވަނަ ދުވަހެވެ. މިއަހަރުގެ ނަސްރުގެ ދުވަސް ފާހަގަކުރުމަށް، ވެރިރަށް މޮސްކޯގެ ރަތް މައިދާނުގައި ބާއްވާ ރަސްމިއްޔާތުގައި، ކުރީ އަހަރުތަކެކޭ ވެސް އެއް ގޮތަށް އެންމެ ހާއްސަ ކަމަކަށް އޮންނާނީ، އެތައް ހަށް ސިފައިން ބައިވެރިވާ އަސްކަރީ ހިނގާލުމާއި އަސްކަރީ ހަތިޔާރުތައް ދައްކައިލުމެވެ.

މިއަހަރުގެ ނަސްރުގެ ދުވަހުގެ ރަސްމިއްޔާތުގެ އެންމެ ފަހުގެ ރިހާސަލް އިއްޔެ ބޭއްވި އިރު، އަސްކަރީ ދައްކައިލުމުގެ ކޮންމެ ހަރަކާތެއް ރަމްޒުކޮށްދިނީ، އިނގިރޭސި އަލިފުބާގެ "ޒެޑް" އަކުރެވެ. ރަތް މައިދާނުގެ މަތިން، ރަޝިޔާގެ ހަނގުރާމަތީ މަތިންދާބޯޓުތައް އުދުހެމުން ދިޔައީ ވެސް، ޒެޑް އަކުރު ސިފަވާ ބައްޓަމަށް އެތުރިގެންނެވެ.

މިފަހަރުގެ ރަސްމިއްޔާތުގައި "ޒެޑް" އަކުރު ހާއްސަވެގެން ދަނީ، ރަޝިޔާ ސިފައިން މިހާރު ޔޫކްރޭނާ ދެކޮޅަށް ކުރަމުންދާ ހަނގުރާމައިގައި ބައިވެރިވާ ރަޝިޔާގެ އަސްކަރީ ގިނަ އުޅަނދުތަކުގައި "ޒެޑް" އަކުރު ބޮޑުކޮށް ލިޔެފައިވާތީ އެވެ. ނަމަވެސް އެ ޒެޑް އަކުރުގެ މާނައަކީ ކޮބައިކަމެއް އަދި އެއިން ރަމްޒުކޮށްދެނީ ކޮން އެއްޗެއް ކަމެއް، ރަޝިޔާ އިން މިހާތަނަކަށް ނުބުނެ އެވެ.

މިދިޔަ ފެބްރުއަރީ މަހުގެ 24 ވަނަ ދުވަހު ފަތިހު، އެއްގަމާއި ވަޔާއި ކަނޑުމަގުން ރަޝިޔާ ސިފައިން ޔޫކްރޭނަށް ހަމަލާތައް ދޭން ފެށުމަށް ފަހު، އެއްގަމު މަގުން ޔޫކްރޭނަށް އެރި ރަޝިޔާގެ ޓޭންކުތަކާއި ސިފައިން އުފުލާ އުޅަނދުތަކުގައި، ބޮޑުއަކުރުން ޒެޑް ލިޔެފައި ހުރުމުން، ބައިނަލްއަގުވާމީ މީޑިއާތަކުގައި އެކަން ވަރަށް ބޮޑަށް ފާހަގަކުރި އެވެ. އަދި އެ އަކުރުގެ މާނަ އެކި ނޫސްތަކުން އެކި ގޮތްގޮތަށް ކުރަން ފެށުމާއެކު ސޯޝަލް މީޑިއާގައި ވެސް "ޒެޑް" އަކުރާ ބެހޭ ގޮތުން ބޮޑު ބަހުސެއް ފެށުނެވެ.

ޔޫކްރޭނަށް ވަދެގަތް ރަޝިޔާގެ އުޅަނދުތަކުގެ ތެރެއިން "ޒެޑް" އަކުރު ޖެހި ޓޭންކުތަކާއި އުޅަނދުތައް މައިގަނޑު ގޮތެއްގައި މިސްރާބު ޖެހީ ޔޫކްރޭންގެ ވެރިރަށް ކިޔޭވްއާ ދިމާއަށެވެ. އެހެންކަމުން ގިނަ ބަޔަކު މާނަކުރި ގޮތުގައި ޒެޑް އަކުރުން ފާހަގަކޮށްފައިވާ އުޅަނދުތަކަކީ، ކިޔޭވް ހިފައި ޔޫކްރޭންގެ ރައީސް ޒެލެންސްކީ އަވަހާރަކޮށްލުމަށް ނުވަތަ ހައްޔަރުކުރުމަށް ޚާއްސަކޮށްފައިވާ އުޅަނދުތަކެވެ.

ޖަރުމަން ވިލާތުގެ ނާޒީ ސިފައިން ބަލިކުރެވުނީ ރަޝިޔާ ސިފައިން ކުރި ވަރަށް މަތިވެރި ވަތަނީ ހަނގުރާމައަކުން ކަމަށް ރަޝިޔާ އިން ގަބޫލުކުރާއިރު، އެކާމިޔާބީ ފާހަގަކުރުމަށް މާދަމާ ބާއްވާ ރަސްމިއްޔާތުގައި ވެސް އެތައް ހާސް ސިފައިންނެއް ބައިވެރިވާނެ އެވެ. އަދި ރަޝިޔާގައި އުފައްދާފައިވާ އެންމެ ޒަމާނީ ހަތިޔާރުތައް ދައްކައިލާނެ އެވެ.

މިއަހަރުގެ ނަސްރުގެ ދުވަސް ފާހަގަކުރާ އިރު، ރަޝިޔާ އިން މިހާރު ޔޫކްރޭނާ ދެކޮޅަށް ކުރަމުންދާ ހަނގުރާމައިގައި ގިނަ އަދަދެއްގެ ސިފައިން ބައިވެރިވާތީ، މާދަމާގެ ރަސްމިއްޔާތުގައި ބައިވެރިވާ ސިފައިންގެ އަދަދު މަދުވާނެ ކަމަށް ބެލެވެ އެވެ. އެހެން ނަމަވެސް، ރަޝިޔާގެ 77 ވަނަ ނަސްރުގެ ދުވަސް ފާހަގަކުރުމަށް މާދަމާ ބާއްވާ ރަސްމިއްޔާތުގައި، އަސްކަރީ ޓޭންކުތަކާއި ހަތިޔާރުއެޅި އުޅަނދުތަކާއި މިސައިލްތަކާއި މިސައިލް ހަރުތައް ދައްކައިލާނެ ކަމަށް ބެލެވެ އެވެ.