ޕިކްނިކް ދާނެ ރަށްތަކެއް ސަރުކާރުން ހަމަޖައްސަނީ

ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުން ޕިކްނިކް ދާނެ ރަށްތަކެއް ރައީސް އިބްރާހިމް މުހައްމަދު ސޯލިހް (އިބޫ) ގެ ވެރިކަމުގެ 100 ދުވަހުގެ ތެރޭގައި ހަމަޖެއްސުމަށް އަމާޒު ހިފައިފި އެވެ.

މާލެ ސަރަހައްދުގައި ދިވެހިން ދަތުރު ދާން ބޭނުންކުރި ހުރިހާ ރަށެއް ޓޫރިސްޓު ރިސޯޓުތަކަށް ވަނީ ހަދައިފަ އެވެ. އޭގެ ތެރޭގައި ކުޑަބަނޑޮހާއި މާދޫފިނޮޅާއި ފޭދޫ ފިނޮޅު ހިމެނެ އެވެ. އެހެންވެ، ޕިކްނިކް ދިއުމަށް ހާއްސަ ރަށްތަކެއް ކަނޑައެޅުމަކީ ރައީސް އިބްރާހިމް މުހައްމަދު ސޯލިހްގެ ރިޔާސީ ވައުދެކެވެ.

އާ ސަރުކާރުން ކުރިއަށް އޮތް 100 ދުވަހު ކުރުމަށް ހަމަޖެހިފައިވާ ކަންކަމުގެ ތެރޭގައި މާލޭގެ ރައްޔިތުން ހަފުތާ ބަންދުގައި އާއިލާއާ އެކު ދަތުރު ދިޔުމަށް މާލެއާ ކައިރިން ރަށެއް ހާއްސަ ކުރުމަށް ވަނީ ނިންމައިފަ އެވެ. އެކަމަކު، އެއީ ކޮން ރަށެއް ކަމެއް ސަރުކާރުން އަދި ނުބުނެ އެވެ.

މީގެ އިތުރުން، ޕިކްނިކް ދާނެ ސަރަހައްދެއް ނެތް ރަށްރަށުގެ ރައްޔިތުން ޕިކްނިކް ދިޔުމަށް ސަރަހައްދެއް ނުވަތަ ރަށެއް ކަނޑައަޅަން ވަނީ ނިންމައިފަ އެވެ. ޕިކްނިކް ދާނެ ރަށްތަކެއް ހަމަޖައްސަން ސަރުކާރުން އަމާޒު ހިފާފައި ވަނީ ކުރިއަށް އޮތް ތިން މަސް ދުވަހުގެ ތެރޭގަ އެވެ.

ސަރުކާރުން ވަނީ ހަފުތާ ނިންމުން ފާހަގަ ކުރުމުގެ ގޮތުން "ވީކެންޑް މާކެޓް" އާއި މުނިފޫހިފިލުވުމުގެ ހަރަކާތްތަކެއް ފެށުމަށް ނިންމައިފަ އެވެ. އެކަން ކުރިއަށް އޮތް ދެ މަސް ދުވަހުގެ ތެރޭގައި ފުރިހަމަ ކުރާ އިރު، ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ވެސް ހަފުތާ ނިމުން ފާހަގަ ކުރި އެވެ.

ކުރިއަށް އޮތް ތިން މަސް ތެރޭގައި ރާޅުގަނޑު، އާޓިފިޝަލް ބީޗް، ރަސްފަންނު، އުސްފަސްގަޑު، ސިޓީ ޕާކް، ލޮނުޒިޔާރަތްކޮޅު ސަރަހައްދު ހިތްފަސޭހަ ތަނަކަށް ހެދުމަށް ވަނީ ނިންމައިފަ އެވެ. އަދި ދެ މަސް ތެރޭގައި ހުޅުމާލޭގައި ރޭގަނޑު މޫދަށް އެރެވޭނެ ގޮތާއި، މޫދުން އަރައިގެން ފެންވެރޭނެ ގޮތް ހަދަން ވަނީ ނިންމައިފަ އެވެ.

ޕިކްނިކް ދާނެ ރަށްތަކެއް ސަރުކާރުން ހަމަޖައްސާ އިރު، މާލެ އަތޮޅުގެ ގިނަ ފަޅުތަކެއް ރައީސް އަބްދުﷲ ޔާމީންގެ ސަރުކާރުން ވަނީ ވިއްކާލައިފަ އެވެ. އެހެންކަމުން މާލެ އާއި މި ސަރަހައްދުގައި ދިރިއުޅޭ އާއްމުންނަށް ހިތްހަމަޖައްސާލަން ދަތުރު ދެވޭނެ ފަޅުރަށެއް ކައިރިޔަކު ނެތެވެ.

ކުޑަބަނޑޮހާއި ފޭދޫފިނޮޅު ރިސޯޓުގެ ގޮތުގައި ތަރައްގީ ކުރަން ކުރީގެ ސަރުކާރުން ދިނުމާ ގުޅިގެން އެތައް ބައެއްގެ ނުރުހުން ރައީސް ޔާމީންގެ ސަރުކާރަށް އަމާޒުވި އެވެ.