ރައީސް، ޓޫރިޒަމްގެ ކާމިޔާބީ ފާހަގަކުރަން އެމްއެމްޕީއާރުސީގެ އޮފީހަށް

މި އަހަރު ބޭއްވި ވޯލްޑް ޓްރެވެލް އެވޯޑްސްގައި ރާއްޖެ އަށް ލިބުނު ކާމިޔާބީ ފާހަގަކުރުމަށް ރައީސް އިބްރާހިމް މުހައްމަދު ސޯލިހު އެމްއެމްޕީއާރުސީގެ އޮފީހަށް މިއަދު ވަޑައިގެން، އެ ތަނުގެ މުވައްޒަފުންނާ ބައްދަލުކުރައްވައިފި އެވެ.

ރައީސް އޮފީހުން ބުނީ ރާއްޖޭގެ ޓޫރިޒަމް އިޝްތިހާރުކޮށް، ރާއްޖެ އަށް ރީތި ނަން ހޯދައިދިނުމަށް އެމްއެމްޕީއާރުސީގެ ވެރިންނާއި މުވައްޒަފުން ކުރާ ބުރަ މަސައްކަތް އަގުވަޒަން ކުރުމުގެ ގޮތުން ރައީސް މިއަދު އެތަނަށް ވަޑައިގެންނެވި ކަމަށެވެ. އެ ޒިޔާރަތުގައި އެމްއެމްޕީއާރުސީގެ އިސްވެރިންނާއި މުވައްޒަފުންނާ ބައްދަލުކުރައްވައި، އެ ބޭފުޅުންގެ މަސައްކަތަށް ރައީސް ޝުކުރު އަދާކުރެއްވި ކަމަށް ރައީސް އޮފީހުން ބުންޏެވެ.

"ރައީސުލްޖުމްހޫރިއްޔާގެ ވާހަކަފުޅުގައި ވޯލްޑް ޓްރެވަލް އެވޯޑްސްގައި، ވޯލްޑް ލީޑިން ޑެސްޓިނޭޝަން އެވޯޑާއި ވޯލްޑް ލީޑިން ޓޫރިސްޓް ބޯޑް އެވޯޑް ރާއްޖެއަށް ލިބިފައި ވާތީ އެކަން ހާއްސަގޮތެއްގައި ފާހަގަކުރައްވައި، އެމްއެމްޕީއާރްސީގެ ވެރިންނާއި މުވައްޒަފުންނަށް ޝުކުރާއި މަރުހަބާ ވިދާޅުވި އެވެ،" އެ އޮފީހުން ބުންޏެވެ.

"ވޯލްޑް ލީޑިން ޓޫރިސްޓް ބޯޑް" އެވޯޑް ރާއްޖެއަށް ލިބުނު މިއީ އަދި ފުރަތަމަ އަހަރެވެ. އެކަމަކު "ވޯލްޑް ލީޑިން ޑެސްޓިނޭޝަން"ގެ އެވޯޑު ރާއްޖެއަށް ވިދިވިދިގެން ލިބުނު މިއީ ތިން ވަނަ އަހަރެވެ.

ރައީސްގެ ވާހަކަފުޅުގައި، ކޮވިޑްގެ އެންމެ ދަތި ދުވަސްވަރު ވެސް ރާއްޖެ އިޝްތިހާރުކުރުމަށް އެމްއެމްޕީއާރުސީން ކުރި މަސައްކަތްތައް ފާހަގަކުރެއްވި އެވެ.

"ފަތުރުވެރިކަމަކީ ރާއްޖޭގެ އިގުތިސާދުގެ މައި ނާރުކަން ފާހަގަކުރައްވައި، ފަތުރުވެރިކަން ކުރިއަރުވައި އިޝްތިހާރުކުރުމަށް އެމްއެމްޕީއާރްސީން ކުރަމުން ގެންދާ މަސައްކަތްތަކަށް ސަރުކާރުގެ ފުރިހަމަ އެއްބާރުލުން ލިބިގެންދާނެ ކަމުގެ ޔަގީންކަން ރައީސުލްޖުމްހޫރިއްޔާ ދެއްވި އެވެ،" ރައީސް އޮފީހުގެ ވެބްސައިޓްގައި ވެ އެވެ.

އެމްއެމްޕީއާރުސީ އަށް ރައީސް އިބްރާހިމް މުހައްމަދު ސޯލިހު ކުރެއްވި ޒިޔާރަތުގައި އެ އިދާރާގެ މުވައްޒަފުންގެ ފަރާތުން އެ މަނިކުފާނަށް ހާއްސަ ހަނދާނީ ފިލައެއް އެރުވި އެވެ. ޓޫރިޒަމް އިޝްތިހާރުކުރުމުގައި ގެންގުޅޭ "ޓޭލްސް އޮފް މޯލްޑިވްސް" ފޮތްތަކުގެ ކޮޕީއަކާއި ޓޫރިޒަމް އިޝްތިހާރުކުރުމަށް އެމްއެމްޕީއާރުސީން މިދިޔަ އަހަރު ކުރި މަސައްކަތްތަކުގެ މައުލޫމާތު ހިމެނޭ ފޮތެއް ވެސް އެރުވި އެވެ.

ދުނިޔޭގެ ޓޫރިޒަމް ދާއިރާގަައި ދެވޭ އެންމެ ޝަރަފުވެރި އެވޯޑު، "ވޯލްޑް ލީޑިން ޑެސްޓިނޭޝަން" މި އަހަރު ރާއްޖެއިން ކާމިޔާބު ކޮށްފައި ވަނީ ދުނިޔޭގައި ފާހަގަކޮށްލެވޭ މަންޒިލްތައް ކަމަށްވާ ދުބާއިީ އާއި އިންޑޮނީޝިއާ ފަދަ ގައުމުތައް ހިމެނޭހެން 18 ގައުމަކާ ވާދަކޮށްގެންނެވެ.

ވޯލްޑް ޓްރެވެލް އެވޯޑަކީ ޓޫރިޒަމްގެ ދާއިރާގައި ބައިނަލްއަގްވާމީ ގޮތުން ދެވޭ އެންމެ ފާހަގަކޮށްލެވޭ އަދި އެންމެ ޝަރަފުވެރި އެވޯޑެވެ. ރާއްޖެއިން، 1993 ވަނަ އަހަރުން ފެށިގެން ކޮންމެ އަހަރަކުވެސް އެ އެވޯޑުގައި ބައިވެރިވެ ގިނަ ކާމިޔާބީތަކެއް ހޯދާފައިވެ އެވެ.