ބިހާރުގެ ސްކޫލް ޓެސްޓުން މަކަރު ހެދި ދަރިވަރުންގެ މައްސަލަ ފުލުހުން ބަލަނީ

ބިހާރު (ޖޫން 7) - ބިހާރު ސްޓޭޓުގެ ފަހު އިމްތިހާން ހެދި ދަރިވަރުންގެ ތެރޭން މަކަރު ހެދި ކަމަށް ފަޅާއެރި ހަތަރު ކުދިންގެ މައްސަލަ ފުލުހުންނަށް ހުށަހަޅައިފި އެވެ.

މި ހަތަރު ދަރިވަރުންނަކީ އެންމެ މަތިން މާކްސް ހޯދި ކުދިން ވެސް މެ އެވެ. ބިހާރުގެ އެޑިއުކޭޝަން ބޯޑުން ވަނީ މަކަރު ހެދި 13 ދަރިވަރެއްގެ ޓެސްޓް ހުކުރު ދުވަހު އަލުން ހަދައިފަ އެވެ. މި ކުދިން މަކަރު ހެދިކަން ފަޅާއެރީ ޕޮލިޓިކަލް ސައެންސަކީ ކެއްކުން ކަމަށް އާޓްސް ދަރިވަރެއް ކަމަށްވާ ރޫބީ ރާއީ ޓީވީ ޕްރޮގްރާމެއްގައި ބުނުމުންނެވެ. ރާއީގެ ޓެސްޓް ހައްދުވައިފައެއް ނުވެ އެވެ.

ބިހާރުގެ ސްކޫލް ނިންމާ ފަހު އިމްތިހާނުގައި މިލިއަނަކަށް ވުރެ ގިނަ ކުދިން ބައިވެރިވި އެވެ.

ބިހާރުގެ އެޑިއުކޭޝަން ބޯޑުން ވަނީ ޓެސްޓުގައި ކުދިން މަކަރު ހެދި ވިޝްނޫ ދޭވް ރާއި ކޮލެޖުގެ އެޑްމިނިސްޓްރޭޓަރުންނާ ދެކޮޅަށް ވެސް ޕޮލިހަށް މައްސަލަ ހުށަހަޅައިފަ އެވެ.

ބިހާރު ސްޓޭޓުގައި މިދިޔަ އަހަރު ދަރިވަރުން ޓެސްޓް ހަދަމުން ދަނިކޮށް ބެލެނިވެރިން ފާރު މަތިން އަރައިގެން ދަރިވަރުންނަށް ޖަވާބު ކަރުދާސް ދެނިކޮށް ވަނީ ފޮޓޯ ނަގައިފަ އެވެ. އޭގެ ފަހުން ސްޓޭޓުގެ ސަރުކާރުން ވަނީ ޓެސްޓުގައި މަކަރު ހަދާ ކުދިންނަށް ހަރުކަށި އަދަބު ދޭނެ ކަމަށް ބުނެފަ އެވެ. އޭގެ ތެރޭގައި ޖަލަށްލުން ވެސް ހިމެނެ އެވެ. ނަތީޖާއެއްގެ ގޮތުން މި އަހަރުގެ ޓެސްޓުގައި ދަރިވަރުން ފާސްވި ރޭޓް ވަރަށް ދަށެވެ.