ކުޑަގިރި ޕިކްނިކް އައިލެންޑް ރައީސް ބައްލަވާލައްވައިފި

16 ޖޫން 2022

ޕިކްނިކް އައިލެންޑްގެ ގޮތުގައި ތަރައްގީކުރާ ކ. ކުޑަގިރީގެ މަސައްކަތްތައް ރައީސް އިބްރާހިމް މުހައްމަދު ސޯލިހު މިއަދު ބައްލަވާލައްވައިފި އެވެ.

މާއިދާ މުހައްމަދު ރަޝާދު

ކުޑަގިރި ފަޅު ހިއްކައިގެން ޕިކްނިކް އައިލެންޑެއް ހެދުމުގެ މަސައްކަތް އެމްޓީސީސީއާ ހަވާލުކޮށްގެން ކުރަމުންނއަންނައިރު މިއީ މާލޭ ސަރަހައްދުގައި ޕިކްނިކް ދާނެ ރަށެއް ނެތުމުގެ މައްސަލަ ހައްލުކުރުމުގެ ގޮތުން ތަރައްގީކުރާ ތަނެކެވެ.

ރައީސް އޮފީހުން ބުނީ ކުޑަގިރިއަށް ވަޑައިގެން ޕިކްނިކް އައިލެންޑްގެ ސައިޓް ރައީސް ބައްލަވާލައްވާފައިވާ ކަމަށާއި އެމަނިކުފާނު ވަނީ އެތަން ފެހިކުރުމަށް ކުރާ މަސައްކަތުގެ ދަށުން ރުކެއް ވެސް އިންދަވާފައި ކަމަށެވެ. އެމަނިކުފާނާ އެކު މިދަތުރުފުޅުގައި ނައިބް ރައީސް ފައިސަލް ނަސީމް ވެސް ބައިވެރިވެވަޑައިގަތެވެ.

President @ibusolih visits the picnic island development site on Kudagiri Island in the Kaafu Atoll and assesses the projects’ progress. He also joined in tree planting activities held to make the island greener. pic.twitter.com/WZZ9JysT0B
— The President's Office (@presidencymv) June 16, 2022

އަންނަ މަހު ޕިކްނިކް އައިލެންޑް ހުޅުވުމުގެ މަސައްކަތްކުރަމުން އަންނައިރު އެތަނަށްދާ މީހުންނަށް ފެންވެރޭނެ ގޮތް ހެދުމަށް ފާހާނާ އާއި ކޮޓަރި އަދި މިސްކިތް ގާއިމުކުރުމުގެ މަސައްކަތް ވެސް މިހާރު ދަނީ ކުރަމުންނެވެ.

މާލޭ މީހުންނަށް ޕިކްނިކް ދިއުމަށް ވަކި ރަށެއް ގާއިމުކުރުމަކީ މި ސަރުކާރުގެ ވައުދެކެވެ. ކުޑަގިރު ތަރައްގީކުރަން ފެށުމުގެ ކުރިން ސަރުކާރުން އެންމެ ފުރަތަމަ ނިންމީ ކ. އެނބޫދޫފަޅުގައި ހިއްކާފައިވާ ރަށެއްގައި ޕިކްނިކް އައިލެންޑް ހެދުމަށެވެ. އެކަމަކު ސަރުކާރުގެ ނިންމުން ބަދަލުކޮށް ފަހުން ނިންމީ ކުޑަގިރިއަށް ޕިކްނިކް އައިލެންޑް ބަދަލުކުރާށެވެ.

Comments