މަޝްރޫއުތަކެއް ފައްޓަވައިދެއްވުމަށް ރައީސް ހުވަދޫގެ ތިން ރަށަކަށް

ތަރައްގީގެ މަޝްރޫއުތަކެއް ފައްޓަވައިދެއްވުމަށް ރައީސް އިބްރާހިމް މުހައްމަދު ސޯލިހު، ހުވަދޫގެ ތިން ރަށަކަށް ކުރައްވާ ދަތުރުފުޅެއް މިއަދު ފައްޓަވައިފި އެވެ.

ރައީސް އޮފީހުން ބުނީ ދެ ދުވަހުގެ ދަތުރުފުޅުގައި އެ މަނިކުފާނު އެންމެ ފުރަތަމަ ވަޑައިގަންނަވާނީ، ގއ. ދާންދުއަށް ކަމަށެވެ. އޭގެ ފަހުން އެ އަތޮޅު ނިލަންދު އާއި މާމެންދު އަށް ވަޑައިގަންނަވާނެ އެވެ.

އެ ރަށްރަށުގައި ސަރުކާރުން ނިންމާފައި ހުރި އުމްރާނީ ބައެއް މަޝްރޫއުތައް އިފްތިތާހު ކުރުން ވެސް މި ދަތުރުފުޅުގައި އޮންނާނެ ކަމަށް ރައީސް އޮފީހުން ބުންޏެވެ.

އަދި ތިން ރަށުގެ ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ އަދި ރަށުގެ ރައްޔިތުންނާ ބައްދަލުކުރައްވާނެ އެވެ.

ހުވަދު އަތޮޅުގެ ދަތުރުފުޅު ނިންމަވާލެއްވުމަށް ފަހު ރައީސް މާލެ ވަޑައިގަންނަވާނީ މާދަމާ ރެ އެވެ. އެ އަށް ފަހު، އަންނަ ހޯމަ ދުވަހު ފާހަގަކުރާ އެއްބައިވަންތަކަމުގެ ދުވަހުގެ ރަސްމިއްޔާތަށް މ. ކޮޅުފުއްޓަށް ވަޑައިގަންނަވަން ވަނީ ހަމަޖައްސައިފަ އެވެ.