ހަލަބު މިނިވަން ކުރުމަކީ އަސަދުގެ ވެރިކަން ނުވެއްޓޭނެކަމުގެ ހެއްކެއް: ހިޒްބުﷲ

ދިމިޝްގު (ޑިސެމްބަރު 26) - އިދިކޮޅު ހަނގުރާމަވެރިންގެ ބާރުގެ ދަށުން ސީރިއާގެ ހަލަބު ސިޓީ މިނިވަން ކުރުމަކީ ރައީސް ބައްޝާރުލް އަސަދުގެ ވެރިކަން ވައްޓާ ނުލެވޭނެ ކަމުގެ ހެއްކެއް ކަމަށް ލުބުނާނުގެ ޝިއައީ ޖަމާއަތް ހިޒްބުﷲ ގެ ލީޑަރު ހަސަން ނަސްރުﷲ ވިދާޅުވެއްޖެ އެވެ.

"ހަލަބުގެ ކާމިޔާބީ އަށް ފަހު ބުނެވިދާނެ ސީރިއާގެ ވެރިކަން ވައްޓާލަން މަސައްކަތް ކުރާ މީހުން ފެއިލް ވެއްޖެ ކަމަށް،" ސީރިއާ ސިފައިންނާ އެކު 2013 ވަނަ އަހަރުން ފެށިގެން ހަނގުރާމަ ކުރަމުންގެންދާ ހިޒްބުﷲ ގެ ލީޑަރު ވިދާޅުވި އެވެ.

އޭނާ ވިދާޅުވީ ސީރިއާގެ އެންމެ ބޮޑު ދެ ސިޓީ ކަމަށްވާ ވެރިރަށް ދިމިޝްގާއި ހަލަބުގެ ފުރިހަމަ ކޮންޓްރޯލް އޮތީ އަސަދަށް ކަމަށެވެ. އަދި ހިމްސް، ހަމާ، ލަޓަކިއާ، ޓަރްޓުސް، ސްވެއިޑާ ފަދަ ބޮޑެތި ސިޓީތަކުގެ ބާރު ވެސް އޮތީ ސީރިއާ ސަރުކާރަށް ކަމަށް ވިދާޅުވި އެވެ.

ހަލަބު މިނިވަން ކުރުމުގައި ސީރިއާ ސިފައިންނާ އެކު ހިޒްބުﷲ ގެ ހަނގުރާމަވެރިން ވެސް ވަނީ މުހިންމު ދައުރެއް އަދާކޮށްފަ އެވެ.

ނަސްރުﷲ ވިދާޅުވީ ހަލަބުގައި ކުރީ ހަގީގީ ހަނގުރާމައެއް ކަމަށާއި މި ހަނގުރާމަ އިން ސީރިއާ ސިފައިންނަށް ކާމިޔާބު ލިބުމުން އެ ގައުމަށް ސިޔާސީ ގޮތުން ހައްލެއް ހޯދިދާނެ ކަމުގެ އުއްމީދު ބޮޑުވެއްޖެ ކަމަށެވެ.

ސީރިއާ ސަރުކާރާ ދެކޮޅަށް 2011 ވަނަ އަހަރު ހަނގުރާމަ ފެށި ފަހުން މިހާތަނަށް ވަނީ 310،000 މީހުން މަރުވެފަ އެވެ.