ހުޅުމާލެ ދެ ވަނަ ފިޔަވަހީގައި އިސްލާމިކް ސެންޓަރެއް ހަދަނީ، ޑިޒައިނިންގެ އިނާމަށް 1 މިލިއަން ރުފިޔާ

ހުޅުމާލޭގެ ދެ ވަނަ ފިޔަވަހީގައި އިސްލާމިކް ސެންޓަރެއް އަޅަން ނިންމައި، އެ ތަން ޑިޒައިންކޮށްދޭނެ ބަޔަކު ހޯދަން މިއަދު އިއުލާނުކޮށްފި އެވެ.

އެ މިނިސްޓްރީގެ ވެބްސައިޓުގައި ބުނީ ޒަމާނީ ފެންވަރުގެ އިސްލާމިކް ސެންޓަރެއް ޑިޒައިން ކުރަން ބޭނުންވާ ކޮންމެ މީހަކަށް ވެސް އަންނަ އޮގަސްޓް 25ގެ ނިޔަލަށް ހުޅުވާލާފައިވާ ކަމަށެވެ.

އެ މުބާރާތުން އެއް ވަނައަށް ދާ މީހަކަށް ހަތް ލައްކަ ރުފިޔާ، ދެ ވަނައަށް ދެ ލައްކަ ރުފިޔާ އަދި ތިން ވަނައަށް ހުށަހަޅާފައި ވަނީ އެއް ލައްކަ ރުފިޔާ އެވެ. މުބާރާތަށް ހުށަހަޅާފައިވާ އިނާމްގެ ޖުމްލަ އަކީ އެއް މިލިއަން ރުފިޔާ އެވެ.

އެ ސެންޓަރުގެ ޑިޒައިންގައި ނަމާދުކުރެވޭނެ ތަނަކާއި ޕާކިން އޭރިއާއާ އޮފީސްބަޔަކާއި މަލްޓިޕާޕަސް ހޯލާއި ސެމިނާ ރޫމާއި ލައިބްރަރީއާ ސްޓާފް ކެންޓީނާއި ކްލާސްރޫމާއި ކޮމާޝަލް އޭރިޔާ އަދި ރެކްރިއޭޝަނަލް އޭރިއާއެއް ހިމެނޭނެ އެވެ.

މިނިސްޓްރީން ބުނީ އެ ޑިޒައިނަކީ މީގެ ކުރިން އެއްވެސް ތަނަކުން ބޭނުންކޮށްފައިނުވާ، އާ ޑިޒައިނަކަށް ވާން ޖެހޭނެ ކަމަށެވެ.

އެ މުބާރާތުގައި ބައިވެރިވުމަށް އިސްލާމިކް މިނިސްޓްރީގެ ވެބްސައިޓުގައިވާ ގޫގުލް ފޯމް މެދުވެރިކޮށް ހުށަހެޅުމަށް ވަނީ އެދިފަ އެވެ.

އިސްލާމިކް މިނިސްޓްރީން ވަނީ މާލޭގެ އިތުރުން ރ. އުނގޫފާރު އަދި ގދ. ތިނަދޫގައި އިސްލާމިކް ސެންޓަރު ހަދައިފަ އެވެ.