ސިނަމާލެ ބްރިޖް ހެދިއިރު ކަނޑަށް ވައްޓާލި ހޮޅިއަކުން އަދިވެސް ފަރަށް ގެއްލުންވަނީ

ސިނަމާލޭ ބްރިޖުގެ މަސައްކަތްކުރިއިރު އެ ސަރަހައްދުގެ ކަނޑަށް ވެއްޓިފައި އޮތް ދަގަނޑެއް ނުނަގާ ގިނަ ދުވަސްވަމުންދާތީ އެ ސަރަހައްދުގެ ފަރަށް ބޮޑެތި ގެއްލުންތަކެއްވަމުންދާ މައްސަލައެއް ފެންމަތިވެއްޖެ އެވެ.

މާލޭގެ ލޮނުޒިޔާރާތްކޮޅުގައި ސިނަމާލޭ ބްރިޖުގެ މަސައްކަތް 2016 ވަނަ އަހަރު ފަށައިގެން 2018 ވަނަ އަހަރުގެ ސެޕްޓެމްބަރާ ހަަމައަށްކުރިއިރު އެ ސަރަހައްދުގެ ކަނޑަށް ގިނަ އަދަދެއްގެ ދަގަނޑު ހޮޅިތަކާއި ކުނި އަޅާފައި ހުއްޓެވެ. އެހެންވެ އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން ވަނީ ހައުސިން މިނިސްޓްރީ ނުވަ ލައްކައެއްހާ ރުފިޔާ އިން ޖޫރިމަނާ ވެސް ކޮށްފަ އެވެ.

ޗައިނާގެ ސީސީސީސީ ކުންފުންޏާ ހަވާލުކޮށްގެން ބްރިޖުގެ މަސައްކަތްކުރީ ހައުސިން މިނިސްޓްރީގެ ބެލުމުގެ ދަށުންނެވެ. އެ ކުންފުންޏަށް ދިން އީއައިއޭ ޑިސިޝަން ސްޓޭޓްމަންޓުގައިވާ ގޮތުން އެއާ ހިލާފަށް ކަމެއް ހިނގައިފި ނަމަ އެކަމެއް އީޕީއޭ އަށް ރިޕޯޓުކުރަން ޖެހުނަސް ކަނޑަށް ހޮޅިއެޅި މައްސަލަ ރިޕޯޓް ކޮށްފައެއް ނުވެ އެވެ.

އެހެންވެ ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދަށް ރިއާޔަތްކޮށް ޖުމްލަ، 892،500ރ. އިން މިނިސްޓްރީ ޖޫރިމަނާކުރީ 2019 ގެ ޖުލައި މަހުގެ ތެރޭގަ އެވެ. އޭގެ ފަހުން އެ އަހަރުގެ ސެޕްޓެމްބަރު ހިސާބުގައި އެ ކުންފުނިން ވަނީ އެތަނަށް އެޅިފައިވާ ދަގަނޑު ހޮޅިތައް ނެގުމުގެ މަސައްކަތް ފަށާފައިވާ ކަމަށް ވެސް ބުނެފަ އެވެ.

ދަގަނޑު ހޮޅިތަކާއި ކުނިތައް ނަގައި އެތަން ސާފުކުރިޔަސް އެތަނުގައި އަދިވެސް އެ މަސައްކަތްކުރިއިރު ވައްޓާލި ބޮޑު ދަގަނޑުގަނޑެއް އެބައޮތެވެ. އޭގެ ސަބަބުން އެ ސަރަހައްދަށް ގެއްލުންވަމުންދާ ކަމަށް އެތަނުގައި ރާޅާ އަޅާ މީހުން ބުނެ އެވެ. އާންމުވެފައިވާ ފޮޓޯއިން ފެންނަ ގޮތުގައި ވެސް އެ ދަގަނޑު އެތަނުގައި އޮންނަތާ ގިނަ ދުވަސްވުމުގެ ސަބަބުން ފަރުގެ މުރަކަތަކާއި ގާތަށް އޮތީ އަޑިއަށް ގޮސްފަ އެވެ.

އެތަނުގެ ވީޑިއޯއަކާ އެކު ކަންބޮޑުވުން ފާޅުކުރި މީހަކު ބުނީ އެ ދަގަނޑަކީ ބްރިޖުގެ މަސައްކަތްކުރިއިރު ވައްޓާލާފައި އޮތް ދަގަނޑެއް ކަމަށާއި އެދަނޑު އޮތީ ރާޅާ އަޅާ ސަރަހައްދުގައި ކަމަށެވެ. އެތަނުގައި އޭތި އޮތުމުގެ ސަބަބުން ރާޅު ނަގައި ކޮންމެ ފަހަރަކު އެ ދަނޑުގަނޑު ފަރުގައި ޖެހި ބޮޑެތި ގެއްލުންތަކެއް އެތަނަށް ވަމުންދާ ކަމަށް ބުންޏެވެ.

އީޕީއޭ ޓެގްކޮށް ކޮށްފައިވާ އެ ޓްވީޓުގައި ވަނީ އެފަރަށް އެހާ ގެއްލުންވަމުންދާއިރު އެކަން އެނގޭތޯ ސުވާލުކޮށްފަ އެވެ.

އޭނާ ބުނީ މިދުވަސްވަރަކީ ނޭޝަނަލް ޖޫނިއާ ޗެމްޕިއަންޝިޕަށް ޓްރެއިންވުމުގެ ގޮތުން އެ ސަރަހައްދުގައި ހަގު ސާފަރުން ޓްރެއިނިންތައް ހަދަމުންދާ ދުވަސްވަރެއް ކަމަށާއި އެ ދަގަނޑު އޮތީ އެ ކުދިން ރާޅާ އެޅުމަށް އަރާ ތަނުގެ ސީދާ އަޑީގައި ކަމަށެވެ. އެހެންވެ، އެއިން ކުއްޖަކަށް އަނިޔާވެއްޖެ ނަމަ، މާލޭގެ މޭޔަރު ޑރ. މުހައްމަދު މުއިއްޒު އެކަމުގެ ޒިންމާ ނަންގަވާނެތޯ އާއި އެތަން ސާފުކުރުމަކީ އޭނާ ކުރައްވަން ޖެހޭ ކަމެއް ކަމަށް ބުނެ ނުރުހުން ފާޅުކޮށްފައިވެ އެވެ.

މާލެ-ވިލިމާލެ ބްރިޖުގެ މަސައްކަތަށް ބޭނުންކުރާ ޕްލެޓްފޯމެއް ވިލިމާލެ ފަރަށް އަރައިގެން ވެސް ދާދިފަހުން ވަރަށް ބޮޑަށް ގެއްލުންވި އެވެ. އެތަނުގައި ބޮޑެތި ވަޅުތައް ހެދިފައި ހުއްޓަސް އެކަމާ ގުޅިގެން މިހާތަނަށް އެ މަސައްކަތްކުރި އެފްކޮންސް ކުންފުނި ޖޫރިމަނާކޮށްފައެއް ނުވެ އެވެ.