ބޯހިޔާވަހިކަމުގައި ފަނޑިޔާރުންނަށް ލުޔެއް، އެކަމަކު ރިޓަޔާވެވޭނީ 65 އަހަރުން

ބޯހިޔާވަހިކަން ހޯދުމުގައި ފަނޑިޔާރުންނަށް ލުޔެއް ހޯދައިދިނުމުގެ ގޮތުން ފްލެޓް މަޝްރޫއުތަކަށް ކުރިމަތިލެވޭނެ ގޮތް އިންތިޒާމު ހަމަޖައްސައި އަމިއްލައަށް އެދިގެން ވަޒީފާ އިން ވަކިވެވޭނެ އުމުރަކީ 65 އަހަރު ކަމުގައި ކަނޑައަޅަން ފަނޑިޔާރުންގެ ގާނޫނަށް އިސްލާހު ހުށަހަޅައިފި އެވެ.

އެޓާނީ ޖެނެރަލްގެ އޮފީހުން މިއަދު ބުނީ ފަނޑިޔާރުންނަށް ލިބިދޭ އިނާޔަތްތަކުގެ އޮނިގަނޑު އިސްލާހުކުރުމަށާއި އެ ނޫންވެސް ބައެއް މުހިންމު އިސްލާހުތައް ގެނައުމަށް ސަރުކާރުން ނިންމައި މަޖިލީހަށް ފޮނުވާފައިވާ ކަމަށެވެ.

އެންމެ މުހިއްމު ކަމެއްގެ ގޮތުގައި އޮތީ ބޯހިޔާވަހިކަން ހޯދުމުގައި އޮތް ހުރަސް ލުއިކޮށްދީ، ސަރުކާރާއި އަމިއްލަ ފަރާތްތަކުން ހުޅުވާލާ ބޯހިޔާވަހިކަމުގެ މަޝްރޫއުތަކަށް ވެސް ކުރިމަތިލެވޭނެ ގޮތް ހެދުމެވެ.

އެޓާނީ ޖެނެރަލްގެ އޮފީހުން ބުނި ގޮތުގައި ފަނޑިޔާރުންގެ ތެރެއިން ދިރިއުޅޭނެ އަމިއްލަ ތަނެއް ނެތް ފަނޑިޔާރުންނަށް އެފަދަ ތަނެއް ހޯދޭނެ މަގު ފަހިކޮށްދިނުމުގެ ގޮތުން، ސަރުކާރުން ނުވަތަ އަމިއްލަ ފަރާތްތަކުން ހިންގާ ބޯހިޔާވަހިކަމުގެ މަޝްރޫއުތަކުގެ ދަށުން ދޫކުރާ ބިމާއި ފްލެޓަށް ފަނޑިޔާރުންނަށް ކުރިމަތިލެވޭނެ އިންތިޒާމުތައް ހަމަޖައްސަންވާނެ ކަމުގައި ގާނޫނުގައި ކަނޑައަޅާ ގޮތަށް އިސްލާހު ގެނައުމަށް ވަނީ ނިންމައިފަ އެވެ.

ހުށަހެޅި ބައެއް އިސްލާހުތައް:

- ފަނޑިޔާރުންނަށް ލިބިދެވޭ އިނާޔަތްތަކުގެ ތެރޭގައި ހިމެނޭ ލިވިން އެލަވަންސް ފަނޑިޔާރުންނަށް ލިބިދެވޭ އުސޫލު އިސްލާހްކޮށް އެ އެލަވަންސްގެ މިންވަރަކީ ފަނޑިޔާރުންގެ އަސާސީ މުސާރައިގެ 35 ޕަސެންޓަށް ވުރެން މަދުނުވާނެ އަދަދެއް ކަމުގައި ގާނޫނުގައި ކަނޑައެޅުން.

- ފަނޑިޔާރުކަމުގެ މަސައްކަތްތަކުގެ އިތުރުން ފަނޑިޔާރުން ކުރުން ގާނޫނު ހުއްދަކުރާ އެހެން މަސައްކަތަކަށް އުޖޫރަ ބަލައިގަތުމަކީ ގާނޫނުގައި ކަނޑައަޅާފައިވާ ދާއިރާގެ ތެރޭގައި ހުއްދަ ކަމެއް ކަމުގައި ކަނޑައެޅުން.

- ފަނޑިޔާރުކަމަށް ކުރިމަތިލާ މީހުންގެ ކިބައިގައި ފުރިހަމަވާންޖެހޭ ޝަރުތުތަކުގެ ތެރެއިން، މެޖިސްޓްރޭޓް ކޯޓުތަކުގެ ފަނޑިޔާރު ކަމަށް ބޭނުންވާ ފެންވަރަށް ތަޖުރިބާ ލިބިފައިވާ މީހުން ކަނޑައެޅުމުގައި އަމަލުކުރާ އުސޫލު އިސްލާހްކުރުން.

- މެޖިސްޓްރޭޓް ކޯޓެއްގެ ނުވަތަ އެހެން ކޯޓެއްގެ ލީގަލް އެސިސްޓެންޓް ކަމުގެ މަގާމުގައި، ނުވަތަ މަގާމުގެ މަސްއޫލިއްޔަތުގެ ގޮތުގައި ގާނޫނީ މަސައްކަތްކުރުން ކަނޑައެޅިފައިވާ އެފަދަ އެހެން މަގާމެއްގައި 2 އަހަރު ދުވަހުގެ ތަޖުރިބާ ހޯދާފައިވާ ފަރާތްތަކަށް އެ މަގާމަށް ކުރިމަތިލެވޭ ގޮތަށް ހަމަޖެއްސުން.

- ފަނޑިޔާރުން އަމިއްލައަށް އެދިގެން ފަނޑިޔާރުކަމުގެ މަގާމުން ވަކިވެވޭނެ އުމުރަކީ 65 އަހަރު ކަމުގައި ކަނޑައެޅުން.

މީގެ ކުރިން އަމަލުކުރަމުން އައީ އުމުރުން 55 އަހަރު ވުމުން ވެސް އަމިއްލައަށް ރިޓަޔާވެވޭ ގޮތަށެވެ.