އެމްއެސްއެސްގެ އާ ބޯޓު ރާއްޖެ ގެނެސްފި

އެސްޓީއޯގެ ދަށުން ހިންގަމުން އަންނަ މޯލްޑިވްސް ސްޓޭޓް ޝިޕިން (އެމްއެސްއެސް) ގެ ތިންވަނަ ބޯޓު "އެމްވީ އެމްއެސްއެސް ގްރެފީން" ރާއްޖެ ގެނެސްފި އެވެ.

ޖަރުމަނުގެ "ކެންޑްލާ" ކުންފުނިން ގަތް އާ ކޮންޓެއިނާ ބޯޓު އެމްއެސްއެސްއާ ހަވާލުކުރުމާއި އެއަށް ފައިސާ ދެއްކުން އެސްޓީއޯގައި މިއަދު ވަނީ ބާއްވައިފަ އެވެ. އެސްޓީއޯގެ ފަރާތުން ފައިސާގެ އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު ހުސައިން އަމްރެވެ. މިއީ ބޯޓެއް ގަތުމުގެ މުއާމަލާތެއް ރާއްޖޭގައި ކުރި ފުރަތަމަ ފަހަރެވެ.

މިހާރުވެސް ދަތުރު ކުރަމުން އަންނަ އެމްއެސްއެސް ގެލީނާގެ ސިސްޓަ ވެސެލް ނުވަތަ އެއާ އެއްސައިޒުގެ އާ ބޯޓުން 420 ލޯޑް ކޮންޓެއިނާ އުފުލޭނެ އެވެ. އަދި ހުސްކޮށް ނަމަ 680 ކޮންޓެއިނާ އުފުލެ އެވެ. އޭގެތެރޭގައި ފިނިކުރި ތަކެއްޗަށް ހާއްސަ 60 ރީފާ ކޮންޓެއިނަރު ހިމެނެ އެެވެ.

އެމްއެސްއެސްގެ މެނޭޖިން ޑިރެކްޓަރު ކެޕްޓަން އަބްދުﷲ ސައީދު ވިދާޅުވީ އަލަށް ގެނައި އެމްއެސްއެސް ގްރެފީންގެ ދަތުރުތައް އަންނަ އޮގަސްޓް މަހު ފަށާނެ ކަމަށާއި އެ ބޯޓު ދަތުރު ކުރާނީ ސިންގަޕޯ، މެލޭޝިއާ އަދި މާލެ ރޫޓުން ކަމަށެވެ.

"މިއަދު މި ނިމުނީ ސޭލް އެންޑް ޕާޗެއްސް އެގްރީމެންޓް. ދެން އޮތީ ބޯޓުގެ ރަޖިސްޓްރީ ބަދަލުކުރުން. ރާއްޖޭގެ ދިދައިގެ ދަށަށް ބޯޓު ރަޖިސްޓްރީ ކުރެވޭ ހިސާބުން އަދި ބޯޓުގެ ނަން ރަސްމީކޮށް ބަދަލުކުރެވޭނީ އެމްވީ އެމްއެސްއެސް ގްރަފީން އަށް،" ކެޕްޓަން ސައީދު ވިދާޅުވި އެވެ.

އެ ބޯޓުގައި އެމްއެސްއެސް ޖަހާފައި އޮން ނަމަވެސް، ބޯޓަށް އެސްޓީއޯއިން ކިޔަން ނިންމާފައިވާ ނަން "އެމްވީ އެމްއެސްއެސް ގްރަފީން" މިވަގުތު ފެންނާކަށް ނުހުރެ އެވެ.

އަމްރު ވިދާޅުވީ ކުރިމަގުގައި އެމްއެސްއެސްގެ ހިދުމަތް ފުޅާކުރެވި ރާއްޖޭގެ އިގްްތިސޯދުގެ ތިން ވަނަ އިންޑަސްޓްރީ ނުވަތަ އެއަށް ވުރެ ވެސް ކުރިއަށް ޝިޕިން އިންޑަސްޓްރީ ގެންދިއުމުގެ ޕްލޭނަކާއި އުންމީދެއް އެބައޮތް ކަމަށެވެ.

"މި ބޯޓާ އެކު މިހާރު ކުރިއަށް އެބަގެންދަން އަމިއްލަ ކޮންޓެއިނަރު ހޯދުމަށް، އެމްއެސްއެސް ގެ ލޯގޯ ޖަހައިގެން. އޭގެ ސަބަބުން މި ހިދުމަތް އިތުރަށް ފުޅާވާނެ. އަދި އިތުރު ވަޒީފާތަކެއް ވެސް އުފެދިގެންދާނެ," އަމްރު ވިދާޅުވި އެވެ.

އަމްރު ވިދާޅުވި ގޮތުގައި، މިހާރު ދިމާވެފައި އޮތް އެންމެ ބޮޑު ގޮންޖެހުމަކީ އެމްއެސްއެސް ހަލުވި ކަމާއެކު ފުޅާވަމުންދާއިރު އެ ދާއިރާގައި މީހުން ބިނާވެފައި ނެތުމެވެ. އެކަން ހައްލުކުރުމުގެ ގޮތުން އެ ކުންފުނިން އަންނަނީ އެމްއެންޔޫއާ ގުޅިގެން އެ ދާއިރާ އަށް ޝައުގުވެރިކަން ހުންނަ ކުދިންނަށް ހިލޭ ކިޔެވުމުގެ ފުރުސަތު ދެމުންނެވެ.

އެމްއެސްއެސްގެ ތިން ބޯޓުގައި މަސައްކަތް ކުރަނީ ގާތްގަނޑަކަށް 12 ބިދޭސީންނެވެ. ކެޕްޓަނުންނާއި އޮފިސަރުންނާއި އިންޖިނޭރުންގެ ގޮތުގައި ދިވެހިން މަސައްކަތް ކުރި ނަމަވެސް، އިތުރަށް ބޯޓެއް ގަންނަ ނަމަ، އެއަށް ބޭނުންވާ އަދަދަކަށް ދިވެހިން ތަމްރީނުވެފައި މިހާރު ނެތްކަން ސައީދު ފާހަގަކުރެއްވި އެވެ.